تىلسىمىن ىشىنە بۇككەن قۋىرشاق ونەرى ەرتە زاماندارداعى جارمەڭكەلەردەن باستاۋ الىپ, بۇگىندە بالالارعا رۋحاني-مادەني ءومىردىڭ العاشقى باسپالداعى بولىپ وتىر. ساحنادا ءتىرى ادام سەكىلدى ويناپ-كۇلەتىن ءھام ءتۇرلى-ءتۇستى وبرازدارىمەن كوڭىلدى اۋلاپ, جاقىن دوسىڭداي سىر شەرتەتىن قۋىرشاقتار بالا-كورەرمەننىڭ ساناسىنا تەز ءسىڭىپ, رۋحاني يممۋنيتەتىن قالىپتاستىرادى. قۇندىلىقتار اۋىسقان قازىرگى قوعام بالا تاربيەسىنە ىقپال ەتەتىن ساحنالىق مادەني ءىس-شارالارعا مۇقتاج ەكەنى ءمالىم.
مەملەكەت باسشىسى قاسىم-جومارت توقاەۆ جاس ۇرپاقتىڭ بولاشاعىنا اسا ءمان بەرىپ, وسى جىلدى بالالارعا ارنادى. «بالالار – مەملەكەتىمىزدىڭ جارقىن بولاشاعىنىڭ كەپىلى. سوندىقتان دا الداعى جىلدى بالالار جىلى دەپ جاريالاۋ كەرەك دەپ ەسەپتەيمىن. اڭگىمە جالاڭ ۇران مەن مەرەكەلىك شارالار تۋرالى ەمەس. ءبىرىنشى كەزەكتە بيلىك تاراپىنان بالالاردى قورعاۋ ءۇشىن دەنساۋلىق ساقتاۋ, ءبىلىم بەرۋ, الەۋمەتتىك قولداۋ باعىتىندا ناقتى شارالار قولعا الىنۋى كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز», دەگەن ەدى پرەزيدەنت. وسى ورايدا عاسىرعا جۋىق دارا ونەر جولىندا ەڭبەك ەتىپ, قۋىرشاقشىلاردىڭ بىرنەشە بۋىنىن دايىنداپ شىعارعان الماتىداعى مەملەكەتتىك قۋىرشاق تەاترى شىعارماشالىعىندا دۇركىن-دۇركىن بولىپ جاتقان جەتىستىكتەردى اتاپ وتكەن ءجون.
اتالعان ۇجىم جۋىردا قۋىرشاق تەاترلارىنىڭ دامۋ تەندەنتسيالارى, جاڭاشىل باعىتتارى مەن زاماناۋي ەرەكشەلىكتەرىن ايقىنداۋ, قۋىرشاق تەاترى ونەرىنىڭ كوركەمدىك-ەستەتيكالىق ىزدەنىسى ارقىلى تەاتر جانرىنىڭ كوكجيەگىن كەڭەيتۋ, وتاندىق جانە شەتەلدىك تانىمال تەاتر قايراتكەرلەرى مەن حالىقارالىق كاسىبي تەاتر سىنشىلارىمەن ءوزارا ىنتىماقتاستىقتى نىعايتۋ ماقساتىندا وتكەن رەسپۋبليكالىق جانە حالىقارالىق سەگىز تەاتر فەستيۆالىنە قاتىسىپ, ۇزدىكتەر دوداسىندا توپ جاردى.
ماسەلەن, قىركۇيەك ايىنىڭ 20-23 كۇندەرى ارالىعىندا اقتوبە قالاسىندا ۇيىمداستىرىلعان VI حالىقارالىق «اسسالاۋماعالەيكۋم» قۋىرشاق تەاترلار فەستيۆالىندە تەاتر ۇجىمى م.اۋەزوۆتىڭ «اباي جولى» رومانى مەن ابايدىڭ قاراسوزدەرى نەگىزىندە ەرەسەكتەرگە ارنالعان «مەن ءبىر جۇمباق اداممىن... اباي» قويىلىمىمەن باق سىناپ, باس جۇلدەمەن بىرگە «ەرەسەكتەرگە ارنالعان ۇزدىك قويىلىم» اتالىمىن قانجىعاسىنا بايلادى.
