تۇركى مەملەكەتتەرى ۇيىمىنىڭ ءرولى ارتىپ كەلەدى. بۇل تۋرالى مەملەكەت باسشىسى تۇركى مەملەكەتتەرى ۇيىمى سامميتىندە سويلەيتىن سوزىندە ايتتى, دەپ حابارلايدى Egemen.kz.
«بۇگىندە تۇركى مەملەكەتتەرى ۇيىمىنىڭ حالىقارالىق ءرولى ارتىپ كەلەدى. ءبىز تۇركى الەمىنىڭ اتاجۇرتى رەتىندە وزدەرىڭىزبەن جان-جاقتى قارىم-قاتىناستى دامىتۋعا ايرىقشا ءمان بەرەمىز. سوندىقتان, ىقپالداستىعىمىزدى ودان ءارى نىعايتۋعا جانە ونى جاڭا بەلەسكە كوتەرۋگە مۇددەلىمىز», دەدى پرەزيدەنت.
مەملەكەت باسشىسى سونداي-اق تۇركى ىنتىماقتاستىعى ۇيىمدارىنىڭ كوپشىلىگىنە قازاقستان باستاماشى بولعانىن اتاپ ءوتتى.
«تۇركى ىنتىماقتاستىعىنا ۇيىتقى بولعان ۇيىمداردىڭ تاريحىن زەردەلەسەك, ولاردىڭ كوپشىلىگىنە قازاقستان باستاماشى بولعانىن كورەمىز. تۇركسوي, تۇركپا جانە تۇركى اكادەمياسى – سونىڭ ايقىن دالەلى. بۇل ۇيىمدار باۋىرلاس ەلدەردىڭ مادەني-رۋحاني جاقىنداسۋىنا ولشەۋسىز ۇلەس قوسىپ وتىر», دەدى ق.توقاەۆ.