«Astana Media Week» مەديا اپتالىعى اياسىندا باسپا, راديو, ينتەرنەت-جۋرناليستيكا سالاسىنداعى ۇزدىكتەرگە تاپسىرىلاتىن «ۇركەر» ۇلتتىق بايگەسىنىڭ جەڭىمپازدارى ماراپاتتالدى. قازىلار القاسى 544 شىعارماشىلىق جۇمىستىڭ ىشىنەن ەڭ تاڭداۋلىسىن ىرىكتەدى. بيىلعى بايگە ۇلت ۇستازى احمەت بايتۇرسىن ۇلىنىڭ 150 جىلدىعىنا ارنالدى.
قازمەديا ورتالىعىندا وتكەن سالتاناتتى كەشتە اقپارات جانە قوعامدىق دامۋ ءمينيسترى دارحان قىدىرالى مەملەكەت باسشىسى قاسىم-جومارت توقاەۆتىڭ قۇتتىقتاۋ ءسوزىن وقىپ بەردى.
«Astana Media Week» – اقپاراتتىق ىنتىماقتاستىقتى نىعايتۋعا, وتاندىق بۇقارالىق اقپارات قۇرالدارىنىڭ قازىرگى قوعامداعى ءرولى مەن الەۋەتىن ايشىقتاۋعا ارنالعان اۋقىمدى ديالوگ الاڭى. الەمدىك ءداستۇرلى مەديا ماماندارى, حالىقارالىق ساراپشىلار قاتىساتىن كوممۋنيكاتسيا سالاسىنداعى كەزدەسۋلەر, تالقىلاۋلار مەن تاجىريبە الماسۋلار وتاندىق مەديانىڭ دامۋىنا تىڭ سەرپىن بەرەدى. اقپارات سالاسى ازاماتتىق قوعامنىڭ قالىپتاسۋىنا ەرەكشە ۇلەس قوسىپ كەلەدى. ازاماتتار ءوز پىكىرىن ەركىن جەتكىزىپ, جۋرناليستەر قوعامداعى وزەكتى ماسەلەلەردى اشىق ايتادى. بۇل ەلىمىزدە ادىلەتتى قوعامدى قۇرۋعا سەپتىگىن تيگىزەتىن ماڭىزدى ءۇردىس», دەلىنگەن پرەزيدەنتتىڭ قۇتتىقتاۋىندا.
ماراپاتتاۋ كەشىنە قاتىسقان مەملەكەتتىك كەڭەسشى ەرلان قارين احمەت بايتۇرسىن ۇلىنىڭ قازاق تاريحىنداعى ەلەۋلى ەڭبەگىنە توقتالىپ, قولىنا قالام ۇستاعان بۇگىنگى بۋىن اقاڭنىڭ سارا جولىن لايىقتى جالعاستىرىپ كەلە جاتقانىن اتاپ ءوتتى.
سونداي-اق سالتاناتتى كەشتە ءسوز العان قىرعىزستاننىڭ مادەنيەت, اقپارات, سپورت جانە جاستار ساياساتى ءمينيسترى التىنبەك ماقسۇتوۆ باق-تىڭ وزەكتى ماسەلەلەرىن تالقىلاعان «Astana Media Week» اپتالىعىنىڭ جوعارى دەڭگەيدە ۇيىمداستىرىلعانىن, جۋرناليستەر ەڭبەگىن باعالايتىن «ۇركەر» سىيلىعىنىڭ يگى ءۇردىس ەكەنىن اتاپ ءوتتى.
جۇزدەن جۇيرىكتەرگە جۇلدە بيىل ون اتالىم بويىنشا بەرىلدى. سونىمەن قاتار ءۇش ارنايى سىيلىق تاعايىندالدى. ارنايى سىيلىقتىڭ ءبىرى بيىل 150 جىلدىعى اتالىپ جاتقان ۇلت ۇستازى احمەت بايتۇرسىن ۇلى اتىندا بولسا, ەكىنشىسى جۋرناليستيكا جامپوزى, حالىق جازۋشىسى شەرحان مۇرتازانىڭ, تاعى ءبىرى – بەلگىلى جۋرناليست باتىر قازىباەۆ اتىنداعى ارنايى سىيلىق.
ماراپاتتاۋعا دەيىن ءار اتالىم بويىنشا ۇزدىك ۇمىتكەرلەردىڭ ءتىزىمى جاريالانعان بولاتىن. سالتاناتتى كەشتە سولاردىڭ ىشىنەن جالعىز جەڭىمپاز تاڭدالىپ, 1 ملن تەڭگە قارجىلاي سىياقى جانە ەستەلىك مۇسىنشە تابىستالدى.