بۇل سپەكتاكل ءداستۇرلى ۇردىستەن اۋىتقىعان جاڭاشا باعىت, زاماناۋي فورماتتاعى سيمۆوليكالىق شەشىمدەرمەن قۇرىلىپ, ويشىل فيلوسوفياسىنىڭ تەرەڭ استارىن وزگەشە قىرىنان اشقانىن فەستيۆالدا دا دالەلدەدى. جاس ۇرپاقتىڭ بويىنا اقىننىڭ اسىل مۇراسىن تۇڭعىش قۋىرشاق بەينەسىندە ۇسىنعان سپەكتاكل رەجيسسەرى انتون زايتسەۆ تەك اباي ءومىر سۇرگەن كەزەڭدى عانا ەمەس, كۇللى ادامزات تاريحى مەن تىرشىلىگىنەن حابار بەرىپ, بارشا ۇلت تابيعاتىن ءتۇرلى دەتالدار مەن وبرازدار جيىنتىعىمەن بەرەدى.
ەسكە سالساق, كوكتەمدە قۋىرشاق تەاترى اقتوبە قالاسىندا ەرەسەكتەرگە ارنالعان «ماكبەت. يلليۋزيا» قويىلىمىمەن V حالىقارالىق «balausa» ەكسپەريمەنتالدى سپەكتاكلدەر فەستيۆالىندە «ۇزدىك قويىلىم», «ۇزدىك ستسەنوگرافيا» نوميناتسيالارىن يەلەنىپ, باس جۇلدەنى جەڭىپ العان بولاتىن.
سونداي-اق 20-23 قىركۇيەك كۇندەرى ماڭعىستاۋدا II حالىقارالىق «Abish alemi» تەاترلار فەستيۆالىندە قۋىرشاق تەاترى كەزەكتى مارتە توپ جارىپ, ۋ.شەكسپيردىڭ «رومەو مەن دجۋلەتتا» قويىلىمى ءۇشىن «ۇزدىك رەجيسسەرلىك جۇمىس» اتالىمىنان يە بولدى. بۇل بايقاۋعا شەتەلدىك جانە وتاندىق 9 تەاتر ۇجىمى قاتىسقان ەدى.
ودان بولەك بولگاريا رەسپۋبليكاسىنىڭ ۆارنا قالاسىندا 1-7 قازان ارالىعىندا ءۇش جىلدا ءبىر رەت ۇيىمداستىرىلاتىن بەدەلدى تەاتر فەستيۆالدارىنىڭ ءبىرى – XVII حالىقارالىق «التىن دەلفين» قۋىرشاق تەاترلار فەستيۆالىنە الماتىلىق ۇجىم الەمنىڭ 38 ەلىنەن 135 ونەر مەكەمەلەرى ۇسىنعان 160 ءوتىنىم اراسىنان ىرىكتەلىپ شىقتى. بولگاريا, وڭتۇستىك كورەيا, يتاليا, قىتاي, وڭتۇستىك افريكا, تۇركيا ەلدەرىنەن بارلىعى 14 تەاتر ۇجىمى دوداعا تۇسكەن بايقاۋدا تەاتر ۇجىمىنا ۋ.شەكسپيردىڭ كلاسسيكاسى «رومەو مەن دجۋلەتتا» قويىلىمى ءۇشىن باس جۇلدە بۇيىردى.
