ورتالىق ازياداعى ەڭ ءىرى IT-ستارتاپ تەحنوپاركى Astana Hub-تىڭ قۇرىلعانىنا 4 جىل تولدى. وسى ۋاقىت ارالىعىندا ءىت-سالادا تىڭنان تۇرەن سالعان تەحنوپارك يگى ىستەرگە ۇيىتقى بولدى.
Astana Hub قىزمەتى IT-بيزنەس ءۇشىن ەكوجۇيەنى قالىپتاستىرۋعا, IT-تالانتتاردى قولداۋعا جانە ستارتاپ جوبالاردى دامىتۋعا باعىتتالعان. بۇگىنگى تاڭدا Astana Hub-تا 930 IT-كومپانيا تىركەلگەن, ونىڭ ىشىندە 170-ءى شەتەلدىكتەردىڭ قاتىسۋمەن جۇمىس ىستەپ تۇر. ولارعا اقپاراتتىق-وقۋ, ماتەريالدىق ينفراقۇرىلىم, بيزنەستى دامىتۋ باعدارلامالارى, ارنايى سالىقتىق جانە ۆيزالىق تارتىپتەر تۇرعىسىنان قولداۋ كورسەتىلەدى. تەحنوپارك رەزيدەنتتەرى 12 مىڭنان استام جۇمىس ورنىن ۇسىنىپ وتىر.
Astana Hub ىسكە قوسىلعاننان بەرى تەحنوپارك قاتىسۋشىلارىنىڭ جيىنتىق تابىسى 383 ملرد تەڭگەنى قۇراعان. ونىڭ ىشىندە ءىت قىزمەتتەر ەكسپورتى 123,3 ملرد تەڭگەگە تەڭ.
– وتانداستارىمىزدىڭ كوپشىلىگى Astana Hub قاتىسۋشىلارى جاساعان ستارتاپتاردىڭ يگىلىگىن كورىپ جاتىر. بۇل تەحنولوگيالاردى ءتۇرلى سالادان بايقاۋعا بولدى. ماسەلەن, جۇمىستا Documentolog سەرۆيسىنىڭ, قالادا Parqour پاركينگ قىزمەتتەرىنىڭ, CITIX سمارت تاقتالارىنىڭ, UvU قاۋىپسىز تاكسيىنىڭ, «قولجەتىمدى قازاقستان» شەكتەۋلى ادامدارعا ارنالعان قوعامدىق ورىنداردىڭ قولجەتىمدىلىك كارتاسىنىڭ يگىلىگىن كورىپ وتىرمىز. وسىلايشا, Astana Hub قاتىسۋشىلارى قازاقستاندىقتارعا كۇندەلىكتى ومىردە كومەكتەسىپ, قوعامنىڭ دامۋىنا اتسالىسىپ جاتىر, – دەيدى Astana Hub باس ديرەكتورى ماعجان ماديەۆ.
تارتىلعان ينۆەستيتسيا كولەمى بويىنشا ستارتاپتاردىڭ ۇزدىك ۇشتىگى كەلەسىدەي: JET – ءموبيلدى قوسىمشا ارقىلى سكۋتەردى جالعا بەرۋ قىزمەتى; Serebra – نەيروندىق جەلىلەر نەگىزىندە ءينسۋلتتى ەرتە دياگنوستيكالاۋ باعدارلاماسى, جۇيە قازاقستان بويىنشا 20 ينسۋلت ورتالىعىندا قاناتقاقتى رەجىمدە جۇمىس ىستەيدى; ستوگرامما – اۆتوسەرۆيستەردى جانە قوسالقى بولشەكتەردى ىزدەۋ پلاتفورماسى.
2018 جىلدان بەرى Astana Hub بازاسىندا 15 مىڭنان استام ادام Startup School, No-code School, Freelance School, Beta Career, Tech Orda سياقتى ءبىلىم بەرۋ باعدارلامالارىنان وتكەن. سونداي-اق 2 مىڭنان استام ادام Astana Hub اكسەلەراتسيا جانە ينكۋباتسيالاۋ باعدارلامالارىنىڭ تۇلەكتەرى بولىپ سانالادى.
– تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ باستاماسىمەن قولعا الىنعان Tech Orda باعدارلاماسى جەكەمەنشىك باعدارلامالاۋ مەكتەپتەرىنە IT-سالاسىندا جەكە تۇلعالاردى دايارلاۋعا قارجىلىق قولداۋ كورسەتەدى. بىلتىر Astana Hub-تىڭ جەكە قاراجاتى ەسەبىنەن 13 IT-باعدارلامالاۋ مەكتەبىنىڭ 100 ستۋدەنتى قارجىلاندىرىلدى. وسى جىلدىڭ 1 قىركۇيەگىندە ءىت-مەكتەپتەردەن وتىنىمدەردى قابىلداۋ جانە وڭدەۋ باستالىپ, 50 IT-مەكتەبى اككرەديتاتسيادان ءوتتى. قازىر بولىنگەن قارجى اياسىندا وقۋعا قابىلدانعان تۇلعالاردى ىرىكتەۋ جۇمىستارى جۇرگىزىلۋدە. جىل سوڭىنا دەيىن 18 بەن 45 جاس ارالىعىنداعى 3 مىڭنان استام تالاپكەر جەكەمەنشىك IT-مەكتەپتەرىنە تۇسەدى. باعدارلاما اياسىندا ءاربىر باعدارلامالاۋ مەكتەبىنە ءبىر وقۋشىعا 600 مىڭ تەڭگەدەن اسپايتىن قارجى بولىنەدى, – دەيدى م.ماديەۆ.
2025 جىلعا قاراي تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قولداۋىمەن ەلىمىزدىڭ جەتەكشى باعدارلامالاۋ مەكتەپتەرىندە 20 مىڭ ستۋدەنتتى IT-داعدىلارىنا وقىتۋ جوسپارلانعان. Tech Orda باعدارلاماسى مەملەكەت باسشىسى قاسىم-جومارت توقاەۆتىڭ 2025 جىلعا قاراي كەمىندە 100 مىڭ جوعارى ساناتتى IT-مامان دايارلاۋ قاجەتتىگى تۋرالى تاپسىرماسىنا سايكەس جۇزەگە اسىرىلادى.
بىلتىر Scalerator دەپ اتالاتىن العاشقى ەكسپورتتىق اكسەلەراتور ىسكە قوسىلعانى بەلگىلى. باعدارلاما ستارتاپتارعا سولتۇستىك امەريكا, ەۋروپا, تمد ەلدەرى جانە وڭتۇستىك-شىعىس ازيا سياقتى جاڭا نارىقتارعا شىعۋ, بۇكىل الەم بويىنشا كومپانيالارمەن كەلىسىمشارتتار جاساۋ قۇزىرەتتىلىگىن ارتتىرۋعا مۇمكىندىك بەرەدى. باعدارلامانىڭ ءبىرىنشى لەگىنىڭ 10 اپتاسىندا قاتىسۋشىلار 840 مىڭ دوللاردان استام قارجىعا ەكسپورتتىق كەلىسىمشارتتار مەن كەلىسىمدەر جاسادى. بيىل قىركۇيەك ايىندا 40 ستارتاپ ىرىكتەلىپ, ەكىنشى لەگى باستالدى.
سونداي-اق Seed Money باعدارلاماسى اياسىندا 2021 جىلدان باستاپ ستارتاپتار ءوز جوباسىن دامىتۋعا قارجى الا الادى. بۇل ءارتۇرلى كەزەڭدە (MVP, Product/market fit, MVP) ءىت-ستارتاپتارىنا ارنالعان كەشەندى قولداۋ باعدارلاماسى. باعدارلاما بويىنشا قارجىلاندىرۋ revenue share (equity free) مودەلى بويىنشا جۇزەگە اسىرىلادى, ياعني قاراجات يگەرىلگەننەن كەيىن 3 جىل ىشىندە جوبانى ىسكە اسىرۋدان تۇسەتىن كىرىستىڭ 1 پايىزىن تولەۋ مىندەتتەمەسىن بىلدىرەدى. تۇسكەن قاراجات IT-سالانىڭ ەكوجۇيەسىن ودان ءارى دامىتۋعا جۇمسالادى.
