ءورت ءسوندىرۋ تەحنيكاسىمەن تولىقتى

سالتاناتتى ءىس-شارا اقمولا وبلىسى, اقكول اۋدانىنىڭ ور­تالىعىندا ءوتتى. زامان تالابىنا ساي جاب­دىقتالىپ, قاجەتتى قۇرال-سايمانمەن تولىققاندى جاراقتالعان ءورت ءسوندىرۋ تەحنيكالارىنىڭ كىلتىن تاراتپاس بۇرىن بىرقاتار ورمانشى قۇرمەتكە بولەندى. ەكولوگيا جانە تابيعي رەسۋرس­تار ۆيتسە-ءمينيسترى نۇركەن شاربيەۆ پەن اقمولا وبلىسى اكىمىنىڭ ورىنباسارى التىناي امىرەنوۆا اتتان تۇسپەي قىراعىلىق تانىتىپ, قورشاعان ورتانىڭ تىنىشتىعىن قاراۋىلدايتىن ورمان شارۋاشىلىعى سالاسىنىڭ وزات ەڭبەككەرلەرىنە قۇرمەت گراموتالارىن تابىستادى.

«2023 جىلدان باستاپ پرەزيدەنتتىڭ تاپسىرماسىمەن ۇكىمەت تاراپىنان ورتكە قارسى تەحنيكانى جاڭعىرتۋعا باعىتتالعان اۋقىمدى باعدارلاما قولعا الىندى. بۇگىن دە سونداي يگى ءىستىڭ كۋاسى بولىپ وتىرمىز. 2024–2025 جىلدارى رەسپۋبليكالىق, جەر­گىلىكتى بيۋدجەت قاراجاتى ەسەبىنەن 21,5 ملرد تەڭگە ءبولىنىپ, 92 ءورت ءسوندىرۋ ماشيناسى, 118 شاعىن ورمان پاترۋلدىك كەشەنى, 244 تراكتور, 240 پاترۋلدىك ماشينا, سونىمەن قاتار 3 مىڭنان اسا باسقا دا تەحنيكا ساتىپ الىندى», دەدى ن.شاربيەۆ. ۆيتسە-مينيستر ليزينگتىك قاراجات ەسەبىنەن 35 ملرد تەڭگەگە 1057 بىرلىك ورتكە قارسى تەحنيكا ساتىلىپ الىناتىنىن, ونىڭ ىشىندە 333 ءورت ءسوندىرۋ ماشي­ناسى, 350 تراكتور مەن 374 ورمان پاترۋل­دىك شاعىن كەشەنى بولاتىنىن اتاپ ءوتتى.

«مەملەكەتتىڭ قولداۋىمەن بەرىلگەن مۇنداي تەحنيكالار ورمان ءورتىنىڭ الدىن الىپ, قاۋىپ-قاتەردى بولدىرماۋ ماقساتىندا بەرىلىپ وتىر. قورشاعان ورتانى كومكەرگەن ورمان – ەلىمىزدىڭ باعا جەتپەس بايلىعى, بابالارىمىزدىڭ ۇرپاقتان-ۇرپاققا مۇراعا قالدىرعان يگىلىگى مەن داۋلەتى. حالىق بايلىعىن كوزدىڭ قارا­شىعىنداي ساقتاپ, ايالاپ ءوسىرىپ, كۇتىپ-باپتايتىن ورمانشىلاردىڭ ەڭبەگى ارقاشان قۇرمەتكە لايىق», دەدى ا.امىرەنوۆا.

«بۇعان دەيىن دە ءبىزدىڭ ورمان شارۋاشى­لىعىنا ءورت ءسوندىرۋ تەحنيكاسى بەرىلگەن. بۇگىن تاعى دا زامان تالابىنا ساي تەحنيكانى تىزگىندەگەنىمىزگە قۋانىشتىمىز. جىلدىڭ ءتورت مەزگىلىندە دە بوساڭدىق تانىتپاي, قىراعىلىقپەن ورماننىڭ تىنىس-تىرشىلىگىن قاداعالايتىن ارىپتەستەرىمىز بۇگىن ماراپات الىپ, قۇرمەتكە بولەندى. ەڭ باستىسى ءتىلسىز جاۋ ءورت تۇتانباسىن دەپ تىلەيمىز. ەرتەرەكتە ورمانشىلاردىڭ ايلىق ەڭبەكاقىسى دا ماردىمسىز ەدى, ءبىر-ەكى جىلدىڭ بەدەرىندە ەسەلەنىپ ارتتى. مۇنىڭ ءوزى دە – بىزگە ەرەكشە دەمەۋ», دەيدى ورمان شا­رۋاشىلىعىنىڭ ديرەكتورى ەركىن حايدار ۇلى.

وتاندىق تەحنيكا ءوندىرىسىنىڭ ءونىمى سانالاتىن تەحنيكانى قۇراستىرۋشىلار ورمان ءورتىن ءسوندىرۋشى مامانداردىڭ دا ۇسىنىس, پىكىرلەرىن ەسكەرگەن. سىيىم­دىلىعى 3 توننا سۋ ارقالاعان كولىك ءورت وشاعىنىڭ ۇستىنە دەيىن جاقىنداي الادى. رەزەڭكە دوڭگەلەكتەرىنە دە ءوزى سۋ بۇركىپ, ورتەنۋ قاۋىپتىلىگىن تومەندەتەدى. ءوزىن-ءوزى ءسوندىرۋ قۇرىلعىسى بىردەن ىسكە قوسىلىپ, ءورت ءسوندىرۋ بارىسىندا قاتار قىزمەت اتقارادى.

اقمولا وبلىسىنىڭ ورمان مەكەمەلە­رىنە بىلتىر 30 تراكتور مەن 31 31 ورمان پاترۋلدىك شاعىن كەشەنى بەرىلگەن. بيىل ۇلەستىرىلۋگە ءتيىس 24 ءورت ءسوندىرۋ كولىگىنىڭ قالعان 11-ءى مامىر ايىندا جەتكىزىلەدى.

ەكولوگيا جانە تابيعي رەسۋرستار مينيسترلىگىنىڭ مالىمەتىنشە, 2011–2023 جىلدار ارالىعىندا ورمان جانە تابيعاتتى قورعاۋ مەكەمەلەرىنىڭ ماتە­ريالدىق-تەحنيكالىق بازاسى جاڭار­تىلماعان. بۇگىندە ەلىمىزدىڭ تراكتورلار مەن كىشى ورمان ءورت ءسوندىرۋ كەشەندەرىن جەتكىزۋ تولىق اياقتالدى, سونداي-اق 152 ءورت ءسوندىرۋ اۆتوكولىگى بەرىلدى. بيىلعى مامىردىڭ اياعىنا دەيىن تاعى 168 ءورت ءسوندىرۋ اۆتوكولىگى تاراتىلماقشى. مۇنىڭ بارلىعى دا ەلدىڭ ءورت قاۋپى جوعارى وڭىرلەرىندەگى مەملەكەتتىك ورمان قورعاۋ­شىلاردى ورتكە قارسى تەحنيكامەن جاڭارتىپ, جابدىقتاۋدى جاقسارتۋ ماقساتىندا ىسكە اسىرىلىپ وتىر.