«دوستىقتا» جايلى مەكتەپ سالىنادى

وبلىس ورتالىعىنىڭ وڭتۇستىك-شىعىسىندا بۇگىندە «دوستىق» اتتى جاڭا شاعىن اۋدان قارقىندى سالىنۋدا. قازىرگى كۇنگە دەيىن بۇل اۋماقتا 6 تۇرعىن ءۇي پايدالانۋعا بەرىلىپ, 500-گە جۋىق وتباسى جاڭا پاتەرلەرگە قونىستانعان. اۋداندا تاعى 8 كوپقاباتتى ءۇيدىڭ قۇرىلىسى اياقتالۋعا جاقىن. پاۆ­لو­دار قالاسى اكىمدىگىنىڭ ءباس­پا­سوز قىزمەتى حابارلاعانداي, بۇل ۇيلەردىڭ التاۋى جىل سوڭىنا دە­يىن «شاڭىراق» جانە «باقىتتى وت­با­سى» باعدارلامالارى اياسىندا تاپ­سىرىلماق.

وبلىس اكىمى ابىلقايىر سقا­قوۆ جاڭا شاعىن اۋداندا سا­لى­نىپ جاتقان تۇرعىن ءۇي قۇ­رى­­­لىسىنىڭ ستاندارتتارىن بى­رىز­­دەندىرۋ كەرەك دەپ سانايدى. بارلىعى «دوستىق» شاعىن اۋدا­نىندا 8 مىڭعا جۋىق پاتەر تۇر­عىزىلىپ, 20-25 مىڭ ازاماتتى باسپانامەن قامتاماسىز ەتۋ جوسپارلانعان. تۇرعىن ۇيلەردەن باسقا شاعىن اۋداندا قاجەتتى الەۋمەتتىك ينفراقۇرىلىمدار قاراستىرىلعان. اتاپ ايتقاندا, ارقايسىسى 1 200 ورىندىق ەكى بالاباقشا, 2 مىڭ ورىندىق ەكى مەكتەپ, مەديتسينالىق, سپورتتىق مەكەمەلەر مەن رەكرەاتسيالىق ايماقتار. جاڭا تۇرعىن ءۇي سالۋ كەزىندە مەردىگەرلەر كەدەرگىسىز ورتا قۇرۋعا ءمان بەرۋدە. كوپقاباتتى ۇيلەردىڭ كىرەبەرىستەرى پاندۋس­تار­مەن جابدىقتالادى, ال جاڭا عيماراتتاردىڭ ىشىندەگى تا­­­­بال­دىرىقتار كەڭەيتىلەدى. قۇرىلىسشىلار اتا-انالاردىڭ دا مۇددەلەرىن ەسكەرۋى كەرەك. مى­سالى, سالىنىپ جاتقان ۇيلەر­دىڭ ءبىرازىندا سابيلەرگە ارنالعان اربالاردى ورنالاستىرۋ بولمەسى قاراستىرىلعان.

«دوستىق» شاعىن اۋدانىنىڭ جوبالىق اۋقىمى 95 گەكتاردى قۇرايدى. تۇرعىن ۇيلەر ءۇش كەزەڭ بويىنشا سالىنىپ جاتىر. قازىرگى ۋاقىتتا ءبىرىنشى كەزەڭنىڭ قۇ­رى­لى­سى قارقىندى جۇرگىزىلۋدە. پاۆ­لودار قالاسىنىڭ اكىمى اسايىن بايحانوۆتىڭ سوزىنە قارا­عان­دا, مۇن­­دا №15, 16, 17 تۇرعىن ۇي­لەر سا­لىنىپ بولىپ قالعان. عي­ما­­رات­تارعا جىلۋ, سۋ جانە ەلەكتر جا­رىعى جەلىلەرى تارتىلىپ, پا­تەر­لەردىڭ ىشىندە ارلەۋ جۇ­مىس­تا­رى جۇرگىزىلۋدە. ءۇي اۋلالارىن اباتتاندىرۋ, اسفالت پەن جاياۋ جۇرگىنشىلەر جولىن توسەۋ سەكىلدى شارالار مارەسىنە جەتتى.

