قوستاناي قالاسىندا قازاقستان رەسپۋبليكاسى سۋديالار وداعى VII سپارتاكياداسىنىڭ ىرىكتەۋ ويىندارى ءوز مارەسىنە جەتتى. سالاماتتى ءومىر سالتىن قالىپتاستىرۋ ماقساتىندا وتكەن ىرىكتەۋ ويىندارىنىڭ جابىلۋ سالتاناتىندا قوستاناي وبلىستىق سوتىنىڭ توراعاسى ع.مىرزاكە اتالعان شاراعا بەلسەنە قاتىسقان كوماندالارعا العىسىن ايتىپ, جەڭىمپازداردى قۇتتىقتادى.
ەلباسى نۇرسۇلتان نازارباەۆ «قازاقستان-2030» ستراتەگيالىق باعدارلاماسىندا حالىقتى سالاماتتى ءومىر سالتىنا ىنتالاندىرۋدى باسىم باعىتتىڭ ءبىرى رەتىندە اتاپ كورسەتتى. مەملەكەت ساياساتىنىڭ ستراتەگيالىق باعىتىنىڭ ءبىرى بۇقارالىق سپورت قوزعالىسىن كەڭەيتۋ اياسىندا سۋديالار اراسىندا سپورت جارىستارىن وتكىزۋ داستۇرگە اينالعان. سوعان وراي قازاقستان رەسپۋبليكاسى سۋديالار وداعىنىڭ سپارتاكياداسى 2003 جىلدان وتكىزىلىپ كەلەدى.
يگى شارا دەنساۋلىقتى جاقسارتۋمەن قاتار, سۋديالار اراسىنداعى سىيلاستىقتى قالىپتاستىرادى, ولاردىڭ ارالاسۋىن, دوستىق قارىم-قاتىناستى نىعايتا ءتۇستى. كۇشى مەن ەپتىلىگىن, شىنىققان شىمىر ەكەنىن بايقاتاتىن ناعىز سپورت مەرەكەسىندە قازاقستان رەسپۋبليكاسى جوعارعى سوتىنىڭ, اقمولا, سولتۇستىك قازاقستان, قوستاناي وبلىسى سوتتارىنىڭ قۇراما كوماندالارى سپورتتىڭ ۆولەيبول, ميني-فۋتبول, بيليارد, ۇلكەن تەننيس, ۇستەل تەننيسى, شاحمات, دويبى تۇرلەرى بويىنشا باق سىناستى. ۇلكەن بايگەدە وزىپ, ءوڭىر نامىسىن قولدان بەرمەگەن ەڭ ۇزدىك كوماندالار مەن سپورتشىلار انىقتالدى.
شاعىن فۋتبول مەن ۆولەيبولدان قوستاناي وبلىسى سوتىنىڭ كومانداسى ءبىرىنشى ورىندى يەلەندى. سونداي-اق, ۇلكەن تەننيستەن قوستاناي وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ سۋدياسى ب.ورداباەۆ ەشكىمگە دەس بەرمەدى. ۇستەل تەننيستەن جوعارعى سوت سۋدياسى و.قوجاباەۆ, ايەلدەر اراسىندا اقمولا وبلىسىنداعى جاقسى اۋداندىق سوتىنىڭ سۋدياسى ز.جولامانوۆا, بيلياردتان جوعارعى سوتتىڭ سۋدياسى ر.مامىرباەۆ, شاحماتتان ەرلەر اراسىندا سولتۇستىك قازاقستان وبلىستىق سوتىنىڭ سۋدياسى ب.كەنجەنوۆ, ايەلدەر اراسىندا قوستاناي قالاسى №2 سوتىنىڭ سۋدياسى ا.بايجۇمانوۆا, دويبىدان ەرلەر اراسىندا جوعارعى سوتتىڭ سۋدياسى ب.ماقۇلبەكوۆ, ايەلدەر اراسىندا سولتۇستىك قازاقستان وبلىسىنىڭ قىزىلجار اۋداندىق سوتىنىڭ سۋدياسى ا.دوسىموۆا ۇزدىك كورسەتكىشكە قول جەتكىزدى.
ىرىكتەۋ ويىندارىنىڭ جەڭىمپازدارى قىركۇيەك ايىندا الماتىدا وتەتىن فينالدىق ويىنداردا ءوز ءوڭىرلەرىنىڭ نامىسىن قورعايتىن بولادى.
ءنازيرا جارىمبەتوۆا,
«ەگەمەن قازاقستان».
قوستاناي.