كاسىپكەرلەرگە كومەك

«دامۋ» قورىنىڭ باتىس قازاقستان وبلىستىق فيليالى 2022 جىلدىڭ 9 ايى ىشىندە 29 ملرد تەڭگەگە جۋىق نەسيە سوماسىنا سۋبسيديالاۋ قۇرالى بويىنشا 800-گە جۋىق جوباعا قولداۋ كورسەتىپ, 3,9 ملرد تەڭگە سۋبسيديا تولەگەن. سونداي-اق كاسىپكەر نەسيە الۋ ءۇشىن بانككە جۇگىنگەن جانە ونىڭ كەپىلى جەتكىلىكسىز بولعان كەزدە «دامۋ» قورى ونىڭ كەپىلدىگىن بەرە الادى. جىل باسىنان بەرى 9 اي ىشىندە كەپىلدىك قۇرالى بويىنشا 10,2 ملرد تەڭگە نەسيە سوماسىنا 775 جوباعا قولداۋ كورسەتىلىپ, كەپىلدىك سوماسى 5,7 ملرد تەڭگەنى قۇرادى.

– ءبىز مەملەكەتتىك قىزمەتتەردى اۆتوماتتاندىرۋ جانە تسيفرلاندىرۋ بويىنشا جۇمىستى 2016 جىلى باستادىق. ال 2020 جىلى پاندەميا كەزىندە «دامۋ» قورىنا ونلاين ءوتىنىش بەرۋ مۇمكىندىگى كاسىپكەرلەر ءۇشىن ءتيىمدى ءارى ىڭعايلى بولدى. ەندى اۋداندا تۇراتىن كاسىپكەرلەر وبلىس ورتالىعىنا كەلىپ, قۇجات تاپسىرىپ, كەلىسىمشارتقا وتىرماي-اق, ەلەكتروندىق تسيفرلىق قولتاڭبا ارقىلى قاشىقتان قىزمەت الا الادى. 2020 جىلدان باستاپ سۋبسيديالار مەن كەپىلدىكتەرگە بارلىق ءوتىنىم ونلاين تۇردە بەرىلەدى, – دەيدى «دامۋ» كاسىپكەرلىكتى دامىتۋ قورى» اق باتىس قازاقستان وبلىسى بويىنشا وبلىستىق فيليالىنىڭ ديرەكتورى بالعىن ورازوۆا.

ءبىز «دامۋ» ارقىلى شارۋاسىن دامىتىپ, جەتىستىكتەرگە جەتكەن بىر­نەشە كاسىپورىندى ارالاپ, تىنىس-تىرشىلىگىمەن تانىستىق.

اينۇر مۇقانوۆا – ۇزاق جىل پەري­ناتالدىق دياگنوستيكا سالاسىندا قىزمەت ەتكەن جوعارى ساناتتى ساراپشىلاردىڭ ءبىرى. ۇزاق جىل وبلىستىق پەريناتالدىق ورتالىقتا, كەيىن جەكە مەديتسينالىق كابينەتتەردە قىزمەت ەتكەن تاجىريبەلى مامان كوپتەن بەرى كوپسالالى مەديتسينالىق ورتالىق اشۋدى ارمانداعان ەكەن. ونى بۇل ارمانىنا «دامۋ» قورى جەتكىزگەن.

– ءبىز ويلاعانداي ورتالىقتى اشۋ ءۇشىن ارنايى عيمارات, زاماناۋي جابدىق قاجەت بولاتىن. ونى الۋعا قاجەتتى نەسيە قاراجاتىن «دامۋ» قورى ارقىلى تاپتىق. ياعني «2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا» باعدارلاماسى بويىنشا 155 747 000 تەڭگە كولەمىندە قارجىنى 18,5% پايىزدىق مولشەرلەمەمەن الساق, ونىڭ 12,5%-ىن مەملەكەت سۋبسيديالايدى. كەپىلدىڭ جەتىسپەيتىن بولىگىنە «دامۋ» قورىنىڭ كەپىلدىگى بەرىلدى, – دەيدى اينۇر كەنجەتايقىزى.

«اقجىبەك» كوپسالالى مەديتسي­نالىق ورتالىعىندا ايەل دەنساۋ­لىعىن باستان-اياق تەكسەرەتىن بار­لىق ماماندار مەن قۇرالدار – ۋلترادىبىستىق دياگنوستيكا, تەراپەۆت, پەدياتر, گەنەتيك, ستوماتولوگ, كارديولوگ, نەۆروپاتولوگ, گاستروەنتەرولوگ, اكۋشەر-گينەكولوگ جانە باسقا دا ساۋىقتىرۋ راسىمدەرى سياقتى جوعارى بىلىكتى ماماندار قىزمەتى كورسەتىلەدى. ونىڭ ىشىندە انا قۇرساعىنا بىتكەن شارانانى العاشقى اپتالاردا-اق تەكسەرىپ, اۋىتقۋ بار-جوعىن انىقتاي الاتىن زاماناۋي دياگنوستيكالىق اپپارات ەلىمىز بو­يىنشا ساناۋلى. سوندىقتان دا بۇل جەرگە ورالدىقتار عانا ەمەس, قا­زاق­ستاننىڭ وزگە وڭىرلەرىنەن دە قىز-كەلىنشەكتەر ارنايى كەلەدى.

