مەملەكەت باسشىسى اتىراۋ جۇرتشىلىعىمەن كەزدەسۋ بارىسىندا ءوڭىردىڭ تاريحي ماڭىزى جايلى ايتتى, دەپ حابارلايدى Egemen.kz.
«اتىراۋ القابى – تابيعي بايلىعىمەن قاتار تاريحي مۇرالارىمەن دە تانىمال ولكە. وڭىردە مىڭداعان جىل بويى وزىق وركەنيەتتەر بولعان. بۇل جەردەن تابىلعان «التىن ادام» – سونىڭ ءبىر ايعاعى. كونەنىڭ كوزىندەي سارايشىقتا اتاقتى حاندارىمىز ورداسىن تىككەن. شاھار كەزىندە ەڭ ءىرى جانە ەڭ دامىعان قالالاردىڭ ءبىرى بولعانى بارشاعا ءمالىم», دەدى وڭىرگە بارعان ساپارىندا.
سونداي-اق يمانقارا ۇڭگىرى مەن اقمەشىت قورىمى - قازاقتىڭ سان قيلى شەجىرەسى ەكەنىن دە اتاپ ءوتتى.
«وسى ايماقتان يساتاي مەن ماحامبەتتەي باتىرلار, مۇرات پەن شەرنيازداي اقىندار شىققان. بۇل ولكە قازاق رۋحانياتىندا ورنى بار اقىن-جازۋشىلارىمەن, زيالى ازاماتتارىمەن تانىمال. ءانۇرانىمىزدىڭ اۆتورى جۇمەكەن ناجىمەدەنوۆ – وسى ءوڭىردىڭ تۋماسى. سونىمەن قاتار, ءابۋ سارسەنباەۆ, حاميت ەرعاليەۆ, زەينوللا قابدولوۆ, فاريزا وڭعارسىنوۆا, قارشىعا احمەدياروۆ, راقىمجان وتارباەۆ جانە باسقا دا ءبىرتۋار تۇلعالاردى اتاپ وتۋگە بولادى».
جيىن بارىسىندا پرەزيدەنت قازاقستاننىڭ ەڭبەك ەرى يليا جاقانوۆتىڭ ەڭبەگىن ايتىپ وتە, ماقتان تۇتاتىنىن جەتكىزدى.
ء«بارىمىز بۇل اسا كورنەكتى كومپوزيتور, جازۋشى, ونەرتانۋشى تۇلعانى ماقتان تۇتامىز. قايماعى بۇزىلماعان قازاقتىڭ بايىرعى مەكەنى قاي جاعىنان الىپ قاراساق تا, قارقىندى دامىپ كەلە جاتىر. ءبىز مەملەكەتتىك ساياساتتا «قۋاتتى وڭىرلەر – قۋاتتى ەل» قاعيداتىن ۇستانامىز», دەدى قاسىم-جومارت كەمەل ۇلى.