سەنات توراعاسى ماۋلەن اشىمباەۆ Sensitive بي تەاترىنىڭ ارتىستەرىمەن جانە Ereksheteatr جوباسىنا قاتىسۋشىلارمەن كەزدەستى. بۇل ۇجىمداردىڭ قۇرامىندا نەگىزىنەن سولتۇستىك قازاقستان وبلىسىنداعى ەستۋ قابىلەتى ناشار بالالارعا ارنالعان ارنايى (تۇزەتۋ) مەكتەپ-ينتەرناتىنىڭ تاربيەلەنۋشىلەرى مەن تۇلەكتەرى ونەر كورسەتەدى.
ماۋلەن اشىمباەۆ كەزدەسۋ بارىسىندا بالالاردىڭ شىعارماشىلىعىنا شىن جۇرەكتەن ريزاشىلىعىن ءبىلدىردى جانە تەاتردىڭ كوركەمدىك جەتەكشىسى ولگا روستوۆششيكوۆاعا وسىنداي ماڭىزدى جوبانى تابىستى ىسكە اسىرىپ كەلە جاتقانى ءۇشىن العىس ايتتى. سونداي-اق سەنات سپيكەرى ۇجىمعا ۇنەمى قولداۋ كورسەتىپ وتىرعان قۇرالاي تۇسپەكوۆا باستاعان ۇلتتىق دەلفي كوميتەتىنىڭ جۇمىسىن دا ايرىقشا اتاپ ءوتتى.
– كەدەرگىسىز جانە ينكليۋزيۆتى ورتا قۇرۋعا ىقپال ەتەتىن وسىنداي باستامالاردى مەملەكەت پەن قوعام تاراپىنان قولداۋ اسا ماڭىزدى. مۇنداي جوبالار بالالارعا جەكە جانە شىعارماشىلىق تۇرعىدان دامۋعا, الەۋمەتتىك ورتاعا بەيىمدەلۋگە, سونداي-اق ءوزىن-ءوزى تانىتۋعا مۇمكىندىكتەر بەرەدى. ەرەكشە قاجەتتىلىگى بار بالالاردى ىنتالاندىرۋ ءۇشىن وسىنداي باستامالاردىڭ ماڭىزى زور, – دەدى ماۋلەن اشىمباەۆ.
سونىمەن قاتار سەنات توراعاسى بيىل جەلتوقسان ايىندا ەلوردادا Sensitive بىرەگەي تەاترىنىڭ شىعارماشىلىق كونتسەرتىن ۇيىمداستىرۋعا قولۇشىن بەرەتىنىن ايتتى. سپيكەر استانا قوناقتارى مەن تۇرعىندارىن بالالارعا قولداۋ كورسەتۋگە جانە اتالعان قويىلىمعا قاتىسۋعا شاقىردى.
– Sensitive ەرەكشە تەاترىنىڭ ارتىستەرى وتە دارىندى. ولار ونەرگە دە, ومىرگە دە قۇشتار. مۋزىكانى جان دۇنيەسىمەن سەزىنىپ, جوعارى دەڭگەيدە بيلەيدى. تەاتر ارتىستەرىنە زور دەنساۋلىق, باق-بەرەكە جانە تولايىم تابىس تىلەيمىن. الداعى جوسپارلارىڭىز بەن ارماندارىڭىز ورىندالا بەرسىن, – دەدى ماۋلەن اشىمباەۆ.
ايتا كەتەيىك, جوباعا قاتىسۋشىلار الەمنىڭ ءتۇرلى ەلدەرىندە وتكەن كوپتەگەن بەدەلدى حالىقارالىق بايقاۋلاردا بىرنەشە رەت جەڭىمپاز بولىپ, جۇلدەگەر اتانعان. جاقىندا تەاتر ۇجىمى استانادا رەسپۋبليكا كۇنىنە ارنالعان ماڭىزدى كونتسەرتتىك باعدارلاماعا قاتىسىپ, ءساتتى ونەر كورسەتتى.