«دامۋ» قورىنان قولداۋ العان ورالدىق كاسىپكەردىڭ ءبىرى – الەكساندر فەدوروۆ. ول باسقاراتىن «التان» جەكە كاسىپكەرلىگى عيماراتتاردى قاپتايتىن قۇرىلىس ماتەريالدارىن شىعارادى. تۇرعىن ۇيلەر مەن كاسىپكەرلىك نىساندارىنا ەستە­تي­كالىق ءسان بەرەتىن ءارى دىبىس­تان وقشاۋلاپ, جىلۋ ۇنەمدەيتىن مۇنداي قاپتامالار يننوۆاتسيالىق تەحنولوگيامەن جاسالىپ جاتىر. كومپانيا شىعاراتىن تاۋارلار اسسورتيمەنتىندە ەسىك-تەرەزەنى بەزەن­دى­رەتىن ساندىك ەلەمەنتتەر دە بار. 2021 جىلى كاسىپورىن «بيزنەستىڭ جول كارتاسى-2025» بيزنەستى قولداۋ مەن دامىتۋدىڭ مەملەكەتتىك باع­دارلاماسى شەڭبەرىندە ۆتب-قازاق­ستان بانكىنەن 60 ملن تەڭگە نەسيە العان. بۇل قارجى وندىرىستىك تسەح عيما­راتىن ساتىپ الۋعا جۇمسالعان. جىلىنا 14,5% وسىممەن العان نەسيەنىڭ 8,5%-ىن مەملەكەت سۋبسيديالايدى. جەتىسپەيتىن كەپىلدى قام­تاماسىز ەتۋ بولىگىنە «دامۋ» قورى­نىڭ كەپىلدىگى بەرىلگەن. ءبىز كاسىپورىننىڭ وندىرىستىك تسەحىن ارالاپ, دايىن ونىمدەر قويماسىن دا كوردىك.

«ورالدىڭ ايبوليت دوكتورى» اتانعان ماكسيم ستراموۋسوۆتى كوپ ادام جاقسى تانيدى. باتىس قازاقستان اگرارلىق-تەحنيكالىق ۋنيۆەرسيتەتىن بىتىرگەن ول 20 جىلدان بەرى ۆەتەرينارلىق سالادا قىزمەت ەتەدى. ماكسيم باسقاراتىن Zoodoctor ۆەتەرينارلىق ورتالىعى – باتىس قازاقستان وبلىسىندا حاي­ۋا­ناتتارعا تولىق دارىگەرلىك قىز­­مەت كورسەتەتىن جالعىز كلينيكا. مۇن­دا سەرتيفيكاتتالعان رەنتگەن كا­بي­نەتى, وپەراتسيا ۇستەلدەرى, رەا­نيماتسيا بولمەسى, حايۋاناتتاردى جۋىپ, تازالاپ, كەپتىرەتىن ورىن, تۋ بولمەسى, ستەريلدى بوكستارى بار ۆە­تەرينارلىق ستاتسيونار, ءتىپتى جان­ۋار­لارعا ارنالعان قوناقۇي دە بار.

ماكسيم اناتولەۆيچ ءوز ىسىنە شىن بەرىلگەن جان ەكەن. ءيتىن, مىسىعىن الىپ كەلگەن قالا تۇرعىندارىن قابىل­داي ءجۇرىپ, بىزگە Zoodoctor ۆەتە­رينارلىق ورتالىعىن ارالاتىپ كورسەتتى. بۇل ورتالىق ءۇشىن دە عي­مارات پەن جاڭا جابدىقتار «بيز­نەستىڭ جول كارتاسى-2025» مەملە­كەتتىك باعدارلاماسى اياسىندا ساتىپ الىنعان, سىياقى مول­شەرلەمەسى 14% بولسا, ونىڭ 8%-ىن مەم­لەكەت سۋبسيديالايدى. نەسيەنىڭ جالپى كولەمى 142 ملن تەڭگە بولعان. كەپىلدىڭ جەتىسپەيتىن بولىگىن «دامۋ» قورى كوتەردى.

– ءبىزدىڭ ورتالىققا كۇن سا­يىن 120 ادامعا دەيىن كومەك سۇراپ كە­لە­دى. الىس اۋىلداردان ءۇي جانۋارلارى – جىلقى مەن سيىر, ت.ب. حايۋاناتتاردىڭ ءتۇرلى اۋرۋىن ايتىپ, كومەك سۇرايتىندار دا بار. بارلىعىنا دا شاما-شارقىمىزشا كومەكتەسەمىز. ەڭ باستى قيىندىق – ما­مان تاپشىلىعى. جاستار بۇل سالاعا قىزىقپايدى. ويتكەنى جۇمىس وتە اۋىر. بۇل جەرگە حايۋاناتتارعا شىنايى ماحابباتى بار جاندار عانا تۇراقتايدى, – دەيدى ماكسيم.

مىنە, «دامۋ» قورى ارقىلى شارۋاسىن دامىتىپ, قاناتىن كەڭ جا­يىپ كەلە جاتقان كاسىپكەرلەر از ەمەس. قور فيليالىنىڭ قىزمەتكەرلەرى جەرگىلىكتى كاسىپكەرلەرگە ءار­دايىم كومەكتەسىپ, مەملەكەتتىك باع­دار­لامالار جايىندا اقىل-كەڭەس بە­رۋگە دايار.

باتىس قازاقستان وبلىسى