سەنات توراعاسى ماۋلەن اشىمباەۆ ءبىر توپ پارلامەت دەپۋتاتىمەن بىرگە تمد پارلامەنتارالىق اسسامبلەياسىنىڭ ءىس-شارالارىنا جانە قازاقستان مەن وزبەكستان پارلامەنتتەرى سەناتتارى اراسىنداعى ىنتىماقتاستىق جونىندەگى كوميسسيانىڭ جۇمىسىنا قاتىسۋ ءۇشىن وزبەكستانعا باردى, دەپ حابارلايدى Egemen.kz.
ماۋلەن اشىمباەۆ تمد پاا كەڭەسىنىڭ وتىرىسىندا سويلەگەن سوزىندە بيىل قازاقستان تاۋەلسىز مەملەكەتتەر دوستاستىعىنا توراعالىق ەتەتىنىنە توقتالدى. سونداي-اق ول ءوزارا مۇددەلى سالالارداعى ءىس-قيمىلدى نىعايتۋعا جانە ىنتىماقتاستىقتى ارتتىرۋعا باعىتتالعان جۇمىستىڭ نەگىزگى باسىمدىقتارى مەن ناتيجەلەرىنە نازار اۋداردى.
سەنات توراعاسى تمد سامميتىندە قازاقستان پرەزيدەنتى قاسىم-جومارت توقاەۆ دوستاستىق اياسىنداعى ىنتىماقتاستىقتى دامىتۋ بويىنشا بىرقاتار جاڭا باستاما ۇسىنعانىن اتاپ ءوتتى. وسىعان وراي ماۋلەن اشىمباەۆ ارىپتەستەرىن قازاقستاننىڭ ۇسىنىستارىن قولداۋعا شاقىردى. ودان بولەك, پارلامەنتتىك ديپلوماتيانى ودان ءارى ىلگەرىلەتۋدىڭ جانە تمد ەلدەرىنىڭ زاڭ شىعارۋشى ورگاندارى اراسىنداعى ىنتىماقتاستىقتى نىعايتۋدىڭ ماڭىزدىلىعىن تىلگە تيەك ەتتى.
«پراگماتيكالىق جانە ءوزارا سەنىمدىلىك باعىتىندا بىرلەسكەن جۇمىسىمىزدى دايەكتى تۇردە جالعاستىرۋ وتە ماڭىزدى. ءبىزدىڭ ەلدەرىمىزدىڭ ۇلتتىق مۇددەلەرىن ءوزارا قۇرمەتتەۋگە نەگىزدەلگەن جان-جاقتى ىنتىماقتاستىق دوستاستىق كەڭىستىگىندە ۇزاق مەرزىمدى ورنىقتى دامۋدىڭ ىرگەتاسى ەكەنى انىق. بۇل ەكونوميكانىڭ وسۋىنە جانە بارلىق مۇشە ەلدەر ازاماتتارىنىڭ ءال-اۋقاتىن ارتتىرۋعا جاعداي جاسايدى. ءدال وسىنداي فورماتتا تمد پارلامەنتارالىق اسسامبلەياسى الاڭىنداعى ءوزارا ءىس-قيمىل جانە ديالوگ قالىپتاسادى», دەدى ماۋلەن اشىمباەۆ.
سەنات سپيكەرى قازاقستان كونستيتۋتسياسىنا وزگەرىستەر مەن تولىقتىرۋلار ەنگىزۋ ماسەلەلەرى جونىندەگى رەسپۋبليكالىق رەفەرەندۋمعا حالىقارالىق بايقاۋشىلار توبىن جىبەرگەنى ءۇشىن تمد ەلدەرىنىڭ پارلامەنتارالىق اسسامبلەياسى مەن پارلامەنتتەرىندەگى ارىپتەستەرىنە العىس ءبىلدىردى.
«قازاقستان ءۇشىن بۇل رەفەرەندۋمنىڭ تاريحي ماڭىزى زور بولدى. رەفەرەندۋمنىڭ ناتيجەسى مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان اۋقىمدى كونستيتۋتسيالىق رەفورمالاردى بەكىتە ءتۇستى. قازاقستاندىقتار جۇيەلى وزگەرىستەر مەن ەۆوليۋتسيالىق دامۋدى قولداپ داۋىس بەردى. كونستيتۋتسياعا ەنگىزىلگەن تۇزەتۋلەردىڭ قابىلدانۋى ەلىمىزدىڭ بيلىك ينستيتۋتتارىن قالىپتاستىرۋ مەن ءوزارا ءىس-قيمىلدىڭ جاڭا مودەلىنە كوشۋگە جول اشادى», دەگەن ماۋلەن اشىمباەۆ دوستاستىقتىڭ پارلامەنتشىلەرىن بيىلعى 20 قاراشادا وتەتىن قازاقستان رەسپۋبليكاسى پرەزيدەنتىنىڭ مەرزىمىنەن بۇرىن سايلاۋىنا دايىندىق پەن ونى وتكىزۋ بارىسىن باقىلاۋعا بەلسەندى قاتىسۋعا شاقىردى.