ال وبلىستىق قۇرىلىس باسقار­ماسىنىڭ باسشىسى قادىلجان ساتيەۆ باس جوسپارعا سايكەس, اتال­عان شاعىن اۋدانداعى 65 بلوك-سەكتسيادا 12 قاباتتى ۇيلەر جانە تاعى التى اۋماقتا 16 قاباتتى ۇيلەر ورنالاساتىنىن ايتادى. اۋداندا بالالار جانە ەرەسەكتەر ەمحاناسى, سونداي-اق مۇز سارايى سالىنادى دەپ جوسپارلانعان. بۇعان قوسا 6 فۋتبول الاڭى مەن 10 بالالاردىڭ ويىن الاڭى جابدىق­تال­ماق.

ايماقتىڭ 2022 جىلعى بيۋد­جە­تىن ناقتىلاۋ شارالارى اياسىندا بۇعان دەيىن مەملەكەت-جە­كەمەنشىك ارىپتەستىگى اياسىندا قول­عا الىنعان بىرقاتار جو­با­نى ۇلتتىق باعدارلامالار اياسىندا جۇزەگە اسىرۋ كوزدەلىپ وتىر. سونىڭ ءبىرى – «دوستىق» شاعىن اۋدانىندا بوي كوتەرەتىن جاڭا مەكتەپ. وڭىرلىك ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى يرينا نازارچۋك «مەملەكەت-جەكەمەنشىك ارىپتەستىگى تۋرالى» زاڭنىڭ 24-بابىنا سايكەس وقۋ ورنىنىڭ قۇرىلىسىن «جايلى مەكتەپ» ۇلتتىق جوباسىنا اۋىس­تىرۋ تۋرالى ماسەلەنى وبلىس­تىق ءماسليحاتتىڭ سەسسياسىندا كوتەرىپ, ۇسىنىس دەپۋتاتتار تارا­پىنان قولداۋ تاپتى. الداعى ۋاقىتتا ءبىلىم ورداسى جاڭا ستان­دارت­تارعا نەگىزدەلىپ سالىناتىنى اۋدانعا قونىستانعان اتا-انالاردى ايرىقشا قۋانتىپ وتىر.

«دوستىقتان» پاتەرلى بولعان جانار سەمەەۆا ەكى بالاسىنىڭ «ۋسولكا» شاعىن اۋدانىنداعى №25 مەكتەپتە وقيتىنىن ايتادى.

– ءبىز تۇراتىن اۋماق قالا ورتا­­لى­عىنان شەتكەرىرەك, اۋەجاي­عا قاراي ورنالاسقان. ينفراقۇ­رىلىمدار قولجەتىمسىز, الەۋمەت­تىك نىساندار دا ەندى-ەندى سالىنا باس­تادى. ىرگەمىزدەگى «ساياجاي» شا­عىن اۋدانىنداعى مەكتەپ ۇناماعاندىقتان «ۋسولكاداعى» قازاق مەكتەبىنە بالالارىمىز بارىپ-كەلىپ وقىپ ءجۇر. ەندى وزىمىزدە اشىلاتىن ءبىلىم ورداسى مەملەكەتتىك تىلدە ءبىلىم بەرە­تىن وقۋ ورنى بولادى دەگەن سەنى­مى­مىز زور. سەبەبى بۇل اۋماقتا تۇرا­تىن­داردىڭ بارلىعى دەرلىك – ءوزىمىزدىڭ قاراكوزدەرىمىز. مەكتەپ ىسكە قوسىلسا, بالالارىمىزعا بۇ­رىن­­عىداي الاڭدامايتىن بولامىز, – دەيدى انا.

جاڭا اۋدانداعى تۇرعىن ۇيلەر مەن الەۋمەتتىك نىسانداردى ساپالى جىلۋمەن قامتاماسىز ەتۋ شارا­لارى دا قازىردەن قولعا الىنۋدا. بىلتىر مۇندا تم-42 جىلۋ ماگيسترالى سالىنعان. قالانىڭ وڭتۇستىك بولىگىندەگى جىلۋ توراپ­تا­رىنىڭ گيدراۆليكالىق رەجىمىن جاقسارتۋعا ارنالعان نىسان ءۇشىن سورعى ستانساسى دا تۇرعىزىلدى. الايدا ونىڭ قۋاتتىلىعى جەت­پەي­تىنى بەلگىلى بولىپ, اۋماقتا بيىل تاعى ءبىر رەزەرۆتىك ستانسا قۇ­رىلىسى باستالعان. قازىر مۇندا جابدىقتاردى ورناتۋ شارالارى جالعاسۋدا.

پاۆلودار