اقمولا وبلىسىندا 71 مىڭنان استام ادامعا تۇماۋعا قارسى ەكپە سالىندى, دەپ حابارلايدى Egemen.kz وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنە سىلتەمە جاساپ.
اتالعان باسقارمانىڭ مالىمەتىنە سۇيەنسەك, 73,7 ميلليون تەڭگەگە تۇماۋعا قارسى 73 138 دوزا «گريپپول پليۋس» ۆاكتسيناسى ساتىپ الىنعان. وبلىستا بۇل ۆاكتسينا 5 جىلدان استام ۋاقىت بويى قولدانىلىپ كەلەدى. الايدا اتالعان مولشەر ءوڭىر حالقىنىڭ تەك 9,8 پايىزىنا جەتەدى. سول سەبەپتى قوسىمشا تاعى 2 500 ۆاكتسينا ساتىپ الىنادى.
«قازىردىڭ وزىندە 71 361 مىڭ اقمولالىق تۇماۋعا جانە ماۋسىمدىق اۋرۋلارعا قارسى ەكپە الدى, ونىڭ 8 265-ءى – 2-10 جاس ارالىعىنداعى بالالار. سونىمەن بىرگە جابىق ۇلگىدەگى مەكەمەلەردە (بالالار ءۇيى, مەكتەپ ينتەرناتتارى, بالالارعا/مۇگەدەكتەرگە ارنالعان ينتەرناتتار) – 416 ادام, 284 – جۇكتى ايەل ەگىلدى, ال قارتتار مەن مۇگەدەكتەر ۇيلەرىنىڭ كونتينگەنتى – 1 040, سوزىلمالى اۋرۋلارى بار ەرەسەكتەر – 21 342. بۇل باعىتتاعى جۇمىستار ودان ءارى جالعاسادى», دەلىنگەن حابارلامادا.
ۆاكتسيناتسيادان كەيىنگى قورعانىس اسەرى ادەتتە 8-12 كۇننەن كەيىن پايدا بولىپ, 12 ايعا دەيىن ساقتالادى. ادامنىڭ جاس ەرەكشەلىگىنە قاراي ۆاكتسيناتسيادان كەيىن تۇماۋ ۆيرۋسىنا قارسى انتيدەنەلەردىڭ قورعانىس تيترلەرىنىڭ دەڭگەيى 75-95 پايىز بولۋى ءتيىس.
«وبلىستا ەسەپتە تۇرعان 73 138 ادامنىڭ بارلىعى دا ەكپە الۋى ءتيىس. بۇل – سوزىلمالى اۋرۋلارى بار ادامدار, مەديتسينا قىزمەتكەرلەرى جانە جۇكتىلىكتىڭ 2-3 تريمەسترىندەگى ايەلدەر, جابىق مەكەمەلەردەگى ادامدار», دەپ قوستى باسقارمانىڭ ءباسپاسوز قىزمەتى.
تۇماۋدىڭ الدىن الۋدىڭ ەڭ ۇتىمدى جولى – ۆاكتسيناتسيا. حالىق اراسىندا تۇماۋدىڭ جاپپاي تارالۋىن بولدىرماۋ جانە ورگانيزمدە «يممۋندىق قابات» قۇرىلۋى ءۇشىن جالپى حالىقتىڭ كەمىندە 10 پايىز ەكپە الۋى قاجەت. ۆاكتسينا تۇماۋعا قارسى يممۋنيتەتتىڭ جوعارى دەڭگەيىن قالىپتاستىرادى.