ءپىب اۋرۋحاناسى جانىنان ەمدىك-دياگنوستيكالىق ورتالىق اشىلدى

ءىس-شارا قر ءپىب مەديتسينالىق ورتالىعىنىڭ باسشىسى الەكسەي تسويدىڭ قاتىسۋىمەن ءوتتى. وندا جاڭا ورتالىقتىڭ تەراپەۆتىك بولىمدەرى تانىستىرىلىپ, جۇمىس بارىسى ايتىلدى.

اتالعان ورتالىق كۇردەلى اۋرۋعا شالدىققان ناۋقاستارعا ەمدىك-وڭالتۋ قىزمەتىن كورسەتەدى. دياگنوستيكالىق بازا 640 كەسكىندى كت, مرت اپپاراتتارى, زاماناۋي رەنتگەن جانە ۋلترادىبىستىق قوندىرعىلار, توموسينتەز فۋنكتسياسى بار سوڭعى ۇلگىدەگى زاماناۋي جابدىقتارمەن جابدىقتالعان.

مەديتسينالىق ورتالىقتىڭ جاڭا بلوگى 7 تەراپەۆتتىك ءبولىمدى قامتيدى. اتاپ ايتقاندا, پۋلمونولوگيا, نەفرولوگيا, گاستروەنتەرولوگيا, ەندوكرينولوگيا, نەۆرولوگيا, رەۆماتولوگيا جانە كارديولوگيا.

اۋرۋحانا ەلىمىزدىڭ ءتۇرلى ايماقتارىنان كەلگەن ناۋقاستارعا دا قىزمەت كورسەتەدى. جالپى العاندا ەمدىك قىزمەت  مىندەتتى الەۋمەتتىك مەديتسينالىق ساقتاندىرۋى بار نەمەسە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە دە اقىلى نەگىزدە دە قولجەتىمدى.

سونداي-اق الداعى ۋاقىتتا رەسپيراتورلىق جۇيە اۋرۋلارىنىڭ اۋىر تۇرلەرىن, سونىڭ ىشىندە اۋتويممۋندى جانە سيرەك كەزدەسەتىن اۋرۋلارمەن اۋىراتىن ناۋقاستاردى ەمدەۋ ءۇشىن پۋلمونولوگيالىق ورتالىق اشۋ دا جوسپارلانعان. 

اۋرۋحانانىڭ جاڭا ءبولىمى ءتۇرلى زاماناۋي دياگنوستيكالىق اپپاراتتارمەن قامتاماسىز ەتىلگەن. بۇل اۋرۋدى تەك دەر كەزىندە انىقتاپ قانا قويماي, دۇرىس ەمدىك شارا جۇرگىزۋگە دە مۇمكىندىك بەرەدى. 

رەابيليتولوگتار, لوگوپەدتەر, پسيحولوگتار مەن نەۆروپاتولوگتار اۋىر نەۆرولوگيالىق تاپشىلىعى بار ناۋقاستارعا مەديتسينالىق كومەك كورسەتۋدىڭ جاڭا تاسىلدەرىن قولدانادى.

بۇدان بولەك, التسگەيمەر اۋرۋى, پاركينسون اۋرۋى, سكلەروز, مياستەنيا گراۆيسى, اۋتويممۋندى ەنتسەفاليتتىڭ دياگنوستيكاسى مەن ەمدەۋ پروتسەسىنە يننوۆاتسيالىق تاسىلدەر پايدالانادى.

اۋرۋحانانىڭ توسەك-ورىن سىيىمدىلىعى جاتىن ورىندى 200-دەن 400-گە دەيىن كوبەيتۋگە, ياعني جىلىنا 8 مىڭ قازاقستاندىقتى قامتۋعا مۇمكىندىك بەرەدى.

ءىس-شارا سوڭىندا الەكسەي تسوي جاڭا ەمدىك-دياگنوستيكالىق اۋرۋحانانىڭ جۇمىسىمەن تانىسىپ, قىزمەتكەرلەرگە ساتتىلىك تىلەدى.