ونەردە جۇرگەن 40 قاراعاندىلىققا جاڭا باسپانا بۇيىردى. وسى سالادا ەڭبەك ەتەتىن, جىلدار بويى ءۇي كەزەگىندە تۇرعان ماماندارعا پاتەرلەر دوسكەي اۋىلىنان بەرىلدى. وبلىس باسشىلىعىنىڭ ايتۋىنشا, الداعى ۋاقىتتا تاعى 100 پاتەرلى ەكى ءۇي ەل يگىلىگىنە تاپسىرىلماق.
ايماقتا مادەنيەت قىزمەتكەرلەرىنىڭ باسپانالى بولۋى – وبلىس اكىمى نازارىندا تۇرعان ماسەلە. بۇعان دەيىن بىرقاتار مامان ساران جانە اقتاس كەنتىنەن پاتەر العان-دى. وندا 30 پاتەر كىلتى تابىستالعان. مۇعالىمدەر مەن دارىگەرلەر دە ۇيمەن قامتىلۋدا. س.سەيفۋللين اتىنداعى اكادەميالىق قازاق دراما تەاترىنىڭ ترۋپپا مەڭگەرۋشىسى جانار راحمانوۆاعا ءۇش بولمەلى پاتەر ءتيدى.
– كامەلەتكە تولماعان ەكى بالام بار. بۇگىنگە دەيىن پاتەر جالداپ كەلگەن ەدىك. ءۇيىمىز – ءۇش بولمەلى. كەڭ, ەڭسەلى, ۇلكەن, بارىمىزگە جەتەدى. قۋانىشىمىزدا شەك جوق, – دەيدى جانار راحمانوۆا.
سونىمەن قاتار وڭىردە كەنشىلەر, مەتاللۋرگتەر جانە جۇمىس ىستەيتىن جاستارعا جەڭىلدەتىلگەن يپوتەكا بار. مۇنىڭ سىرتىندا وزگە دە مەملەكەتتىك باعدارلامالار ارقىلى دا باسپانا العاندار كوپ. ايتالىق, «نۇرلى جەر» باعدارلاماسىمەن رەسپۋبليكا كۇنىنە وراي تەمىرتاۋدا 90 تۇرعىنعا پاتەر كىلتى تابىستالدى. ال جىل سوڭىنا دەيىن قاراعاندى وبلىسىندا ءتۇرلى باعدارلامالار ەسەبىنەن 2 مىڭعا جۋىق وتباسى باسپانالى بولادى دەپ كۇتىلۋدە.
مەرەكەدە مەتاللۋرگتەر مەكەنى الەۋمەتتىك نىساندارمەن تولىعا ءتۇستى. اتاپ ايتقاندا, تەمىرتاۋدا جاڭا ەمحانا اشىلدى. ەمحانا مەملەكەت جەكەمەنشىك ارىپتەستىك اياسىندا ەكىنشى شاعىن اۋداندا سالىندى. جاڭا ەمحاناعا 20 مىڭ ادام تىركەلە الادى. سونداي-اق تەمىرتاۋلىقتار قۋانىشىن «وديسسەي» مادەني-ساۋىقتىرۋ كەشەنىنىڭ پايدالانۋعا بەرىلۋى ەسەلەي ءتۇستى.
قاراعاندى وبلىسى