استانادا «جىبەك جولى» حالىقارالىق فەستيۆالى وتەدى

قىزىل كىلەمدەگى بەلگىلى قوناقتار مەن جۋرناليستەر, جارقىن شوۋ-باعدارلاما مەن م.تولەباەۆتىڭ كوپشىلىك ۇناتاتىن ء«بىرجان – سارا» وپەراسى ءۇش اپتالىق فەستيۆالدى باستاپ بەرەدى. وندا يتاليا, گەرمانيا, چەحيا, ۋكراينا, ارمەنيا, رەسەي, بەلارۋس جانە باسقا دا ەلدەردەن ارتىستەر جينالادى.

فەستيۆال قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن 6 جەلتوقسانعا دەيىن سوزىلادى, كورەرمەندەردىڭ نازارىنا بۇكىل الەمنەن جۇلدىزداردىڭ قاتىسۋىمەن وپەرا جانە بالەت سپەكتاكلدەرىنەن «مۋزىكالىق كەرۋەن» ۇسىنىلادى. 

– وپەرا جانە بالەتتىڭ اۋقىمدى فەستيۆالى ەلىمىزدىڭ مادەني ومىرىندەگى وقيعا عانا ەمەس, سونداي-اق ۇلى ونەردى باعالايتىن بارشا جاندار ءۇشىن ناعىز مەرەكە بولماق. ءبىز بۇل ءىس-شاراعا تىڭعىلىقتى دايىندالدىق, باعدارلامانى تولىق ويلاستىرا كەلە, تەاتردىڭ شىنايى رۋحىن كورسەتۋ ءۇشىن تانىمال, جالىنداعان مۋزىكامەن قاتار, عالامات تۋىندىلاردى دا ورىنداۋدى ءجون كوردىك. سونىمەن قاتار ۇرپاقتار ساباقتاستىعىن دا كورسەتۋگە تىرىستىق, سوندىقتان سپەكتاكلدەرگە ساحنا شەبەرلەرى دە, جاس سوليستەر دە جۇمىلدىرىلدى, – دەپ اتاپ ءوتتى «استانا وپەرا» ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ.

فەستيۆالدى ۇلتتىق كلاسسيكا يگىلىگى – م.تولەباەۆتىڭ ء«بىرجان – سارا» وپەراسى اشادى, ءبىرجان پارتياسىن ورىنداۋعا مارين تەاترىنىڭ ءسوليسى, رەسەيدىڭ ەڭبەك سىڭىرگەن ءارتىسى, تاتارستاننىڭ حالىق ءارتيسى احمەد اگادي شاقىرىلدى. «استانا وپەرانىڭ» ءدال وسى وپەرامەن 2013 العاشقى تەاتر ماۋسىمىن اشقانى اتاپ وتەرلىك جايت. شىندىعىندا 10 جىل بۇرىن ساحنادا قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, رەسەيدىڭ حالىق ءارتيسى يۋري الەكساندروۆتىڭ قويىلىمى بولعان ەدى, الايدا ول كەزدە دە باستى پارتيادا تەڭدەسسىز تەنور, ءبىرجان پارتياسىن ۇزدىك ورىنداۋشى احمەد اگادي جارقىراعان بولاتىن. قازىر انشىگە بۇل بەينەنى وپەرانىڭ جاڭا, اتاپ ايتساق, قازاقستاننىڭ ەڭبەك سىڭىرگەن قايراتكەرى اسحات ماەميروۆ پەن كەڭەسشى رەجيسسەر – تاتارستان رەسپۋبليكاسى مەملەكەتتىك سىيلىعىنىڭ لاۋرەاتى ميحايل پاندجاۆيدزەنىڭ رەداكتسياسىندا (2018 جىل) اشۋعا تۋرا كەلەدى, وندا قويۋشىلار وپەرانىڭ جاڭا وقىلۋىن ۇسىندى, بۇل قازاق كلاسسيكاسىنىڭ ستسەنوگرافيا مەن جەكەلەگەن كەيىپكەرلەردىڭ مىنەزدەرىن قابىلداۋ تاپتاۋرىنىن بۇزادى. ديريجەر تۇعىرىندا – مۋزىكالىق رەداكتسيا اۆتورى, قازاقستاننىڭ ەڭبەك سىڭىرگەن قايراتكەرى ابزال مۇحيتدين.

