الداعى 29 مامىردا ەۋرازيالىق ەكونوميكالىق وداق تۋرالى كەلىسىمگە قول قويىلۋى ماڭىزدى تاريحي وقيعا بولادى, دەپ اتاپ ءوتتى سەنات توراعاسى قاسىم-جومارت توقاەۆ قازاقستان پارلامەنتى سەناتى مەن رەسەي فەدەرالدىق جينالىسى فەدەراتسيا كەڭەسى پارلامەنتتىك ىنتىماقتاستىق كوميسسياسىنىڭ بەسىنشى وتىرىسىنا قاتىسۋشىلارمەن كەزدەسۋى كەزىندە.
ق.توقاەۆ قازاقستان پرەزيدەنتى ن.نازارباەۆتىڭ 20 جىل بۇرىن وداق قۇرۋ تۋرالى باستاما كوتەرىپ, ءسوز سويلەگەنىن, ەندى ونىڭ قاجىرلى ەڭبەگىنىڭ ناتيجەسىندە بۇل يدەيا جۇزەگە اسىپ جاتقانىن ەسكە سالدى. توراعانىڭ پىكىرىنشە, ەڭ باستىسى, جاڭا تاريحي جانە گەوساياسي جاعدايدا ءبىر-بىرىمەن دوستىق جانە كەلىسىمدە ءومىر سۇرگىسى كەلەتىن ءۇش مەملەكەت حالىقتارىنىڭ مۇقتاجىنا تولىقتاي جاۋاپ بەرەتىن ەكونوميكالىق وداقتىڭ قۇرىلۋى بولىپ تابىلادى. «ەكونوميكالىق ىقپالداستىقتى دامىتۋ وداقتىڭ بارلىق قاتىسۋشىلارىنا دا ءتيىمدى, ونىڭ ۇستىنە الەمدىك ەكونوميكاعا ەكونوميكالىق جانە قارجى داعدارىستارى تەرىس اسەرىن تيگىزۋدى جالعاستىرىپ كەلەدى», دەدى ول.
ق.توقاەۆتىڭ ايتۋىنشا, بۇگىنگى كۇنى الەمدە قۇرىلىپ, قىزمەت ەتىپ جاتقان 200 ىقپالداستىق ءبىرلەستىكتەر اراسىندا ەاەو-نىڭ ءوزىن مەيلىنشە ءتيىمدى جانە تابىستى ەتىپ كورسەتەتىنىنە تولىق نەگىز بار. بىراق, ول ءۇشىن قاجىرلى قىزمەت ەتۋگە تۋرا كەلەدى.
«كوپ نارسە ەاەو-عا قاتىسۋشى مەملەكەتتەر بيلىكتەرىنىڭ بارلىق تارماقتارىنىڭ جۇمىستارىنا بايلانىستى بولادى. ءبىز, قازاقستان مەن رەسەي پارلامەنتتەرى جوعارعى پالاتالارىنىڭ دەپۋتاتتارى جان-جاقتى ىقپالداستىقتى زاڭنامالىق تۇرعىدا قامتاماسىز ەتۋ ءۇشىن بارلىق مۇمكىندىكتەردى جاسايمىز. نۇرسۇلتان نازارباەۆ اتاپ وتكەندەي, ەۋرازيالىق ەكونوميكالىق وداق – الەمدىك قارجى جانە ەكونوميكالىق داعدارىستارعا لايىقتى جاۋاپ بولماق», دەدى ول.
كەزدەسۋ بارىسىندا سەنات توراعاسى ۇلى وتان سوعىسىنداعى جەڭىستىڭ 70 جىلدىعىن مەرەكەلەۋگە بىرلەسە ازىرلىك جاساۋعا قازاقستان جانە رەسەي سەناتورلارىنىڭ نازارىن اۋداردى.
قازاقستان رەسپۋبليكاسى پارلامەنتى سەناتى مەن رەسەي فەدەراتسياسى فەدەرالدىق جينالىسى فەدەراتسيا كەڭەسى اراسىنداعى ىنتىماقتاستىق جونىندەگى كوميسسيا ەكى ەلدىڭ جوعارى زاڭ شىعارۋ ورگاندارى جوعارعى پالاتالارى اراسىنداعى ىنتىماقتاستىق تۋرالى كەلىسىم اياسىندا قىزمەت ەتەدى. ونىڭ قازىرگى كەزدە بەسىنشى وتىرىسى ءوتىپ وتىر. شاراعا قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى قايرات يششانوۆ, رەسەي فەدەرالدىق جينالىسى فەدەراتسيا كەڭەسى توراعاسىنىڭ ورىنباسارى يلياس ۋماحانوۆ جانە ەكى ەلدىڭ باسقا دا پارلامەنتشىلەرى قاتىستى.
استاناداعى وتىرىستىڭ كۇن ءتارتىبىندە مادەنيەت سالاسىنداعى ىنتىماقتاستىقتىڭ كەلەشەگى, رەسەيدەن قازاقستانعا سۋ بەرۋ قىزمەتىنە تاريف قالىپتاستىرۋ ماسەلەلەرى, ەۋرازيالىق ىقپالداستىق بىرلەستىك يدەياسىن ءتۇسىندىرۋ جانە ىلگەرىلەتۋ سالاسىنداعى بىرلەسكەن اقپاراتتىق جۇمىستاردى ىسكە اسىرۋ مىندەتتەرى, سونداي-اق, بىرقاتار ۇيىمداستىرۋ ماسەلەلەرى بار, دەپ حابارلادى پارلامەنت سەناتىنىڭ ءباسپاسوز قىزمەتى.