ازيا دوداسى تاسجولدا جالعاسادى

وسى كۇندەرى ەلىمىزدە ۆەلوسپورتتان ازيا چەمپيوناتى وتۋدە كەشە استانادا 34-ءشى  قۇرلىقتىق چەمپيو­نات مارەسىنە جەتتى. بۇل جارىس «سارىارقا» ۆەلوترەگىندە» ترەك بويىنشا 22-26 مامىر كۇندەرى ءوتتى. ال جاسوسپىرىمدەر اراسىنداعى ازيا چەمپيوناتى كەشە قاراعاندى قالاسىندا باستالدى. وندا كوماندالار تاسجولدا سىنعا تۇسەدى. وسى ەكى جارىسقا 30 ەلدەن 500-دەن استام سپورتشىلار قاتىسۋدا. كەشە تاسجولدا, ياعني شوسسە بويىنشا باستالعان بايگە وسىمەن 21-ءشى رەت وتكىزىلىپ جاتىر. ول استانادا وتكەن قۇرلىقتىق چەمپيونات سەكىلدى ەلىمىزدە العاش رەت وتۋدە. استانادا ترەكتەن وتكەن ازيا دوداسىندا ەلىمىز 4 التىن, 3 كۇمىس جانە 1 قولا مەدالدى يەلەنىپ, جالپىكوماندالىق ەسەپتە بەسىنشى ورىندى مىسە تۇتتى.  ءبىزدىڭ سپورتشىلار جارىستىڭ سوڭعى كۇنى ەكى التىن مەن ەكى كۇمىس جۇلدەنى جەڭىپ الدى. قازاقستان قۇراماسىندا ەكاتەرينا يۋرايتيس پەن رومان ۆاسيلەنكوۆ پەن نادەجدا جەنەلەۆا جەكەلەي سىندا توپ جاردى. وسى سايىستا ەكاتەرينا يۋرايتيس ازيانىڭ جاڭا رەكوردىن جاڭارتتى. سونىمەن بىرگە ول نادەجدا جانەلەۆا, فاينا پوتاپوۆا جانە سۆەتلانا ريابوۆا قۋالاۋ (4000م) بويىنشا كوماندالىق جارىستا التىن جۇلدەنى يەلەندى. ال جالپىكوماندالىق ەسەپتە باس جۇلدەگە قىتايلىق ترەكشىلەر يە بولدى. ودان كەيىن وڭتۇستىك كورەيا, قىتايدىڭ سيانگان قۇراماسى ەكىنشى جانە ءۇشىنشى ورىندى يەلەندى. تاعى ءبىر ايتاتىن نارسە, استاناداعى جاسوسپىرىمدەر جانە ەرەسەك سپورتشىلار اراسىندا وتكەن جارىستىڭ العاشقى كۇنىندە ەكى قۇرلىقتىق رەكورد جاسالدى. رەكوردتىڭ ەكەۋى دە جاسوسپىرىمدەر اراسىنداعى گيت سا­يىسىندا جاڭارتىلدى. الدىمەن ازيانىڭ ۇزدىگى وڭتۇستىككورەيالىق دجۋنگ دجيحي 1 شاقىرىمدى 1:04.517 سەكۋندتا ءجۇرىپ, چەمپيون اتانسا, ودان كەيىن مالايزيالىق ۆەلوشاباندوز موحد زونيس مۋحامماد فيرداۋس جاڭا رەكورد جاسادى. ول 1 شاقىرىمدى 1:03.962 سەكۋندتا ءوتتى. داستان كەنجالين, «ەگەمەن قازاقستان».