بۇل تۋرالى ىشكى ىستەر ءمينيسترى مارات احمەتجانوۆ ادام ساۋداسىنا قارسى ءىس-قيمىل ماسەلەلەرى جونىندەگى قۇقىقتىق فورۋمدا مالىمدەدى, دەپ حابارلايدى Egemen.kz.
«مەملەكەت باسشىسىنىڭ تاپسىرماسى بويىنشا ءىىم «ادام ساۋداسىنا قارسى ءىس-قيمىل تۋرالى» زاڭ جوباسىن ازىرلەۋدە. بۇل دەكلاراتيۆتى اكت بولماۋى كەرەك. ول قۇقىق قولدانۋداعى بارلىق «اق داقتاردى» جانە «سوقىر ايماقتاردى» جويۋى ءتيىس», دەدى مارات احمەتجانوۆ.
ءىىم باسشىسى بۇگىنگى تاڭدا زاڭ جوباسىندا قىلمىستىق ءىس قوزعاۋعا قاراماستان, «ادام ساۋداسىنىڭ قۇربانى» ۇعىمىنىڭ زاڭنامالىق انىقتاماسى كوزدەلگەنىن ايتتى. وسىلايشا, ونىڭ كەشەندى الەۋمەتتىك كومەك الۋى ءۇشىن قۇقىقتىق نەگىزدەر قۇرىلادى.
سونداي-اق كەشەندى الدىن الۋ جۇمىستارىن ۇيىمداستىرۋ ماقساتىندا العاش رەت «ادام ساۋداسىنىڭ الەۋەتتى قۇربانى» جانە «وسال جاعداي» ۇعىمدارى ەنگىزىلۋدە. وسىلايشا, «تاۋەكەل توبىنا» پروفيلاكتيكالىق كومەك كورسەتۋ شارتتارى مەن نەگىزدەرى جاسالادى. ادام ساۋداسىنا قارسى ءىس-قيمىل جونىندەگى ۆەدومستۆوارالىق جانە وڭىرلىك كوميسسيالاردىڭ قۇقىقتىق مارتەبەسى بەكىتىلەدى. ولارعا وسى سالاداعى قوعامدىق قاتىناستارعا قۇقىقتىق ىقپال ەتۋ قۇزىرەتى بەرىلەدى.
«ولاردىڭ ۇسىنىستارى ۇكىمەتتىك جوسپاردا ەسكەرىلەدى. ال بۇل ناقتى مەرزىمدەر, ورىنداۋشىلار جانە جاۋاپكەرشىلىك», دەپ ءتۇسىندىردى م.احمەتجانوۆ.