بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ادۆوكاتتارى №2 سارىارقا سوتىنىڭ ۇكىمىنە اپپەلياتسيالىق شاعىم ءتۇسىردى, دەپ حابارلايدى Egemen.kz.
بۇگىن بۇرىنعى ءمينيستردىڭ ادۆوكاتتارى سەرىك ساعاليەۆ پەن دميتري كۋرياچەنكو الدىن الا اپپەلياتسيالىق شاعىم ءتۇسىردى. قالعان قورعاۋشىلار دا جوعارى تۇرعان ساتىعا, ياعني استانا قالالىق سوتىنا قۇجات تاپسىرماقشى.
دميتري كۋرياچەنكونىڭ ايتۋىنشا, ۇكىمگە نارازىلىق ءبىلدىرۋ مەرزىمى 12 قاراشادا اياقتالادى. ەلجان ءبىرتانوۆ «لاۋازىمدىق وكىلەتتىكتەردى تەرىس پايدالاندى» دەگەن ۇكىممەن كەلىسپەگەن.
ەسكە سالا كەتسەك, 28 قازاندا استانا قالاسىنىڭ №2 سارىارقا سوتىندا ەكس-مينيستر ەلجان ءبىرتانوۆ پەن ەكس-ۆيتسە-مينيستر ولجاس ابىشەۆتىڭ ۇكىمى جاريالاندى. سوت ءبىرتانوۆتى سانيتارلىق اۆياتسيانىڭ اۋە كەمەسىن پايدالانۋ ەپيزودى بويىنشا كىناسىز دەپ تاپتى. الايدا سوت ەكى سوتتالۋشى دا لاۋازىمدىق وكىلەتتىكتەرىن اسىرا پايدالاندى دەپ سانادى. سۋديا اتاپ وتكەندەي, ابىشەۆ پەن ءبىرتانوۆ جۇمىس ىستەمەيتىن پلاتفورماعا قاتىستى ورىندالعان جۇمىستار اكتىسىنە قول قويعان.