استانا. 28 مامىر. ەۋرازيالىق وداقتىڭ قۇرىلۋى ارقىلى قازاقستان دامۋ ستراتەگياسىنىڭ دۇرىستىعىن تاعى ءبىر مارتە تەكسەرە الادى. بۇل تۋرالى BNews.kz تىلشىسىنە بەرگەن سۇحابىندا پارلامەنتى ءماجىلىسىنىڭ دەپۋتاتى ايگۇل سولوۆەۆا مالىمدەدى.
«ەۋرازيالىق وداق قۇرۋ اياسىندا بولىپ جاتقان جايتتار قازاقستانعا دامۋ ستراتەگيالارىنىڭ دۇرىستىعىن تاعى ءبىر مارتە تەكسەرۋگە, ەۋرازيالىق كەڭىستىكتەگى جاھاندىق جانە ايماقتىق مۇددەلەر توعىسىندا ءوز ورنىن ايقىنداۋعا مۇمكىندىك بەرەدى. بۇگىنگى كۇنى كەدەندىك وداق پەن بىرىڭعاي ەكونوميكالىق كەڭىستىك اياسىنداعى ىقپالداستىق پروتسەستەرىنىڭ جاي-كۇيى مەن بولاشاعى, سونداي-اق قول جەتكىزىلگەن كەلىسىمدەردىڭ نەگىزگى ماسەلەلەرى تالقىلاندى. اسىرەسە, كاسىپكەرلىك قىزمەتتىڭ باسەكەگە قابىلەتتىلىگى جانە بيزنەستى دامىتۋ ءۇشىن قولايلى جاعداي جاساۋ اياسىنداعى اڭگىمەلەر پىسىقتالدى. ساراپشىلار اۋقىمدى ءىس تىندىردى جانە ەۋرازيالىق ەكونوميكالىق ىقپالداستىققا تارتىلعان تاراپتار ءۇشىن ءوزارا ءتيىمدى تۇستارىن ايقىنداۋدا سۇراق تۋدىرعان داۋلى ماسەلەلەر بويىنشا ورتاق شەشىمگە كەلۋ جولدارى ىزدەستىرىلۋدە», - دەدى ايگۇل سولوۆەۆا.
دەپۋتات سونداي-اق ينتەگراتسيالىق پروتسەسستەر اياسىندا مەملەكەت باسشىسى قول قويعان «شاعىن جانە ورتا كاسىپكەرلىك قىزمەت ءۇشىن جاعدايدى جاقسارتۋ جونىندەگى تۇبەگەيلى شارالار تۋرالى» جارلىعىندا كورسەتىلگەن تاپسىرمالاردى جۇزەگە اسىرۋ اياسىندا ءالى دە شەشىمىن تابۋى ءتيىس اۋقىمدى جۇمىستار بار ەكەنىن اتاپ ءوتتى.
وسى قۇجاتتا بيزنەسكە تەكسەرۋ جۇرگىزۋ شارالارىنا موراتوري جاريالانىپ, شاعىن جانە ورتا كاسىپكەرلىك سۋبەكتىلەرىن تاراتۋ شارالارىن جەڭىلدەتۋ, مەملەكەتتىك قاداعالاۋ مەن باقىلاۋدى جۇزەگە اسىرۋدا تەكسەرۋگە جاتاتىن تالاپتار سانىن قىسقارتۋ جاعدايى قاراستىرىلعان.
مۇرات ايتقوجا.
دەرەككوز: BNews.kz.
فوتو: BNews.kz.