15-16 قاراشادا باعدارلامانى ل.مينكۋستىڭ «دون كيحوت» بالەتى جالعاستىرادى. ونەر كورسەتۋدىڭ ەكىنشى كۇنى بەلارۋس ۇلكەن تەاترىنىڭ جۇلدىزدارى دميتري ۋكسۋسنيكوۆ پەن ليۋدميلا حيتروۆا قازاقستاندىق كورەرمەنگە ءوز ونەرلەرىن تارتۋ ەتەدى. ديريجەر – رۋسلان بايمۋرزين.

19 قاراشادا دج.ءپۋچچينيدىڭ «تۋراندوت» وپەراسى ورىندالادى, ديريجەر تۇعىرىندا – الەمگە ايگىلى ماەسترو الان بورىباەۆ. كالاف پارتياسىندا ساحناعا وۆاننەس ايۆازيان (ارمەنيا) شىعادى. ونەر كورسەتۋدىڭ ەكىنشى كۇنى – 20 قاراشادا تۋراندوتتى وكسانا كرامارەۆا (ۋكراينا-گەرمانيا) ورىندايدى, ليۋ – ليبۋشە سانتوريسوۆا (چەحيا).

23-24 قاراشادا كورەرمەندەرگە الەمنىڭ تانىمال بالەتتەرىنىڭ ءبىرى – پ.چايكوۆسكيدىڭ «اققۋ كولى» ۇسىنىلادى. ءبىرىنشى كۇنى شاقىرىلعان جۇلدىزدار – اننا مۋرومتسەۆا (ۋكراينا) مەن ۆەنگريا وپەرا جانە بالەت تەاترىنىڭ ەتۋالى گەرگو ارمين بالاشي ونەر كورسەتەدى. ديريجەر – دجۋزەپپە اكۋاۆيۆا (يتاليا).

29 قاراشادا ەكى ءبولىمدى بالەت كەشى وتەدى: گالا-بالەت پەن ۆ.ا.موتسارتتىڭ مۋزىكاسىنا ي.كيلياننىڭ «التى بي» بىراكتىلى بالەتى. باعدارلاماعا سوليستەر – اندرەي سوروكين, اناستاسيا ميلياچەنكو (رەسەي), داريا سۋزي مەن حاۆەر كاچەيرو الەمان (گەرمانيا) قاتىسادى. ديريجەر – ارمان ورازعاليەۆ.

2 جەلتوقساندا وپەرا ونەرىنىڭ جاۋھارى – پ.چايكوۆسكيدىڭ «ەۆگەني ونەگينى» ۇسىنىلادى, ديريجەر – الان بورىباەۆ. لەنسكيدىڭ پارتياسىن الەكساندر ميحنيۋك (بەلارۋس) ورىنداسا, ولگانىڭ بەينەسىن داريا گوروجانكو (ۋكراينا) سومدايدى. 3 جەلتوقساندا ەۆگەني ونەگين پارتياسىندا – كونستانتين برجينسكي (رەسەي), گرەميندى بارسەگ تۋمانيان (ارمەنيا) ورىندايدى.

6 جەلتوقساندا «جىبەك جولى» فەستيۆالىنىڭ سالتاناتتى جابىلۋى وتەدى. كوپشىلىككە تاڭعاجايىپ گالا-كونتسەرت ۇسىنىلادى, ديريجەر تۇعىرىندا – دجۋزەپپە اكۋاۆيۆا (يتاليا).

ايتا كەتەيىك, «جىبەك جولى» حالىقارالىق فەستيۆالىنىڭ باستى ماقساتى - قازاقستان مەن الىس-جاقىن شەت مەملەكەتتەر اراسىنداعى مادەني بايلانىستى نىعايتۋ.