الماتى – شەلەك – قورعاس تاسجولىندا جۇك كولىكتەرى بەتون جابىندىسىن ءبۇلدىرىپ, سالدارىنان جەڭىل كولىكتەرگە زاقىم كەلتىرىلدى. زارداپ شەككەن كولىك يەلەرىنە كەلتىرىلگەن شىعىندى مەردىگەر ۇيىم وتەپ بەردى, دەپ حابارلايدى Egemen.kz.
«قازاۆتوجول» مەكەمەسىنىڭ مالىمەتىنشە, وقيعا الماتى – شەلەك – قورعاس اۆتوجولىندا اۋىر جۇك كولىگى وتكەننەن كەيىن بولعان.
الدىن الا دەرەكتەر بويىنشا كولىك جۇكتەمەسىنىڭ اسەرىنەن جولدىڭ بەتون جابىندىسىنىڭ ءبىر بولىگى بۇزىلعان. كەيىن وسى ۋچاسكەدەن وتكەن بىرنەشە جەڭىل اۆتوكولىك دوڭگەلەكتەرىن زاقىمداپ العان.
وقيعا سالدارىن جول قىزمەتتەرى مەن مەردىگەر ۇيىم جەدەل تۇردە جويدى. جول ۋچاسكەسى نورماتيۆتىك تالاپتارعا ساي قالىپقا كەلتىرىلىپ, كولىك قوزعالىسى شتاتتىق رەجيمدە قايتا ۇيىمداستىرىلدى.
زارداپ شەككەن كولىك يەلەرىنە كەلگەن شىعىندى مەردىگەر كومپانيا تولىق وتەگەن. سونىمەن قاتار پوليتسيا دەپارتامەنتى اتالعان ۇيىمعا ايىپپۇل سالدى.
ەسكە سالايىق, بىلتىر جىل سوڭىندا ەلىمىزدە 13 مىڭ شاقىرىم اۆتوجول جوندەلگەنى تۋرالى حابارلاعان بولاتىنبىز.