استانا. 28 مامىر. الماتىدا زيالى قاۋىم وكىلدەرى ەۋرازيالىق ەكونوميكالىق وداقتىڭ ەل الەۋەتىن كوتەرۋدەگى ىقپالىن ءسوز ەتتى. بۇل تۋرالى gylymordasy.kz حابارلادى.
«عىلىم ورداسى» رەسپۋبليكالىق مەملەكەتتىك كاسىپورنىندا وتكەن باسقوسۋعا عىلىمي-زەرتتەۋ ينستيتۋتتارىنىڭ ديرەكتورلارى مەن قىزمەتكەرلەرى, جوعارعى وقۋ ورىندارىنىڭ رەكتورلارى, عىلىمي كىتاپحانالاردىڭ قىزمەتكەرلەرى, وتاندىق بيزنەس جانە بۇقارالىق اقپارات قۇرالدارىنىڭ وكىلدەرى قاتىستى.
القالى جيىنعا قاتىسقان عالىمدار ەۋرازيالىق ەكونوميكالىق وداق قۇرۋ تۋرالى كەلىسىم ءۇش ەلدىڭ دامۋىنا سەرپىن بەرەدى دەگەن ورتاق پىكىر ايتتى.
الماتىداعى ەكونوميكا ينستيتۋتىنىڭ ديرەكتورى ساكەن ەسپاەۆ: «ءۇش ەلدىڭ ورتاق ەكونوميكالىق دامۋىنىڭ كولەمى 2,2 ترلن. اقش دوللارىن قۇرادى. كەدەندىك وداق اياسىندا بىرىگىپ وتىرعان قازاقستان, رەسەي, بەلارۋس ەلدەرىنىڭ اراسىنداعى تاۋار اينالىمى 24 ملرد. اقش دوللارىنا جەتتى. XXI عاسىردا ەلدەردىڭ ەكونوميكالىق ينتەگراتسياعا ەنۋى باستى قاجەتتىلىك بولىپ وتىر. ەۋرازيالىق ەكونوميكالىق وداق – تابىستى ىقپالداسۋدىڭ كەپىلى بولماق», – دەدى.
جيىندا ايتىلعانداي, ەۋرازيالىق ەكونوميكالىق وداق ەلىمىزدى جاڭا بەلەسكە الىپ شاعادى.
جولدىباي بازار.
دەرەككوز: gylymordasy.kz.
فوتو: gylymordasy.kz.