سەنات توراعاسى ماۋلەن اشىمباەۆ مەملەكەت باسشىسى قول قويعان زاڭدارعا قاتىستى الەۋمەتتىك جەلىلەردەگى پاراقشاسىندا پىكىر ءبىلدىردى, دەپ حابارلايدى Egemen.kz.
«بۇگىن مەملەكەت باسشىسى قاسىم-جومارت كەمەل ۇلى توقاەۆ ماۋسىم ايىندا وتكەن رەسپۋبليكالىق رەفەرەندۋمنىڭ ناتيجەسىن ىسكە اسىرۋ ءۇشىن قابىلدانعان بىرقاتار زاڭعا جاريا تۇردە قول قويدى. ولاردىڭ قاتارىندا «كونستيتۋتسيالىق سوت تۋرالى», «ادام قۇقىقتارى جونىندەگى ۋاكىل تۋرالى», «پروكۋراتۋرا تۋرالى» سياقتى كونستيتۋتسيالىق زاڭدار بار», دەپ جازدى سەنات توراعاسى.
وسىلايشا بيلىك تارماقتارى اراسىنداعى بايلانىستىڭ جاڭا ۇلگىسىن قالىپتاستىرۋعا جانە مەملەكەت باسقارۋ ىسىنە ازاماتتاردىڭ قاتىسۋىنا جول اشۋعا مۇمكىندىكتەر تۋىپ وتىر. سونداي-اق ادام قۇقىقتارى مەن بوستاندىقتارىن قورعاۋ جۇيەسى نىعايا تۇسكەنىن اتاپ ءوتتى.
«پرەزيدەنتىمىز اتاپ وتكەندەي, كونستيتۋتسيالىق رەفورما قازاقستان تاريحىندا جاڭا ءداۋىر باستالعانىن ايقىندايدى. بۇل قادامدار سوڭعى ءۇش جىلداعى ساياسي وزگەرىستەردى ورنىقتىرىپ, مەملەكەتىمىزدى ودان ءارى نىعايتۋ ءۇشىن مىقتى نەگىز قالادى. شىن مانىندە, بۇگىن قول قويىلعان زاڭدار ادىلەتتى قازاقستان قۇرۋدىڭ بەرىك قۇقىقتىق ىرگەتاسى ەكەنى ءسوزسىز. الداعى ۋاقىتتا پارلامەنت سەناتى ادىلەتتىلىك قاعيداتىنا تابان تىرەي وتىرىپ, زاڭنامالىق جۇمىستاردى جالعاستىرا بەرەدى», دەدى ماۋلەن اشىمباەۆ.