كەزەكتەن تىس پرەزيدەنت سايلاۋىن وتكىزۋ ءۇشىن بۇگىن ساعات 7.00-دە ەرتىس-بايان وڭىرىندەگى 528 سايلاۋ ۋچاسكەسىنىڭ ەسىكتەرى اشىلدى, دەپ حابارلايدى Egemen.kz.
پاۆلودار وبلىستىق اۋماقتىق سايلاۋ كوميسسياسىنىڭ توراعاسى گۇلنار امانجولوۆانىڭ ايتۋىنشا, جالپى ءوڭىر بويىنشا 542 سايلاۋ كوميسسياسى قۇرىلعان. ونىڭ 14-ءى اۋماقتىق بولىپ سانالادى. وزگەسى – ۋچاسكەلىك كوميسسيالار. مۇندا بارلىعى 3502 ادام جۇمىس ىستەيدى. داۋىس بەرۋ پروتسەسىنە كەلەر بولساق, ازاماتتار ءوز تاڭداۋلارىن 528 سايلاۋ ۋچاسكەسىندە جاساي الادى. اتاپ ايتقاندا, 138 ۋچاسكە وبلىس ورتالىعىندا, 65 ۋچاسكە ەكىباستۇز قالاسىندا, 40 ۋچاسكەدە اقسۋدا جانە 285-ءى اۋدانداردا ورنالاسقان.
سايلاۋ كۇنى وڭىردەگى 225 سايلاۋ ۋچاسكەسىندە داۋىس بەرۋشىنىڭ ءوتىنىشى بويىنشا تىركەۋ ورنىن تەكسەرۋ سەرۆيسى جۇمىس ىستەيتىن بولادى. ال تىركەۋى جوق تۇرعىندارعا كەلەر بولساق, ولار ءۇشىن 6 سايلاۋ ۋچاسكەسىندە قىزمەت كورسەتىلەدى. اتاپ ايتقاندا, پاۆلودار قالاسىنداعى № 11, 15, 51, 79, ەكىباستۇزداعى № 536 جانە اقسۋ قالاسىنداعى № 485 سايلاۋ ۋچاسكەلەرىندە ءموبيلدى حالىققا قىزمەت كورسەتۋ ورتالىقتارىنىڭ جۇمىستارى ۇيىمداستىرىلادى. ياعني, تۇراقتى تىركەۋى جوق ازاماتتار وسى سايلاۋ ۋچاسكەلەرىندە ءبىر كۇندىك تىركەۋگە تۇرىپ, داۋىس بەرۋ مۇمكىندىگىن پايدالانا الادى. ال كەلەسى كۇنى تىركەۋدەن اۆتوماتتى تۇردە شىعارىلادى.
بۇگىن قوعامدىق كولىكتەر جولاۋشىلاردى تەگىن تاسىمالدايدى ءارى ينۆاتاكسي قىزمەت كورسەتەدى. دەنساۋلىق جاعدايىنا بايلانىستى ۋچاسكەگە كەلە المايتىن ازاماتتار ساعات 12.00-گە دەيىن سايلاۋ ۋچاسكەلەرىنە حابارلاسىپ, داۋىستى ۇيدەن بەرۋگە نيەتتى ەكەنىن ءبىلدىرۋى كەرەك. سول ءوتىنىش نەگىزىندە كوميسسيا مۇشەلەرى تۇرعىننىڭ ۇيىنە بارادى.