استانادا حالىقارالىق كىتاپ جارمەڭكەسى وتەدى

«Astana Eurasian Book Fair-2026» كىتاپ جارمەڭكەسىن مادەنيەت جانە اقپارات مي­نيسترلىگى مەن استانا قالا­سى اكىمدىگىنىڭ قولداۋىمەن «فوليانت» باسپاسى ۇيىمداس­تىرىپ وتىر. ءىس-شاراعا باس­پا ونىمدەرىمەن اينالىساتىن 80-گە جۋىق كومپانيا قاتىسادى. سونداي-اق  تۇركيا, قىرعىزستان, وزبەكستان, ازەربايجان, موڭعوليا, رەسەي, يسپانيا, قىتاي, يران, بەلارۋس, پورتۋگاليا, ۆەنەسۋەلا, ۇلىبريتانيا ەلدەرىنەن دە 40 باسپا ونىمدەرىن اكەلمەك.

ورتالىق ازياداعى ەڭ اۋقىمدى كىتاپ جارمەڭكەسى بەس كۇنگە سوزىلىپ, كورمە اياسىندا جاڭا كىتاپتاردىڭ تۇساۋكەسەرى, اۆتورلارمەن كەزدەسۋ, اۆتوگراف-سەسسيا­, بالالار الاڭىندا ارنايى شەبەرلىك دارىستەرى ۇيىمداستىرىلماق.

اتاپ ايتقاندا, تۇركيا مادەنيەت جانە تۋريزم مينيسترلىگىنىڭ قولداۋىمەن جارىق كورگەن «تۇرىك اسحاناسى» كىتابىنىڭ, بەكارىس شويبەكوۆتىڭ «ايتىستىڭ التىن ايدار بەكارىسى» ايتىستار جيناعىنىڭ, مارجان ەرشۋدىڭ «جالعىز قول» پوەما­سىنىڭ, «زامانداستار» سەرياسىمەن شىققان «ەلدوس سمەتوۆ. ءتوزىم. سەنىم. جەڭىس» كىتابىنىڭ, ەرلان قوجاباەۆتىڭ «قازاق ويۋلارى» فوتوالبومىنىڭ, انجەي ساپكوۆسكيدىڭ «مىستانگەر» فانتاستيكالىق شىعارماسىنىڭ, ۇلاربەك دالەيدىڭ «باتۋ حان» تاريحي رومانىنىڭ, الىشەر راحاتتىڭ «يەسىز كولەڭكە», يسپان جازۋشىسى حاۆەر مورونىڭ ء«ۇمىت ساپارى», ەرنەست حەمينگۋەيدىڭ «قوڭىراۋ كىمدى جوقتايدى», ازەربايجان اقىنى ءراسميا ءسابيردىڭ «ولەڭ-ايەل», بايىت قابان ۇلىنىڭ «موڭعول-ولەڭ» كىتابىنىڭ, نۇرسۇلتان مىقتىبايدىڭ «اق جايىقتىڭ كوز جاسى», سونداي-اق «تۇركىستان – ماڭگىلىك ءارى ءاردايىم جاڭا» جانە «ديماش قۇدايبەرگەن. شەكسىز مۋزىكا» اتتى كىتاپ-البومدارىنىڭ تانىستىرىلىمى جوسپارلانعان.

سونىمەن قاتار 23 ساۋىردە ۇلتتىق كىتاپ كۇنى مەرەكەسىنە وراي مادە­نيەت جانە اقپارات مينيسترلىگى ۇيىمداس­تىراتىن «ۇلتتىق كىتاپ» بايقاۋىنىڭ جەڭىم­پازدارىن ماراپاتتاۋ ءراسىمى وتەدى. كورمە مەملەكەت جانە قوعام قايراتكەرلەرى, تانىمال قالامگەرلەر مەن شەتەلدىك ەلشىلەردىڭ قاتىسۋىمەن 22 ءساۋىر كۇنى ساعات 11.00-دە رەسمي اشىلادى.