ەۋرازيالىق ەكونوميكالىق وداق ءبىز ءۇشىن ۇلكەن مۇمكىندىكتەرگە جول اشادى

استانا. 28 مامىر. ەۋرازيالىق ەكونوميكالىق ىقپالداستىق سولتۇستىك قازاقستان وبلىسى كاسىپكەرلەرىنىڭ تابىسىن ەسەلەي تۇسۋدە. بۇل تۋرالى «24kz» حابارلادى. سولتۇستىك قازاقستان وبلىسىندا ءبىر جىلدا 450 مىڭ توننا ءسۇت وڭدەلەدى. بۇدان ءبىز ايماقتىڭ كاسىپكەرلەرىنىڭ جۇمىسى قارقىن العانىن اڭعارامىز. وسى ارادا ەرەكشە توقتالا كەتەر ءجايت, پەتروپاۆلداعى ءسۇت زاۋىتىنان شىعارىلعان ءونىمنىڭ 30 پايىزىن كورشى رەسەي ەلى ساتىپ الادى. بۇگىندە وسى زاۋىتتا  220 ادام تۇراقتى تۇردە جۇمىسپەن قامتىلعان. ولار تاۋلىگىنە 300 توننا تازا ءونىم شىعارادى. زاۋىت ديرەكتورى روزا سۇلەيمەنوۆا: «ەڭ باستىسى, ءسۇتتىڭ ساپاسىنا نازار اۋدارامىز. ءونىمدى وبلىس كولەمىندەگى شاعىن قوجالىقتاردان, ءىرى كاسىپورىنداردان الامىز. باسەكەدەن قورىقپايمىز. ەۋرازيالىق ەكونوميكالىق وداق ءبىز ءۇشىن ۇلكەن مۇمكىندىكتەرگە جول اشىپ بەرىپ وتىر», – دەدى. بۇل ءوندىرىس ورنى «ۇدەمەلى يندۋستريالدى-يننوۆاتسيالىق دامۋ» باعدارلاماسى بويىنشا سوڭعى ۇلگىدەگى تەحنولوگيامەن جابدىقتالعان. سوندىقتان دا, زاۋىت ءونىمىنىڭ ساپاسى جاقسارىپ, باسەكەگە قابىلەتتىلىگى ارتقان. جولدىباي بازار. دەرەككوز: «24kz». فوتو: strategy2050.kz.