ەرتىس-بايان ءوڭىرى ازاعاڭنىڭ – ءازىلحان نۇرشايىقوۆتىڭ شىعارماشىلىعىن ءاردايىم ءاز تۇتىپ, ايرىقشا قۇرمەتتەيدى. سەبەبى جازۋشىنىڭ ءوزى ءۇشىن «ادەبيەت ايدىنىنا كوتەرگەن كوسمودرومى بولعان» كەرەكۋ جەرىندە «ماحاببات, قىزىق مول جىلدار» رومانىنىڭ العاشقى جولدارى قاعاز بەتىنە تۇسكەن ەكەن.
قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى ءازىلحان نۇرشايىقوۆتىڭ 100 جىلدىعىنا وراي پاۆلوداردا ء«ومىر جولى» اتتى دوڭگەلەك ۇستەل ءماسليحاتى ۇيىمداستىرىلدى. جازۋشى 1953-1956 جىلدارى وبلىستىق «قىزىل تۋ» گازەتىن باسقارىپ, كەيىن «سوتسياليستىك قازاقستاننىڭ» وبلىستاعى مەنشىكتى ءتىلشىسى قىزمەتىن اتقاردى.
دوڭگەلەك ۇستەلگە مۇرىندىق بولعان بۇقار جىراۋ اتىنداعى ادەبيەت جانە ونەر مۋزەيىنىڭ باسشىسى ەربول قايىروۆ اتاپ وتكەندەي, قابىرعالى قالامگەردىڭ 100 جىلدىق مەرەيتويى – ەلگە ورتاق تورقالى توي. بيىل مۋزەي قىزمەتكەرلەرى الماتىعا ارنايى بارىپ, ازاعانىڭ قىزى جانار نۇرشايىقوۆانىڭ ۇيىندە بولىپ, جازۋشى كوزى تىرىسىندە تۇتىنعان جەكە زاتتارىن, سيرەك كىتاپتارىن اتتاي قالاپ الىپ كەلگەن. بۇعان قوسا ارحيۆتەردەن پاۆلودار جەرىندە ءجۇرىپ ايتۋلى تۇلعالارمەن تۇسكەن فوتوسۋرەتتەرى, قولجازبالارى دا الىنىپتى. وسىنىڭ بارلىعى قازىرگى كۇنى كوپشىلىككە تانىستىرىلىپ, مۋزەيگە اعىلعان جۇرتتىڭ نازارىنا تانىستىرىلۋدا.
تورايعىروۆ ۋنيۆەرسيتەتىندەگى جۋرناليستيكا كافەدراسىنىڭ پروفەسسورى سەرىك ەلىكباي سوعىستىڭ سۇر شينەلىن كيىپ, بەيبىت ومىرگە ورالعان جاس قالامگەردىڭ, قازاق سولداتىنىڭ بەيبىت ومىرگە دەگەن سۇيىسپەنشىلىگىن, ماحاببات سەزىمىن, وي يىرىمدەرىن «ماحاببات, قىزىق مول جىلدار» كىتابىنان تابۋعا بولاتىنىن جەتكىزدى.
– جاستىق شاعىمىزدا ءسۇيىپ وقىعان «ماحاببات, قىزىق مول جىلدار» رومانى سۇيىسپەنشىلىك تاقىرىبىنداعى تاپتاۋرىن دۇنيە ەمەس, ناعىز قازاق ازاماتىنا ءتان ءمولدىر سەزىم مەن بۋىرقانعان جاستىق وتىنىڭ شىنايى كورىنىسى ەدى. ونى سوعىس ورتىنەن ەندى ورالعان قازاق سولداتىنىڭ دۇنيەتانىمى ارقىلى قاراپايىم تىلدە جەتكىزۋ شەبەردىڭ شەبەرىنىڭ عانا قولىنان كەلەتىن ادەبي ءۇردىس. ال باۋىرجان مومىش ۇلى جايلى جازىلعان «اقيقات پەن اڭىز» تۋىندىسى مايتالمان شىعارمالارىنىڭ ىشىندەگى ەڭ ۇشار شىڭى ەدى. ەكەۋ ورتاسىنداعى اڭگىمەنىڭ ۇلكەن رومانعا جۇك بولىپ, وندا كەشەگى داڭقتى باھادۇرلەرىمىزدىڭ جالعاسىنداي باۋكەڭنىڭ ەرلىك ىستەرى كوز الدىمىزدا بولىپ جاتقان وقيعاداي وربىتىلە جازىلدى, – دەيدى س.ەلىكباي.
ءازىلحان نۇرشايىقوۆ پەن جازۋشى-دراماتۋرگ مۇقان يمانجانوۆ ارالارىنان قىل وتپەس دوستار بولعانى بەلگىلى. ونىڭ ۇستىنە م.يمانجانوۆتىڭ «ەسەنوۆتىڭ تاعدىرى» اتتى اڭگىمەسى كەيىن ازاعاڭا جوعارىدا اتالعان ماحاببات تاقىرىبىنداعى رومان-بەستەللەردىڭ جازىلۋىنا تۇرتكى بولادى. فيلولوگيا عىلىمدارىنىڭ دوكتورى, پروفەسسور ايتمۇحامبەت تۇرىشەۆ قوس تاعدىر يەسىنىڭ ءبىر-بىرىنە جازعان حاتتارى جايىندا سىر شەرتتى. قالامگەرلەردىڭ حات ارقىلى ەل مەن جەردىڭ, حالىقتىڭ مۇڭ-مۇقتاجىن كوتەرگەن تۇستارىن اسەرلى باياندادى. ال قازاقستان جازۋشىلار وداعىنىڭ مۇشەسى, ارداگەر جۋرناليست عالىمبەك جۇماتوۆ قالامگەرمەن وتكەن كەزدەسۋلەر جايىندا اڭگىمەلەپ, كەرەكۋ ءوڭىرى تۇلعانىڭ جازۋشىلىق جولعا بەت بۇرۋىنا تۇرتكى بولعانى تۋرالى تارقاتا ايتتى. ال تورايعىروۆ ۋنيۆەرسيتەتىنىڭ عىلىمي حاتشىسى ايگەرىم شاحارمان كوپتەگەن مالىمەتپەن ءبولىستى.
«وڭىرلىك باسىلىمنىڭ نەگىزىن كەزىندە ەسىمى التى الاشقا ءمالىم بەيسەنباي كەنجەباەۆ قالاسا, ودان كەيىن گازەتتى مۇلدە بولەك بەلەسكە شىعارعان ەكىنشى تارلان ازاعاڭ بولاتىن. سول اتپال اعالارىمىز سالىپ كەتكەن سارا جولدى جالعاستىرعان گازەت بۇگىندە ەرتىس-بايان حالقىنىڭ شىنايى ىقىلاسىنا يە بولىپ, وقىرماننىڭ وڭ باعاسىن الىپ وتىر. جۋىقتا رەسپۋبليكالىق «ۇركەر» سىيلىعىن جەڭىپ العانىمىز سونىڭ ءبىر دالەلىندەي. گازەت رەداكتسياسى ءۇشىن ءازىلحان نۇرشايىقوۆتىڭ جاساپ كەتكەن ەڭبەگى ۇمىتىلمايدى», دەپ اتاپ ءوتتى «Saryarqa samaly» گازەتىنىڭ باس رەداكتورى نۇربول جايىقباەۆ.
دوڭگەلەك ۇستەل بارىسىندا اقىننىڭ ءومىرى مەن شىعارماشىلىعىنان كورمە ۇسىنىلدى.
پاۆلودار