وڭىردە قاتال قىستىڭ سىنىنا قاپىسىز دايىندىق جاسالىپ, قازاندىقتارعا قاجەتتى وتىن مەن كومىر كۇنى بۇرىن مەجەلەنگەن جوسپار بويىنشا جەتكىزىلىپ جاتىر.
قىسى ۇزاق وڭىردە وتىندى ەرتەرەك قامداپ العان ابزال. ارقانىڭ اپتالاپ سوعاتىن اق بورانى مەن ۇسكىرىك ايازى ارقانى كەڭگە سالۋعا مۇمكىندىك بەرە قويمايتىنىن ەل جاقسى بىلەدى. وبلىسقا قىسقى ماۋسىمعا قاجەتتى كومىر كولەمى 1 ملن 321 مىڭ توننانى قۇرايدى. كەي جىلدارى قازاندىققا قاجەتتى كومىر مەن مازۋت ۋاقتىلى جەتكىزىلمەي, ەلدىڭ ارقاسىن اياز قارىعانداي الاڭدايتىن ۋاقىتى دا بولعان. قاتال قىس جايباسارلىقتى كەشىرمەيدى. سوڭعى جىلدارى بۇل تاراپتا اۋقىمدى قيىندىق بولا قويعان جوق. بيىل دا ەرتەرەك قامدانعاندىقتان, قاجەتتى قور ۋاقتىلى جيناقتالۋدا. وبلىستىڭ كوممۋنالدىق سالاسىنا 490 مىڭ توننا كومىر قاجەت بولسا, بۇگىنگە دەيىن ونىڭ 57 پايىزى جەتكىزىلدى. بيۋدجەتتىك سالالار دا تىڭعىلىقتى دايىندالدى. ءوڭىردىڭ ءبىلىم بەرۋ, دەنساۋلىق ساقتاۋ, الەۋمەتتىك جانە كوممۋنالدىق سالالارىنا ەنەرگيا رەسۋرستارىن قاجەتىنشە جەتكىزۋ ءۇشىن الدىن الا كەلىسىمشارتتار جاسالعان. بۇل جۇمىس الدىن الا تۇزىلگەن كەستە بويىنشا جۇرگىزىلىپ كەلەدى. قازىر قازاندىقتاردا ەكى ايعا ەركىن جەتەتىن وتىن قورى بار. جوعارىدا ايتقان سالالارعا جىلىتۋ ماۋسىمىنا جوسپار بويىنشا 118,4 مىڭ توننا قاجەت بولاتىن بولسا, 117,1 مىڭ توننا كومىر جەتكىزىلگەن.
وبلىس ورتالىعىن جىلۋمەن قامتاماسىز ەتەتىن «كوكشەتاۋ جىلۋ» مەكەمەسىنىڭ 20 كۇندىك قاجەتتىلىگى 40 مىڭ توننا بولسا, قازىر مۇندا 50 مىڭ توننا قور بار. ستەپنوگور جىلۋ ەلەكتر ورتالىعىنا 20 كۇنگە 52 مىڭ توننا كومىر قاجەت بولسا, ءدال قازىر 157 مىڭ توننا كومىر جەتكىزىلگەن. مازۋت قورى دا جەتكىلىكتى.
ەندىگى ءبىر ماسەلە, وڭىردەگى جەكە تۇرعىن ۇيلەردى قاجەتتى كومىرمەن قامتاماسىز ەتۋ. بۇل تاراپتا بىلتىر ءبىرشاما قيىندىق ورىن العان بولاتىن. كوپشىلىك جاقسى جاناتىن, ك ۇلى از قالاتىن شۇباركول كومىرىن العىسى كەلەدى. كومىردىڭ بۇل ءتۇرى ۋاقىتىندا جەتكىزىلمەي, كومىر قويمالارىندا كەپتەلىس پايدا بولىپ, كەيىستىك تۋىنداعان. بيىل مۇنداي كەلەڭسىز كورىنىس ورىن العان جوق. جەكەمەنشىك ءۇي يەلەرىنە شامامەن 831 مىڭ توننا كومىر قاجەت. كۇزدىڭ العاشقى ايلارىندا-اق حالىققا قاجەتتى كومىر ۋاقتىلى جەتكىزىلە باستادى دا, ءوڭىر تۇرعىندارى ءوز قاجەتتىلىكتەرىن الىپ, قىستان قىسىلمايتىنداي جاعداي تۋىندادى. قازىر ءجۇز مىڭنان استام تۇرعىن ءۇيدى قامتاماسىز ەتۋگە قاجەتتى كومىردىڭ 65 پايىزى جەتكىزىلدى.
بيىل تۇرعىندار تاراپىنان وكپە-نازدىڭ تۋىنداماۋىنا اسەر ەتكەن تاعى ءبىر جاي بار. وبلىس اكىمدىگى يندۋستريا جانە ينفراقۇرىلىمدىق دامۋ مينيسترلىگىمەن, «قازاقستان تەمىر جولى» اكتسيونەرلىك قوعامىمەن, كومىر وندىرەتىن كاسىپورىندارمەن بىرلەسە وتىرىپ, ءوڭىر تۇرعىندارىنا قاجەتتى كومىردى ۋاقتىلى تاسىمالداۋعا قول جەتكىزدى. كومىر تاسۋمەن اينالىساتىن 62 وپەراتور وبلىس قالالارى مەن 16 اۋداندى قامتاماسىز ەتتى. ءۇش ايدىڭ ىشىندە سالماعى 485 مىڭ توننا بولاتىن 6 992 ۆاگون كومىر جەتكىزىلدى. ونىڭ ىشىندە تۇرعىندار تاراپىنان سۇرانىسقا يە بولىپ وتىرعان شۇباركول كومىرىنىڭ 160 مىڭ تونناسى بار. قازىر كومىر ساتاتىن بازالاردا 55 مىڭ توننا كومىر بار. وبلىس ورتالىعىندا 3 مىڭ توننادان استام كومىر جيناقتالعان. قاجەت ەتكەن ادامدار وزدەرىنە قولايلى ۋاقىتتا ساتىپ الا الادى.
ءبىر جاقسىسى, بيىل كومىر باعاسى ايتارلىقتاي قىمباتتاعان جوق. قازان ايىندا تەمىر جولمەن تاسىمالداۋ ءتاريفىنىڭ وزگەرۋىنە بايلانىستى 4 پايىزدىق ۇستەمە قوسىلىپ, شۇباركول كومىرىنىڭ ءار تونناسى 16 100 تەڭگە بولدى. قاراجىرا, مايكوبە كومىرلەرىنىڭ قۇنى دا بىلتىرعى دەڭگەيمەن شامالاس.
قىتىمىر قىستا قىسىلماۋ ءۇشىن ءتيىستى ورىندار ءوز ءىسىن تىندىرىمدى اتقارىپ, بار شارۋانى ۋاقتىلى ۇيلەستىرۋدە.
اقمولا وبلىسى