كەشە الماتىدا وتكەن تمد مەملەكەتتەرى سالىق (قارجى) تەكسەرۋ ورگاندارى باسشىلارى ۇيلەستىرۋ كەڭەسىنىڭ ءحىى وتىرىسىنا قاتىسۋشىلار سىبايلاس جەمقورلىققا قارسى ءبىزدىڭ ەلىمىزدەگى كۇرەس ءتاجىريبەسىن بۇرىنعى كەڭەستىك كەڭىستىكتەگى ەڭ جاقسىلاردىڭ ءبىرى دەپ تانىدى. ەكى كۇنگە سوزىلاتىن بۇل ساليقالى فورۋمعا قازاقستاننىڭ, رەسەيدىڭ, ءازىربايجاننىڭ, ارمەنيانىڭ, بەلارۋستىڭ, قىرعىزستاننىڭ, لاتۆيانىڭ, مولدوۆانىڭ, تاجىكستاننىڭ, ۋكراينا مەن ەستونيانىڭ قۇقىق قورعاۋ قىزمەتتەرىنىڭ وكىلدەرى قاتىسۋدا.
قازاقستان رەسپۋبليكاسىنىڭ ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ورىنباسارى اندرەي لۋكيننىڭ سوزىنە قاراعاندا, قازاقستاننىڭ قارجى پوليتسياسى اكادەمياسى سىبايلاس جەمقورلىقپەن, ەكونوميكالىق جانە سالىق قىلمىستارىمەن كۇرەس جونىندەگى بولىمشەلەر ءۇشىن بىلىكتى كادرلار دايارلاۋ ورايىنداعى بازالىق وقۋ ورنىنا اينالعان. مۇندا قازىردىڭ وزىندە رەسەيدەن, بەلارۋستان, قىرعىزستاننان, مولدوۆا مەن ۋكراينادان كۋرسانتتار كەلىپ ءتالىم الىپ كەتكەن.
رەسەي فەدەراتسياسى ىشكى ىستەر مينيسترىنىڭ ورىنباسارى ەۆگەني شكولوۆ قازاقستاندىق قارجى پوليتسياسىنىڭ سىبايلاس جەمقورلىق پەن ەكونوميكالىق قىلمىستارعا قارسى پارمەندى ارەكەت ەتۋدەگى ەلەۋلى تابىستارىن اتاپ ءوتتى. ونىڭ ايتۋىنشا, تمد ەلدەرىنىڭ قۇقىق قورعاۋ ورگاندارى قازاقستان رەسپۋبليكاسىنىڭ كولەڭكەلى ەكونوميكا ۇلەسىن كەمىتۋ جونىندەگى وزىق تاجىريبەسىن قابىلداپ الىپ, كوررۋپتسياعا قارسى مونيتورينگتىڭ وڭىرلىك تەتىكتەرىن جاساۋلارى, لاڭكەستىكتى قارجىلاندىرۋعا جانە اقشانى جاسىرىپ-جابۋعا قارسى كۇرەستەگى ءىس-قيمىل بىرلىگىن نىعايتا تۇسۋلەرى قاجەت.
قورعانبەك امانجول.