بۇل جايىندا قاسىم-جومارت توقاەۆ ماڭعىستاۋ وبلىسىنىڭ جۇرتشىلىعىمەن كەزدەسۋىندە ايتتى, دەپ حابارلايدى Egemen.kz.
«ماڭعىستاۋدىڭ سۋمەن قامتاماسىز ەتۋ جۇيەسىن جانە ينجەنەرلىك ينفراقۇرىلىمىن جاڭعىرتىپ, اقتاۋ جانە جاڭاوزەن قالالارىن دامىتۋ كەرەك. اۋىز سۋدىڭ جەتىسپەۋى – تۇرعىنداردى الاڭداتىپ وتىرعان وتكىر ماسەلەنىڭ ءبىرى. سۋ تۇشىتاتىن زاۋىتتاردىڭ قۋاتى ءالسىز بولعاندىقتان, قالالار مەن اۋىلداردا جاز كەزىندە سۋ بەلگىلى ءبىر ۋاقىتتا عانا بەرىلەدى. ال بيىلعى مامىر ايىندا قالا تۇرعىندارى سۋ تاسيتىن كولىكتىڭ كەزەگىندە تۇرۋعا ءماجبۇر بولدى. مۇنداي جاعدايعا شىداپ وتىرۋعا بولمايدى», دەدى پرەزيدەنت.
مەملەكەت باسشىسى 2025 جىلعا قاراي وبلىستا سۋعا دەگەن سۇرانىس 260 مىڭ تەكشە مەترگە دەيىن ءوسۋى مۇمكىن دەگەن بولجام بارىن ايتتى.
«مەن بەس جىل ىشىندە وڭىردەگى بارلىق قالالار مەن اۋىلداردى اۋىز سۋمەن قامتاماسىز ەتۋ جونىندە مىندەت قويىپ وتىرمىن. اكىمدىك بۇل باعىتتاعى جۇمىستاردى باستاپ كەتتى. مەنىڭ تاپسىرماممەن جىل اياعىنا دەيىن 12 اۋىل ورتالىقتان بەرىلەتىن سۋ جۇيەسىنە قوسىلادى. وڭىردە 2025 جىلعا دەيىن سۋ تۇشىتۋ جونىندەگى 9 جوبا, ماگيسترالدى سۋ قۇبىرىن سالۋ جانە قايتا جاڭعىرتۋ جونىندەگى 4 جوبانى جۇزەگە اسىرۋ كوزدەلىپ وتىر. سونىمەن قاتار مەرزىمى سوزىلىپ بارا جاتقان جوبالار دا بار», دەدى قاسىم-جومارت توقاەۆ.
وسى رەتتە پرەزيدەنت كەندىرلى اۋىلىنداعى سۋ تۇشىتاتىن زاۋىتتىڭ قۇرىلىسىن تەزىرەك باستاۋ كەرەگىن ايتتى.
«33 جىل بۇرىن پايدالانۋعا بەرىلگەن استراحان – ماڭعىستاۋ سۋ قۇبىرى ابدەن توزعان. ونى جاڭعىرتۋ جانە كەڭەيتۋ جۇمىستارى وتە باياۋ ءجۇرىپ جاتىر. ۇكىمەت جانە «سامۇرىق-قازىنا» قورى بارلىق جۇمىستاردى مەرزىمىندە ورىنداۋعا ءتيىس. «ماەك-قازاتومپرومنىڭ» قۋاتىن ارتتىرۋعا ەرەكشە كوڭىل بولگەن ءجون. ءوڭىردىڭ ۇزدىكسىز دامۋىنا جانە حالىق سانىنىڭ وسۋىنە بايلانىستى ينجەنەرلىك جۇيەنى جاڭعىرتۋ ماسەلەسى تۋىنداپ وتىر. قازىر كوممۋنالدىق ينفراقۇرىلىمنىڭ شاماسى جەتپەي جاتىر. وڭىرگە سۋ, جىلۋ جانە ەلەكتر ەنەرگياسىن نەگىزىنەن «ماەك-قازاتومپروم» كومپانياسى بەرەدى. بىراق بۇل كاسىپورىنداعى قۇرال-جابدىقتاردىڭ 80 پايىزىنىڭ توزىعى جەتكەن. بۇعان دەيىن وڭىرگە جۇمىس ساپارىمەن كەلگەندە كاسىپورىندى جاڭعىرتۋ باعدارلاماسىن ازىرلەۋدى تاپسىرعان ەدىم. ۇكىمەت ونى جۇزەگە اسىرۋعا قاجەتتى قارجى كوزدەرىن قاراستىرۋ كەرەك. كوپكە سوزباي, جۋىق ارادا جۇمىستى باستاۋىمىز قاجەت», دەدى قاسىم-جومارت كەمەل ۇلى.