قازاقستاندا بيلىك باسىندا بولعان تۇلعالاردىڭ الماتىعا دەگەن ەرەكشە ىقىلاسىنا ءتانتىمىن. مەملەكەت باسشىسى قاسىم-جومارت توقاەۆتىڭ الماتىعا ءاربىر ساپارىنان سونداي ءبىر جىلىلىق بايقايمىن. الماتىعا دەگەن جىپ-جىلى ىقىلاس بيلىك باسىندا بولعان ازاماتتار ءۇشىن ءداستۇر ساباقتاستىعى رەتىندە قالىپتاسىپ قالعانى جانىمدى جادىراتادى.
كەشەگى وتكەن ديمەكەڭ – دىنمۇحامەد قوناەۆ اعامىز الماتىنى ءومىرىنىڭ ءبىر بولشەگى رەتىندە قابىلداپ وتكەنىنە ءبىز كۋامىز. الماتىنىڭ قازاقستان ءۇشىن, قازاقتار ءۇشىن ورنى بولەك. قازاقستان تاريحىندا ورنى بار ساياسي وقيعالاردىڭ بارىنە الماتى كۋا بولدى.
پرەزيدەنت ق.توقاەۆ الماتى ساپارى كەزىندە قاڭتار وقيعالارىنا ايرىقشا توقتالدى, ەلىمىز ءۇشىن سىناق بولعانىن ايتتى. ەلدىك تۇتاستىعىمىزعا سىرتقى كۇشتەردىڭ ءار الۋان جولمەن ارالاسىپ, ەكونوميكالىق توپتار مەن ءدىني اعىمداردىڭ «شايقاسى» تۇتاستىعىمىزعا سىزات تۇسىرە جازدادى. مۇنداي وقيعانىڭ ەندى قايتالانبايتىنىنا سەنىم بىلدىرگەن مەملەكەت باسشىسى «ەلىمىزدىڭ التىن بەسىگى – الماتىنى قيراتىپ جاتقانى وسى قالانىڭ پەرزەنتى رەتىندە مەنىڭ دە جانىما باتتى. دەگەنمەن, ءدال سول ساتتە ابدىراپ, ۋاقىت ۇتتىرۋعا ەش قاقىمىز بولعان جوق» دەپ جۇرەك تۇكپىرىندە قوردالانىپ قالعان سىرىن الماتىلىقتارمەن ءبولىستى.
قالا ەكونوميكاسىن ءارتاراپتاندىرۋ ارقىلى ونىڭ تۇراقتى دامۋىن قامتاماسىز ەتۋ قاجەت ەكەنىن, الماتىنىڭ ەلىمىزدىڭ ەكونوميكالىق دامۋىنىڭ قوزعاۋشى كۇشى جانە كوشباسشىسى بولىپ قالا بەرەتىنى مەملەكەت باسشىسىنىڭ نازارىنان تىس قالمادى. الماتى تۇرعىندارىنىڭ كوپشىلىگى, اسىرەسە جاستار ءۇشىن باسپانا – ەڭ وزەكتى ماسەلە. جاستاردىڭ باسپانا الۋىنا جان-جاقتى جاعداي جاساۋ كەرەكتىگى دە ايتىلدى.
مەملەكەت باسشىسىنىڭ بيزنەس, قارجى ورتالىعىندا ءومىر سۇرەتىن الماتىلىقتاردى ورتاشا تابىس تۇزاعىندا دەپ سيپاتتاۋى وزگە باسشىلارعا وي سالسا دەيمىن. قازاقتىڭ ءبىر ازاماتى رەتىندە ايتارىم, وبلىستى نەمەسە اۋدانداردى باسقارىپ وتىرعان اكىمدەردىڭ قىزمەتىنىڭ كورسەتكىشىن تۇرعىندارىنىڭ ورتاشا تابىسى, جۇمىسقا ورنالاسۋ كورسەتكىشىمەن باعالاۋ جۇيەسى ەنگىزىلگەندە عانا قازاقستاندىقتار ورتاشا تابىس تۇزاعىنان قۇتىلا الادى.
قالا حالقىنىڭ مادەني مەنتاليتەتىن قالىپتاستىرۋ دامۋدىڭ ماڭىزدى كورسەتكىشى ەكەنىن, باق رۋحانياتتىڭ بارومەترى بولىپ تانىلعان مادەنيەت تاقىرىبىنا باسىمدىق بەرۋى كەرەك دەگەندى تالايدان بەرى ايتىپ كەلەمىن. ەل باسىنا اۋىرتپالىق تۇسكەن قيىن-قىستاۋ كەزەڭدەر ورناسا دا, جالپاق جۇرتتىڭ دا, مەملەكەت باسشىلارىنىڭ جانىنان ۇلتتىڭ زيالىسى تابىلادى. حالىقتىڭ ورتاسىنان سايدىڭ تاسىنداي ىرىكتەلىپ شىققان ازاماتتار ساياسي شەشىم قابىلدار كەزدە زيالىسىنىڭ الدىنان ءوتىپ, باتاسىن الادى.
مەملەكەت باسشىسى الماتىنىڭ ەلىمىزدىڭ ىسكەرلىك, رۋحاني, عىلىمي جانە تۋريستىك ورتالىعى ەكەنىن, قالانىڭ دامۋىنا, ونىڭ تىرشىلىككە قولايلى, جايلى بولۋىنا ايرىقشا ءمان بەرەتىنىن ايتتى. سونداي-اق پرەزيدەنت نەگىزگى مادەنيەت وشاقتارى قالانىڭ «تاريحي ورتالىعىندا» شوعىرلانىپ قالعانىنا نازار اۋداردى, اكىمدىكتەر قالانىڭ جاڭا اۋداندارىندا زاماناۋي مادەني ورتا قالىپتاستىرۋى كەرەكتىگىن تاپسىردى.
قازاقستاندا پرەزيدەنتتىك ينستيتۋتتىڭ قالىپتاسقانى كوز الدىمىزدا ءوتتى. بيلىكتىڭ جەكە ادامنىڭ نەمەسە جەكەلەگەن توپتاردىڭ قولىنا شوعىرلانۋى دامۋعا كەدەرگى بولعانى, اينالىپ كەلگەندە جەكە باسقا تابىنۋشىلىقتىڭ اسەرىنىڭ قانداي بولعانىن ءبارىمىز كورىپ وتىرمىز. مەملەكەت باسشىسىنىڭ «مەنىڭ تۇسىنىگىمدە, پرەزيدەنت – جالدامالى مەنەدجەر, حالىق ونىمەن بەلگىلى ءبىر مەرزىمگە كەلىسىمشارت جاسايدى» دەگەن ءبىراۋىز ءسوزى الداعى ۋاقىتتا مەملەكەتتى باسقارۋ ينستيتۋتتارىنىڭ مۇلدەم باسقا باعىتپەن داميتىنىن كورسەتەدى.
قاسىم-جومارت كەمەل ۇلىنىڭ «بۇل قىزمەتتى اتقارعان جانە اتقاراتىن ءاربىر ادام ەڭ قاتال ءۇش سوتتىڭ – حالىق, تاريح جانە ءوز ار-ۇجدانىنىڭ الدىندا جاۋاپ بەرەدى» دەگەن پىكىرى ءبىراز ادامعا وي سالاتىن شىعار دەپ ۇمىتتەنەمىن.
ءاسانالى ءاشىموۆ,
مەملەكەتتىك سىيلىقتىڭ لاۋرەاتى
الماتى