شاعىن قالانىڭ شىرايى

ستەپنوگور قالاسىندا مۇگەدەكتەرگە ارنالعان دەمالىس ورتالىعى اشىلدى. 260 شارشى مەترلىك سپورت زالى ارنايى كوپفۋنكتسيونالدى ترەناجەرلارمەن, جۇگىرۋ جولدارىمەن جابدىقتالعان, سونىمەن قاتار تەننيس­كە ارنالعان ۇستەلدەر بار. كۇن سايىن كەستە بويىنشا 20-عا جۋىق ادام اينالىسادى.

– جىل سايىن كاسىبي سپورتپەن شۇعىلدانعىسى كەلەتىندەردىڭ سانى كوبەيىپ كەلەدى. بيىل ارامىزدان 5 سپورت شەبەرى مەن سپورت شەبەرىنە ۇمىتكەر شىقتى. ءبىز بالالاردى ءالى قابىلداي المايمىز, ولارعا «سپەشيال وليمپيكس» جەكە باعدارلاماسى قاجەت, – دەپ قالا اكىمىنىڭ مۇگەدەكتىگى بار ادامدار ماسەلەلەرى جونىندەگى كەڭەسشىسى ستانيسلاۆ مۇحاماديەۆ قامقورلىقتان قاعىس قالدىرماعان جاناشىرلارعا ءوز العىسىن ءبىلدىردى.

وسى ءبىر جاعىمدى جاڭالىق جالعا­سىن تاۋىپ, قالاداعى التىنشى شاعىن اۋداننىڭ اۋماعى اباتتاندىرىلدى. جازعى كەزەڭدە جالپى اۋدانى 11,5 مىڭ شارشى مەتر, ۇزىندىعى 750 مەترلىك ءتورت بالالار الاڭى, فۋتبول جانە ۆولەي­بول الاڭدارى, ۆوركاۋت ايماعى جاسا­لىپ, تروتۋارلار سالىندى, جولدار اس­فالتتالىپ, تۇراق ورىندارى ۇلعايتىلدى. 

ءسوز اراسىندا شاعىن قالا ءۇشىنشى جىل قاتارىنان قارقىندى دامىپ كەلە جاتقاندىعىن ايتا كەتۋىمىز كەرەك. بۇل جۇمىس ءالى دە جالعاسىن تاباتىن بولادى.

اقمولا وبلىسى,

ستەپنوگور قالاسى