مەملەكەت باسشىسى ماڭعىستاۋ وبلىسىنىڭ تۋريزمىنە قاتىستى بىرقاتار تاپسىرما بەردى, دەپ حابارلايدى Egemen.kz اقوردانىڭ رەسمي پاراقشاسىنا سىلتەمە جاساپ.
«ايماقتاعى ءتۋريزمدى دامىتۋ قاجەت. قازىر بۇكىل الەمدە تۋريزم ەكونوميكانىڭ ماڭىزدى سالاسىنا اينالدى. ءبىز دە ەلىمىزدىڭ تۋريزم يندۋسترياسىن دامىتۋعا باسا ءمان بەرىپ وتىرمىز. بۇل رەتتە ماڭعىستاۋدىڭ الاتىن ورنى ايرىقشا.
ونىڭ ەڭ ۇتىمدى تۇسى – كاسپي تەڭىزىنىڭ جاعاسىندا ورنالاسۋى. سونىڭ ارقاسىندا جاعاجاي ءتۋريزمىن دامىتۋعا مول مۇمكىندىك بار. اقتاۋدا ىسكە اسىرىلىپ جاتقان «جىلى جاعاجاي» ينفراقۇرىلىمدى دامىتۋ جوباسى اياقتالىپ كەلەدى. ۇكىمەت تۋريزم سالاسىنداعى ينۆەستيتسيالىق جوبالاردى قارجىلاندىرۋ مۇمكىندىگىن قاراستىرۋى كەرەك», دەدى مەملەكەت باسشىسى ماڭعىستاۋعا بارعان ساپارىندا.
سونداي-اق پرەزيدەنت كاسپي جاعالاۋىنداعى مەملەكەتتەرمەن بىرلەسكەن حالىقارالىق جوبالاردى جۇزەگە اسىرۋ مۇمكىندىگىن قاراستىرۋدى تاپسىردى. اسىرەسە, كرۋيز ءتۋريزمىن دامىتۋ قىزىعۋشىلىق تۋدىراتىنىن ايتتى.
«جالپى ماڭعىستاۋ كوپتەگەن كيەلى ورىندارىمەن ايگىلى. بەكەت اتا, شوپان اتا, شاقپاق اتا جەر استى مەشىتتەرىن ەرەكشە اتاپ وتۋگە بولادى. مۇنداي بىرەگەي نىساندار دۇنيە جۇزىندە دە بىرەن-ساران. تاريحي-مادەني قورىقتار مەن مۋزەيلەرگە دە باسا ءمان بەرگەن ءجون. اسىرەسە ءتول مادەنيەتىمىزدە ەرەكشە ورنى بار مۇرىن جىراۋدىڭ جانە سەرىكبول قوندىبايدىڭ مۇراجايى نازاردان تىس قالماۋى كەرەك», دەدى قاسىم-جومارت توقاەۆ.
بۇدان سوڭ «ارعىقازاق ميفولوگياسى» اتتى ءتورت تومدىق ىرگەلى جۇمىستىڭ اۆتورى سەرىكبول قوندىبايدىڭ عىلىمي مۇراسى جونىندە پىكىر ءبىلدىرىپ, تاراس شەۆچەنكونىڭ مەموريالدى مۋزەيىن شەتەلدىك تۋريستەردىڭ قىزىعۋشىلىعىن تۋعىزاتىن نىسان رەتىندە اتاپ ءوتتى.