ۇزدىكتەرگە توقتالساق, «جىلدىڭ ۇزدىك سۇحباتى» اتالىمى Halyq-uni.kz پورتالىنىڭ ءتىلشىسى ايا ومىرتايعا بۇيىردى. «جىلدىڭ ۇزدىك رەپورتاجى» اتالىمىندا Aikyn.kz سايتىنىڭ ءتىلشىسى انار قونىس توپ جاردى. «الەۋمەتتىك تاقىرىپتاعى ۇزدىك ماتەريال» اتالىمىندا Halyq-uni.kz پورتالىنىڭ ءتىلشىسى نايما ءنۇرالى ۇزدىك شىقتى. «جىلدىڭ ۇزدىك جۋرناليستىك زەرتتەۋى» اتالىمىنىڭ جەڭىمپازى بولىپ «Egemen Qazaqstan» رەسپۋبليكالىق گازەتىنىڭ ءجۋرناليسى قازبەك قۇتتىمۇرات ۇلى تانىلدى. «جىلدىڭ ۇزدىك اناليتيكالىق ماتەريالى» اتالىمىندا «ماڭعىستاۋ» گازەتىنىڭ ءتىلشىسى ۆالەنتينا قوزىباقوۆا جەڭىمپاز اتانسا, «حالىقارالىق تاقىرىپتاعى ۇزدىك ماتەريالى» اتالىمىن Qmonitor.kz ءتىلشىسى ساۋلە يساباەۆا يەلەندى. «جىلدىڭ ۇزدىك جاڭالىقتار پورتالى» اتالىمىندا Zakon.kz پورتالى دارا شىقتى. راديوستانساداعى ۇزدىك جوبا اتالىمىندا Qazaq راديوسىنىڭ «وي-ءتۇيىن» باعدارلاماسى جەڭىسكە جەتتى. «جىلدىڭ ۇزدىك فوتوسۋرەتى» اتالىمى Zakon.kz ءفوتوتىلشىسى مەيىربەك تاجكۋرانوۆقا بۇيىردى. «Saryarqa samaly» گازەتى «ۇزدىك وڭىرلىك باق» دەپ تانىلدى.
ال احمەت بايتۇرسىن ۇلى اتىنداعى ارنايى سىيلىققا «قىرعىز ادەبيەتى» جوباسىمەن «تاڭ-شولپان» جۋرنالى يە بولدى. شەرحان مۇرتازا اتىنداعى ارنايى جۇلدەنى بەلگىلى قالامگەر, «انا ءتىلى» گازەتىنىڭ باس رەداكتورى قالي سارسەنباي يەلەندى. باتىر قازىباەۆ اتىنداعى ارنايى سىيلىقتان ۇمىتكەرلەر اراسىندا Ernur.kz سايتى ءتىلشىسى ايگەرىم بەگىمبەتتىڭ جوباسى ۇزدىك دەپ تانىلدى.
مەملەكەت باسشىسىنىڭ مەديا اپتالىق قاتىسۋشىلارىنا ارنايى قۇتتىقتاۋ جولداۋى مەرەيلى ءساتتىڭ ماڭىزىن ەسەلەي تۇسەتىنىن ايتقان اقپارات جانە قوعامدىق دامۋ ءمينيسترى دارحان قىدىرالى: «ناعىز كاسىبي پىكىرتالاس الاڭىنا اينالعان مەديا جيىننىڭ «ۇركەر» سەكىلدى بەدەلدى بايقاۋمەن اياقتالۋىنىڭ ءجونى بار. ويتكەنى بۇل ەكى ءىس-شارا دا جۋرناليستيكانىڭ جوعىن جوقتاپ, قالامنىڭ قاسيەتىن قۇرمەتتەگەن ارىپتەستەردىڭ بۇگىندى باعامداپ, بولاشاعىمىزدى بولجاپ الۋىنا تىنىس بەرگەن باسقوسۋ. ءىس-شارا ۇلت ۇستازىنىڭ 150 جىلدىق مەرەيتويىمەن تۇسپا-تۇس كەلگەندىكتەن ءارى بۇگىنگى قالام ۇستاعان بۋىننىڭ بۇلاق باستاۋىندا احاڭ تۇرعاندىقتان بيىلعى «ۇركەردى» احمەت بايتۇرسىن ۇلىنىڭ قۇرمەتىنە ارنادىق», دەدى.
ەستەرىڭىزگە سالا كەتەيىك, ۇلتتىق بايگەنىڭ ۇيىمداستىرۋشىلارى – اقپارات جانە قوعامدىق دامۋ مينيسترلىگى جانە «مەديا دامىتۋ قورى» كورپوراتيۆتىك قورى. ءىس-شارانىڭ دەمەۋشىلەرى – «قازاقستان» رترك» اق جانە «حابار» اگەنتتىگى» اق. 2017 جىلدان بەرى بايقاۋعا بارلىعى 3 377 ماتەريال ءتۇسىپ, ونىڭ 300-ءى شورت-پاراعىنا ەنگەن.
بيىل «Astana Media Week» مەديا اپتالىعىنا 11 ەلدەن 150-گە جۋىق شەتەلدىك جانە وتاندىق سپيكەر, مەديا مەنەدجەرلەر, ەلىمىزدىڭ ءىرى مەديا ۇيىمدارىنىڭ باسشىلارى, جۋرناليستەر, بلوگەرلەر, تاۋەلسىز ساراپشىلار, Meta, ءTىkTok, Nickelodeon, Coursera سەكىلدى شەتەلدىك ۇيىمداردىڭ وكىلدەرى قاتىسىپ, سالاداعى وزەكتى ماسەلەردى تالقىلاپ, ءتۇرلى ماستەر كلاستار ۇيىمداستىردى.