ۇلتتىق بانك قازاقستاندىقتارعا ەسكەرتۋ جاسادى

قازاقستان ۇلتتىق بانكى مەن قۇب تولەم جانە قارجىلىق تەحنولوگيالاردى دامىتۋ ورتالىعى (تقتدو) «تسيفرلىق تەڭگە جوباسىنا ينۆەستيتسيا» سالۋعا جارنامالايتىن الاياقتاردىڭ سايتتارى پايدا بولعانى تۋرالى ەسكەرتەدى.

رەسمي مالىمدەمەدە «تسيفرلىق تەڭگە» جوباسى ازاماتتاردان ينۆەستيتسيا تارتپايتىنى ايتىلعان. 

 ول تولەمدەر مەن اقشا اۋدارىمدارى سالاسىندا قازاقستاننىڭ ۇلتتىق ۆاليۋتاسى ءۇشىن جاڭا مۇمكىندىكتەر اشۋعا باعىتتالعان.

ايتا كەتەيىك, تسيفرلىق تەڭگە قازىر ازىرلەۋ جانە سىناقتان وتكىزۋ كەزەڭىنەن ءوتىپ جاتىر. جوسپار بويىنشا ۇلتتىق تسيفرلىق ۆاليۋتانى ەنگىزۋگە قاتىستى تۇپكىلىكتى شەشىم وسى جىلدىڭ سوڭىنا دەيىن قابىلدانادى.

ازاماتتاردىڭ جەكە دەرەكتەرى مەن قاراجاتىن قولدى قىلۋ ءۇشىن الاياقتار تسيفرلىق تەڭگە جوباسى بويىنشا جالعان ۆەب-سايتتار مەن الەۋمەتتىك جەلىلەردە پاراقشالار اشىپ جاتىر. ۇلتتىق بانك مۇنداي ينتەرنەت-رەسۋرستارعا سەنبەۋگە, جەكە باستىڭ جانە بايلانىس دەرەكتەرى كورسەتىلگەن كەز كەلگەن بلانكتى تولتىرماۋعا شاقىرادى. ەگەر جەكە دەرەكتەردى جىبەرىپ قويعان بولساڭىز, دەرەۋ قۇقىق قورعاۋ ورگاندارىنا حابارلاسۋ كەرەك.

تسيفرلىق تەڭگە جوباسى تۋرالى رەسمي اقپارات كوزى مىنالار: تقتدو – payfintech.kz سايتى, قازاقستان ۇلتتىق بانكى – nationalbank.kz ينتەرنەت-رەسۋرسى. باسقا سايتتاردىڭ, سونىڭ ىشىندە «.kz» دومەندىك كەڭىستىگىنەن تىس تىركەلگەن سايتتاردىڭ بۇل جوباعا ەش قاتىسى جوق. وسىعان قاتىستى باسقا دا كەڭەستەردى ۇلتتىق بانكتىڭ 1477 بايلانىس ورتالىعىنان الۋعا بولادى.

ورتالىق بانكتەردىڭ تسيفرلىق ۆاليۋتالاردى ازىرلەۋ ماسەلەسى ءجيى ايتىلا باستاعاندىقتان, ورتالىق بانكتەر مەن جالپى قوعامنىڭ بۇل تاقىرىپقا قىزىعۋشىلىعى ارتىپ كەلە جاتقاندىقتان, تسيفرلىق تەڭگەنىڭ بۇقارالىق اقپارات قۇرالدارىندا كوپ كوتەرىلۋىنەن – مۇنداي جالعان جارنامالار شەتەلدىك ورتالىق بانكتەر جاساپ جاتقان تسيفرلىق ۆاليۋتالارعا دا قاتىستى بەلگىلى ءبىر جيىلىكپەن شىعىپ جاتاتىنىن اتاپ وتكىمىز كەلەدى. مىسالى, شۆەتسيا ورتالىق بانكىنىڭ تسيفرلىق ۆاليۋتاسى – e-krona, قىتاي حالىق بانكىنىڭ – e-CNY جانە باسقا دا جوبالارى الاياقتاردىڭ ارەكەتىمەن بەتپە-بەت كەلگەن بولاتىن.