بولات قالىمبەتوۆ تۇسىرگەن «مۇقاعالي» ءفيلمى دۋبايداعى مeta Film Fest كينوفەستيۆالىندە باس جۇلدەگە يە بولدى. تاياۋ شىعىس, ازيا جانە افريكا كينو ءوندىرىسىن قامتيتىن Meta Film Fest جاڭا حالىقارالىق كينوفەستيۆال 27 قازاندا دجۋمەيرا پالماسىنداعى Nakheel Mall-داعى Vox Cinemas كينوتەاترىندا باستالعان ەدى. فەستيۆالدە 25 ەلدەن 70-تەن استام فيلم كورسەتىلدى.
بايقاۋ باعدارلاماسىنا «مۇقاعالي», « ۇلى دالا تاڭى», «اقىن» جانە «كونوكرادى» اتتى ءتورت قازاقستاندىق فيلم تاڭدالعان بولاتىن. مۇقاعالي ماقاتاەۆتىڭ 90 جىلدىعىنا ارنالعان «مۇقاعالي» كينوكارتيناسى اقىن ءومىرىنىڭ سوڭعى جىلدارى تۋرالى باياندايدى. ءفيلمدى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى ءتۇسىردى.
ايتا كەتەيىك, كينونىڭ ستسەناريىن جازۋشى جۇسىپبەك قورعاسبەك رەجيسسەر بولات قالىمبەتوۆ پەن عازيز ناسىروۆ بىرلەسىپ جازدى. فيلم قازاقستاندىق پروكاتقا 2021 جىلدىڭ 21 قازانىندا شىققان بولاتىن. ال الەمدىك پرەمەراسى 25-ءشى (PÖFF) تاللين كينوفەستيۆالى اياسىندا ءوتتى. وندا قازاقستاندىق كارتينا ەكۋمەنيكالىق قازىلار القاسىنىڭ جۇلدەسىنە يە بولدى. بيىل ناۋرىز ايىندا ومىرباياندىق كارتينا كەرالاداعى ء(ۇندىستان) 26-شى حالىقارالىق كينوفەستيۆالدىڭ «الەمدىك كينو» سەكتسياسىندا ۇسىنىلدى. ودان بولەك جۋىردا «مۇقاعالي» ءفيلمى قازان كينوفەستيۆالىندە قازىلار القاسىنىڭ ارنايى جۇلدەسىن جەڭىپ الدى. سونداي-اق فيلم گاتچينادەگى (رەسەي) «ادەبيەت جانە كينو» حالىقارالىق كينوفەستيۆالىندە قويۋشى-سۋرەتشى ەرمەك وتەگەنوۆتىڭ ۇزدىك جۇمىسى ءۇشىن قازىلار القاسىنىڭ ارنايى ديپلومىنا يە بولعان ەدى.