جىلدىق مولشەرلەمەسى 4 پايىزبەن اۆتونەسيە بەرەتىن جەڭىلدەتىلگەن باعدارلاما بيىل 20 قاراشادان باستاپ قايتا جالعاسادى. ونەركاسىپتى دامىتۋ قورىنىڭ حابارلاۋىنشا, قازىر ماماندار پروتسەسس اشىق بولۋ ءۇشىن تەك ونلاين ءوتىنىم قابىلدايتىن ارنايى پورتالدىڭ جۇمىسىن تەكسەرىپ جاتىر. ءوتىنىم بەرۋ الگوريتمى كەيىنىرەك بەلگىلى بولماق.
«ازاماتتارعا رەۆولۆەرلىك جولمەن قايتقان, ياعني جازدا قارىز الىپ, اي سايىن تولەپ وتىرعان تۇرعىنداردان تۇسكەن اقشا بەرىلەدى. سوندىقتان بۇل جولى كوپ ءوتىنىم قابىلدانبايدى. قاراجات تاۋسىلعان سوڭ پورتال جابىلادى دا, ءبىر ايدان كەيىن قايتا قوسىلادى. ول اشىلاتىن كۇندى وپەراتور الدىن الا حابارلايدى», دەلىنگەن اقپاردا.
ءبىرشاما ۋاقىت بۇرىن ونەركاسىپتى دامىتۋ قورى باعدارلاما بويىنشا بيىل 1 قىركۇيەككە دەيىن بانكتەر 13 307 نەسيە ماقۇلداپ, 11 مىڭ ءاۆتوموبيلدىڭ كىلتىن يەلەرىنە بەرگەنىن حابارلاعان بولاتىن. اقشانىڭ رەۆولۆەرلىك جولمەن قايتۋى جىل سايىن 7,7 ملن تەڭگەلىك – 1 858 اۆتو, 10 ملن تەڭگە تۇراتىن 1 430 ماشينا الۋعا مۇمكىندىك بەرەدى. وسىلايشا, 30 جىلدا ەلىمىزدە 60 مىڭعا جۋىق اۆتوكولىك جاڭارادى.
ەسكە سالايىق, جەڭىلدەتىلگەن اۆتونەسيە باعدارلاماسى بيىل ەلىمىزدە 16 مامىردا باستالدى. ونىڭ شارتتارى – پايىزدىق مولشەرلەمەسى 4 پايىزدان اسپايدى, نەسيە سوماسى – 10 ملن تەڭگەدەن ارتىق ەمەس. بۇل رەتتە تۇتىنۋشىلاردان العاشقى تولەم تالاپ ەتىلمەيدى, ال قارىزدى قايتارۋ مەرزىمى 7 جىلدان اسپايدى. ترانسپورت قۇنى 15 ملن تەڭگەدەن ارتىق بولماۋعا ءتيىس.