سونىمەن قاتار قۋىرشاق تەاترىنىڭ تالانتتى ءارتىسى شوحان قۇلنازاروۆ – تيبالت, لورەنتسو, كاپۋلەتتي, مونتەككي, بەنۆوليو رولدەرى ءۇشىن «ەڭ ۇزدىك ەر ادام رولىنە» يە بولسا, جاس بۋىن ارتىستەر ۇلان اسانبەك جانە ۇلپان سەرىك «ەڭ ۇزدىك دەبيۋت» نوميناتسياسىمەن جەڭىس قورجىنىن تولىقتىردى. شىرعالاڭعا تولى ماحاببات, وشپەندىلىك, ساعىنىش پەن باتىلدىقتى زامانىنا ساي تۇلەتكەن قويىلىمنىڭ رەجيسسەرى – دينا جۇماباي. سۋرەتشىسى – يۋليا چەرنوۆا, بالەتمەيستەرى – اننا تسوي, قۋىرشاقتاردى جاساۋشى شەبەرى – نيكولاي پروسكۋرين.
ال انكارا قالاسىندا 19-25 كۇندەرى ارالىعىندا «Tempo» قۋىرشاق تەاترىنىڭ ۇيىمداستىرۋىمەن وتكەن VIII حالىقارالىق «انكارا» قۋىرشاق تەاترلار فەستيۆالىندە ەرنەست حەمينگۋەيدىڭ العاش رەت قۋىرشاقتار تىلىندە سويلەگەن شىعارماسى ۇسىنىلدى. تەلەگەي تەڭىزدىڭ تاڭعاجايىپ سۇلۋلىعىمەن قاتار, سۇراپىل داۋىلى مەن سۇستى مىنەزىن, ءومىر ىشىنەن ءولىم, ءولىم ىشىنەن ءومىر ىزدەگەن سانتياگو شال مەن بالىق اراسىنداعى الىس ارمانعا ۇمتىلىس پەن جانكەشتى كۇرەستى باياندايتىن, ادامنىڭ ارمانعا دەگەن ادالدىعى, وعان جەتۋ جولىنداعى ۇزىلمەس ءۇمىت پەن كۇدىككە بايلانعان تاعدىرىن سۋرەتتەيتىن ەرەسەكتەرگە ارنالعان «شال مەن تەڭىز» (رەج. د.جۇماباي) قويىلىمى ارنايى ديپلومدى الدى.
ونەر جارىستارىنىڭ قورىتىندىسى بولعان 25-29 قازان ارالىعىندا كوكشەتاۋ قالاسىندا وتكەن IV حالىقارالىق «تەART-كوكشە» تەاتر فەستيۆالىندە الماتى مەملەكەتتىك قۋىرشاق تەاترىنىڭ ۇجىمى ۋ.شەكسپيردىڭ «ماكبەت. يلليۋزيا» سپەكتاكلىمەن قاتىسىپ, ماكبەت وبرازىن سومداۋشى شوحان قۇلنازاروۆ اقمولا وبلىستىق ورىس دراما تەاترىنىڭ نەگىزىن قالاۋشى, بەلگىلى رەجيسسەر, اكتەر ياكوۆ كۋكلينسكي اتىنداعى ارنايى سىيلىققا يە بولدى.
مۇنداي فەستيۆالدار, ەڭ الدىمەن ونەردە باسەكە بارىن دالەلدەيدى. شىن تالانت, شىن شەبەرلىك ارقاشان مويىندالاتىنى دا اقيقات. سونداي-اق تەاترلار اراسىنداعى دودالار ءار ۇجىمنىڭ دەڭگەيىن, شىعارماشىلىق الەۋەتىن كورسەتەدى. اسىرەسە بيىلعى بالالار جىلىنىڭ قارساڭىندا قاراشاڭىراق قۋىرشاق تەاترىنىڭ اتالعان جەڭىستەرى كوڭىل قۋانتادى. بالدىرعانداردىڭ سۇيىكتى تەاترىنىڭ مارتەبەسى ارتا بەرسىن دەيمىز.