قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ پاكىستان يسلام رەسپۋبليكاسىنان كەلگەن دەلەگاتسيا مۇشەلەرىمەن كەزدەستى. , دەپ جازادى Egemen.kz.
دەلەگاتسيانى فەدەرالدى ينۆەستيتسيالار ءمينيسترى چاۋدري ساليك حۋسەين مەن ەنەرگەتيكا ءمينيسترى مۋساديك ماسۋد ماليك باستاپ كەلدى. كەزدەسۋ بارىسىندا ەكى تاراپ ينفراقۇرىلىم, مۋلتيمودالدى تاسىمالدار, تەمىرجول قاتىناسى, حالىقارالىق اۆتوموبيل كولىگى دالىزدەرى, اۋە تاسىمالى جانە قورعانىس-ونەركاسىپ كەشەنىن دامىتۋ سالاسىنداعى ىنتىماقتاستىق ماسەلەلەرىن تالقىلادى.
«SCAT اۋەكومپانياسى الماتى – كاراچي جانە الماتى – لاحور باعىتتارى بويىنشا تۇراقتى رەيستەر اشۋدى جوسپارلاپ وتىر. وسى رەتتە اۋەكومپانيا پاكىستاننىڭ اۆياتسيالىق بيلىگىنە رەيستەردى جۇزەگە اسىرۋعا بايلانىستى ءوتىنىم بەردى», دەپ اتاپ ءوتتى يدم باسشىسى.
سونداي-اق قازاقستاندىق تاراپ وتاندىق كومپانيالاردىڭ پاكىستانعا حيميالىق ءونىم تۇرلەرىن جەتكىزۋ ەكسپورتىن ۇلعايتۋعا مۇددەلى ەكەندىگىن اتاپ ءوتتى.
ءوز كەزەگىندە پاكىستان تاراپى ءوز پورتتارىن, اتاپ ايتقاندا اراب تەڭىزىنىڭ جاعالاۋىنداعى كاراچي تەڭىز پورتىن جانە پەشاۆار, يسلاماباد جانە باسقا دا ءىرى قالالارمەن اۆتوموبيل جانە تەمىر جولدارمەن بايلانىسقان لاحور قۇرعاق پورتىن پايدالانۋ مۇمكىندىكتەرى تۋرالى حاباردار ەتتى.
ەكى تاراپ كولىك سالاسىنداعى ىنتىماقتاستىق جونىندەگى قازاقستان-پاكىستان بىرلەسكەن جۇمىس توبىنىڭ ەكىنشى وتىرىسى شەڭبەرىندە ىنتىماقتاستىق ماسەلەلەرىن ودان ءارى ەگجەي-تەگجەيلى قاراۋعا ۋاعدالاستى.
كەزدەسۋ قورىتىندىسى بويىنشا تاراپتار ەكى ەل اراسىنداعى ءوزارا ءتيىمدى ىنتىماقتاستىقتى ودان ءارى ارتتىرۋ ءۇشىن زور الەۋەتتىڭ بار ەكەندىگىن اتاپ ءوتىپ, ۋاعدالاستىقتاردى ديپلوماتيالىق ارنالار ارقىلى راستاۋعا كەلىستى.