اتىراۋ وبلىسىنداعى وزەكتى ماسەلە – ەلەكتر جەلىسىنىڭ توزۋى. ونىڭ 40 پايىزعا جۋىعى ەسكىرگەن. بۇل تۋرالى پرەزيدەنت قاسىم-جومارت توقاەۆ ءوڭىر جۇرتشىلىعىمەن كەزدەسۋىندە ايتتى, دەپ حابارلايدى Egemen.kz اقوردانىڭ رەسمي پاراقشاسىنا سىلتەمە جاساپ.
«بيىل 15 ەلدى-مەكەننىڭ ەلەكتر جەلىسى جوندەلىپ جاتىر. دەگەنمەن, بۇل جەتكىلىكسىز. سوڭعى جىلدارى ايماقتا ەلەكتر قۋاتى جۇيەسى دۇرىس ىستەمەيتىن بولدى. وڭىردەگى ەنەرگيا تاپشىلىعى – شامامەن 200 مەگاۆاتت. وبلىستا ءوزىنىڭ ەلەكتر ستانتسياسىن پايدالانىپ وتىرعان كاسىپورىندار بار. بىراق, ولاردىڭ مۇمكىندىگى شەكسىز ەمەس», دەدى قاسىم-جومارت توقاەۆ.
پرەزيدەنت ونەركاسىپ ورىندارى دامىپ, حالىق سانى كوبەيگەن سايىن قۋات كوزىنە دەگەن سۇرانىس ارتاتىنىن ايتتى. سونداي-اق, اتىراۋ وبلىسىنىڭ ەلەكتر ەنەرگياسى جۇيەسىنە تۇگەل جاڭعىرتۋ جۇمىستارىن جۇرگىزۋ كەرەكتىگىن ايتتى.
«مەن بىلتىر باتىس ايماعىن ەلىمىزدىڭ نەگىزگى ەنەرگەتيكا جۇيەسىنە قوسۋ تۋرالى تاپسىرما بەردىم. ۇكىمەت وسى ماسەلەنى پىسىقتاپ, ناقتى شەشىم قابىلداسىن. سونداي-اق ەلەكتر جەلىلەرىن جوندەۋ جۇمىستارىن رەسپۋبليكالىق بيۋدجەتتەن قارجىلاندىرۋ مۇمكىندىگىن قاراستىرۋ قاجەت», دەدى مەملەكەت باسشىسى.
بۇدان بولەك, پرەزيدەنت «اتىراۋ جارىق» كومپانياسىنىڭ جۇمىسىنا قاتىستى سىن-ەسكەرتۋلەر بار ەكەنىن ايتتى. ەگەر كومپانيا ءوز مىندەتتەمەسىن ورىنداماسا, ونداي كەلىسىمدى بۇزۋ كەرەك دەپ تۇيىندەدى.