ەلىمىزدەگى 14 كوللەدجدىڭ بىرىگۋىمەن جاڭا اليانس قۇرىلدى. ولار ERG كاسىپورىندارىنىڭ ناقتى سۇرانىسى بويىنشا مامانداردى دايارلاپ, وڭىرلەردىڭ اۋىر ءوندىرىس ورىندارىنداعى كادرلار جەتىسپەۋشىلىگىن جويۋعا كومەكتەسەدى.
كوللەدجدەر اليانسىنا پاۆلودار, قوستاناي, اقتوبە وبلىستارىنان 14 ورتا ارناۋلى وقۋ ورنى جانە ەۋرازيالىق توپ ەندى. قازىرگى زامانعى ەڭبەك نارىعى ءۇشىن تەحنيكالىق كادرلاردى دايارلاۋ – وڭىردەگى ءبىلىم بەرۋ جۇيەسىن دامىتۋ باعىتتارىنىڭ ءبىرى ەكەنىن اتاپ وتكەن ابزال. بۇعان دەيىن وبلىستاعى 10 كوللەدج جانىنان قۇزىرەت ورتالىقتارى اشىلدى. سوڭعى ءۇش جىلدا تەحنيكالىق مامانداردى دايارلاۋعا ارنالعان مەملەكەتتىك تاپسىرىس ەكى ەسەگە ۇلعايىپ, وبلىس بويىنشا بارلىق كوللەدج ستۋدەنتتەرىنىڭ 80 پايىزىن قامتىدى. 2025 جىلعا دەيىن بۇل كورسەتكىشتى 100 پايىزعا جەتكىزۋ جوسپارلانىپ وتىر.
اقسۋ قارا مەتاللۋرگيا كوللەدجىنە الداعى ۋاقىتتا اليانسپەن بىرلەسىپ ناقتى وندىرىستەر مەن جاڭا ينۆەستيتسيالار ءۇشىن سۇرانىسقا يە ماماندىقتار بويىنشا جاڭا ءبىلىم بەرۋ باعدارلامالارىن ازىرلەۋ مىندەتتەلىپ وتىر. تەوريا مەن تاجىريبەنىڭ, دۋالدى وقىتۋ فورماسى مەن ءداستۇرلى وقىتۋدىڭ اراقاتىناسى, تۇلەكتەردىڭ جۇمىسقا ورنالاسۋىن باقىلاۋ سياقتى ماسەلەلەردى شەشۋ وسى سالاداعى جۇمىستىڭ تاماشا ناتيجەسى بولماق.
وبلىس كوللەدجدەرىندە بارلىعى 22 مىڭعا جۋىق ستۋدەنت ءبىلىم الادى. ولاردىڭ كوپشىلىگى كوللەدجدەگى وقۋمەن قاتار, وڭىردەگى 150-گە جۋىق كاسىپورىندا تاجىريبە الۋ مۇمكىندىگى بار. بۇل كاسىپورىنداردىڭ ەڭ ىرىلەرى – ERG وندىرىستەرى.
– ءبىزدىڭ قوعامدا توكار ماماندىعى قىزدارعا جاراسپايدى دەگەن تەرىس كوزقاراس قالىپتاسىپ قالعان. كوللەدجدە وسى بىلىكتىلىك بويىنشا كوپتەگەن قىزدار ءبىلىم الىپ جاتىر. بۇل ماماندىقتى يگەرۋ قيىن ەمەس, وقۋ بارىسى وتە قىزىقتى. قۇزىرەتتىلىك ورتالىعى العان ءبىلىمىمىزدى تاجىريبە جۇزىندە قولدانۋعا مۇمكىندىك بەرەدى, – دەيدى اقسۋ قارا مەتاللۋرگيا كوللەدجىنىڭ 2-كۋرس ستۋدەنتى الەكساندرا بۋكۋمباەۆا.
پاۆلودار وبلىسىنىڭ كوللەدجدەرى ەۋرازيالىق توپپەن ىنتىماقتاستىق ورناتقاننان بەرى بارلىعى 40 مىڭعا جۋىق مامان دايارلاۋدان وتكەن.
– ادامدارسىز ءبىز ەشتەڭە جاساي المايمىز. سوندىقتان بىزگە جاس ءارى تالانتتى, سونىمەن بىرگە بىلىكتى ماماندار قاجەت. ونەركاسىپتىك ماماندىقتاردى جاس ۇرپاق ءۇشىن قىزىقتى ەتۋ – ءبىزدىڭ العاشقى كەزەكتەگى مىندەتىمىز, – دەيدى ERG اكتسيونەرى الەكساندر ماشكەۆيچ.
اقسۋ قارا مەتاللۋرگيا كوللەدجى 55 جىلدىق مەرەيتويىنا وراي ERG قۇزىرەتتىلىك ورتالىعىن جاڭعىرتۋعا ارنالعان سىيلىق سەرتيفيكاتىنا يە بولدى.
پاۆلودار وبلىسى,
اقسۋ قالاسى