– وسى جىلدىڭ ساۋىرىندە Astana Hub حالىقارالىق تەحنوپاركى Google for Startups كومپانياسىمەن سەرىكتەستىك تۋرالى كەلىسىمگە قول قويىپ, كورپوراتسيانىڭ ورتالىق ازيا ايماعىنداعى ءبىرىنشى سەرىكتەسى اتاندى. سەرىكتەستىك اياسىندا ورتالىق ازيا, ازەربايجان جانە موڭعوليا ەلدەرى ءۇشىن Silkway Accelerator باعدارلاماسى ىسكە قوسىلدى. Silkway Accelerator باعدارلاماسىنىڭ ءبىرىنشى لەگى اياسىندا جوبالارىن دامىتۋ مۇمكىندىگىنە يە بولعان 15 ستارتاپتىڭ 13-ءى باعدارلامانى ءساتتى اياقتادى. ولار جاڭا الەمدىك نارىقتارعا شىقتى. اكسەلەراتسيا باعدارلاماسىنا قاتىسۋشىلاردىڭ اراسىندا ءۇش ايدىڭ ىشىندە باعاسىن ەكى ەسە ارتتىرعان كومپانيالار دا, ايلىق تابىسى 22 ەسەگە وسكەن ستارتاپتار دا بار, – دەپ ناقتىلادى تەحنوپارك باسشىسى.
Silkway Accelerator باعدارلاماسىنىڭ ەكىنشى لەگى 2 قىركۇيەكتە باستالدى, وقۋ استانادا وففلاين رەجىمدە وتەدى جانە 3 ايعا سوزىلادى. Silkway Accelerator قاتىسۋشىلارى تالىمگەرلىكپەن قاتار, Astana Hub جانىندا تەگىن باسپاناعا, جۇمىس ورنىنا جانە Seed Money باعدارلاماسى بويىنشا 55 مىڭ دوللارعا دەيىن قارجى الۋ مۇمكىندىگىنە يە.
ءداستۇرلى تۇردە كوپتەگەن پانەلدىك سەسسيالار, تەحنوپاركتەر كورمەسى, IT-ستارتاپتار اللەياسى, IT-مەكتەپتەر كورمەسى, IT-بوس ورىندار جارمەڭكەسى, Astana Hub Battle بايقاۋى جانە تاعى وسى سەكىلدى دۇنيەلەر ۇيىمداستىرىلاتىن Digital Bridge تسيفرلاندىرۋ حالىقارالىق فورۋمى تەحنوپارك قىزمەتىندە ەرەكشە ورىنعا يە. بيىلدىڭ وزىندە بۇل فورۋم الاڭىندا الەمنىڭ 15 ەلىنەن 25 مىڭعا جۋىق قاتىسۋشى, 300 IT-كومپانيا, 150 ۆەنچۋرلىق ينۆەستور, 300-دەن استام سپيكەر جانە 100 ستارتاپ باس قوسىپ, ورتالىق ازيا ەلدەرىن بىرىكتىرگەن ەڭ ءىرى IT-پلاتفورماعا اينالدى.
ءارتۇرلى ءىس-شارالار دا تۇراقتى تۇردە وتكىزىلەدى. ولاردىڭ قاتارىندا Pizza Pitch, Speaker Night, Startaphana سەكىلدى ءىس-شارالاردى اتاپ وتۋگە بولادى. 2018-2022 جىلدارى جالپى سانى 50 مىڭنان استام تىڭداۋشىنى قامتىعان 1 مىڭنان استام ءىس-شارا وتكىزىلگەن ەكەن.
ەسكە سالا كەتەيىك, Astana Hub حالىقارالىق IT-ستارتاپتار تەحنوپاركى 2018 جىلدىڭ 6 قاراشاسىندا قۇرىلدى. ونىڭ قىزمەتى – قاتىسۋشىلارعا اكسەلەراتسيا قىزمەتتەرىن, تەحنولوگيالىق بيزنەس-ينكۋباتسيالاۋدى ۇسىنۋ, كونسالتينگتىك, اقپاراتتىق, اناليتيكالىق, ءبىلىم بەرۋ, ماركەتينگتىك ءىس-شارالاردى وتكىزۋ ارقىلى قاتىسۋشىلاردىڭ دامۋىنا جاعداي جاساپ, يننوۆاتسيالىق ەكوجۇيەنى جەتىلدىرۋ.