اقتوبەدە ەرەكشە قاجەتتىلىگى بار بويجەتكەندەر اراسىندا سۇلۋلىق سىنى ءوتتى. وعان تالانتتى, سۇلۋ, ءبىلىمدى, قولدارىنان ونەرى توگىلگەن ارباداعى جەتى ارۋ قاتىستى. ناتيجەسىندە, قاتاڭ سىناقتاردان ءوتىپ, ىرىكتەلگەن ۇمىتكەرلەردىڭ اراسىنان باس بايگە گۇلفايرا رامازانوۆاعا بۇيىردى.
كوز تارتارلىقتاي ادەمى قازاقتىڭ ۇلتتىق كيىمدەرىن كيىپ شىققان بيكەشتەر قازىلار الدىندا وزدەرىن تانىستىرىپ, قول جەتكىزگەن جەتىستىكتەرى تۋرالى بايانداپ, ونەرلەرىن ورتاعا سالدى.
ايتا كەتۋ كەرەك, اقتوبەدە ارباعا تاڭىلعان بيكەشتەر اراسىندا سۇلۋلىق كونكۋرسى 1999 جىلدان بەرى جىل سايىن وتكىزىلىپ كەلەدى. وسى ۋاقىت ارالىعىندا قيىندىقتارعا مويىنسۇنباي, تابيعي سۇلۋلىعىمەن جانە ەڭبەكقورلىعىمەن بەلگىلى ءبىر سالادا جەتىستىككە جەتكەن قانشاما قىزدار تانىلدى. بۇگىنگى كۇنى ولاردىڭ دەنى ومىردەن ءوز ورىندارىن تاپتى. سولاردىڭ ءبىرى 1999 جىلى وتكىزىلگەن سۇلۋلىق كونكۋرسىنىڭ جۇلدەگەرى – ۆيكتوريا كۆاشا. ول بيىلعى سايىستا ۇزدىك شىققان گۇلفايرا رامازانوۆاعا مىسىرعا ساياحاتقا ارنالعان ەكى ادامدىق جولدامانى تاپسىرىپ تۇرىپ, ءومىر جولىنداعى وزگەرىستەر تۋرالى باياندادى.
سۇلۋلىق سايىسىنا قاتىسىپ, ەل الدىنا شىققاننان كەيىن تانىمالدىققا يە بولعان ۆيكتوريا بۇگىندە اقتوبە قالاسىنداعى قازاق ءتىلىن تەرەڭدەتىپ ۇيرەتەتىن ورتالىقتىڭ باسشىسى. ونىڭ ايتۋىنشا, ەرەكشە قاجەتتىلىگى بار جاندار ءوز – وزدەرىن شەتتەتپەي, بارىنشا اشىق-جارقىن بولىپ, ادامدارمەن رياسىز قارىم-قاتىناس ورناتا بىلسە, جەتىستىكتىڭ كىلتى وسىندا. بۇل جولى سۇلۋلىق سايىسىنا گۇلفايرامەن بىرگە قاتىسقان التى قىز دا سىيلىقسىز قالعان جوق. ولار وسىنداي سايىستار ەرەكشە جانداردىڭ بويىنداعى اشىلماعان قابىلەتتى تانىتىپ, قوعامدا ءوز ورىندارىن تابۋعا جول اشادى دەپ ەسەپتەيدى.
اقتوبە وبلىسى