رەسپۋبليكا كۇنى مەرەكەسىندە اقمولا پوليتسەيلەرى جاڭا قىزمەتتىك اۆتوكولىكتەرگە يە بولسا, شالعايداعى شاعىن اۋىلدىڭ مەكتەپتەرىنە وقۋشىلاردى تاسىمالداۋعا قاجەتتى جيىرماعا جۋىق اۆتوبۋس بەرىلدى.
وڭىردە مەرەيلى مەرەكەگە وراي كوپتەگەن ءىس-شارا جوسپارلانعان بولاتىن. كوپشىلىككە قۋانىش سىيلاعان ايتۋلى كەزدەسۋلەر مەن جيىندار دا ۇيىمداستىرىلدى.
– بۇل ءبىز ءۇشىن وتە قۋانىشتى ءسات. اۋدانىمىزدىڭ 8 ءبىلىم وشاعىنا 320 وقۋشى اۋىلداردان قاتىناپ وقيدى. وقۋشىلاردىڭ قاۋىپسىزدىگىن قامتاماسىز ەتىپ, ۋاقتىلى قاتىناۋىنا كورسەتىلگەن جاقسى قامقورلىق بولدى, – دەيدى ءبىرجان سال اۋداندىق ءبىلىم ءبولىمىنىڭ باسشىسى اقكەنجە اقشالوۆا.
مەرەكەلىك ءىس-شارالار اياسىندا ۇلگىلى ۇستازدار, دارىگەرلەر, بويىنداعى كۇش-قايراتىن ادال ەڭبەككە ارناعان قاراپايىم جۇمىسشىلار جوعارى ماراپاتتارعا يە بولدى. ولار وزدەرىنىڭ ناتيجەلى ەڭبەكتەرىمەن قوعام بايلىعىن ەسەلەۋگە, بىرلىكتى نىعايتىپ, بەرەكەنى مولايتۋعا ۇلەس قوسۋدا.
– قازاقستاندا ءومىر سۇرگەلى جارتى عاسىردان استى. العاشقىدا سپورت سالاسى ارقىلى كەلگەن ەدىم. كەيىن كەڭ پەيىل حالىقتىڭ ىستىق ءىلتيپاتىن ۇناتىپ, وسى جەردىڭ سۋىن ءىشىپ, بۇيىرعان ءدامىن تەرىپ ءجۇرمىن. وسىنشا ۋاقىت بويى ءوزىمنىڭ سۇيىكتى وتانىما اينالعان ەلگە سۇبەلى ۇلەس قوسىپ, تىربانىپ ەڭبەك ەتۋدەمىن. ەڭ باستىسى, ءبىر-ءبىرىن الالامايتىن بەكەم بىرلىگى بار ەلدىڭ بەرەكەسى دە مول, – دەيدى شورتاندى اۋدانىنىڭ شارۋا قوجالىعىنىڭ باسشىسى شالۆا دجاحۋتاشۆيلي.
ءسوز اراسىندا وڭىردەگى ونەركاسىپ سالاسى ايرىقشا قارقىنمەن دامىپ كەلە جاتقاندىعىن ايتا كەتسەك, ارتىقتىعى بولماس. وسى جىلى سالا سەرپىنى بۇرىن-سوڭدى بولماعان دەڭگەيگە جەتتى. جىل باسىنان بەرى 1,5 ترلن تەڭگەنىڭ ءونىمى ءوندىرىلدى. اسىرەسە اگرارلىق سەكتور, مەتاللۋرگيا, حيميا ونەركاسىبىندە دامۋ قارقىنى وتە جوعارى. ايتپاقشى, مەرەكە قارساڭىندا وتىزدان استام نىسان پايدالانۋعا بەرىلدى. تۇرعىن ءۇي, ونەركاسىپ نىساندارى, شالعايداعى شاعىن اۋىلدارداعى سپورت الاڭدارى مەن ستاديوندار حالىق يگىلىگىنە بەرىلدى. وسىنىڭ بارلىعى ەل ەڭسەسىن كوتەرۋگە باعىتتالعان اۋقىمدى ءىس ەكەندىگى بەلگىلى.
اقمولا وبلىسى