مەملەكەت باسشىسى قاسىم-جومارت توقاەۆ پەن ەۋروپالىق كەڭەس پرەزيدەنتى شارل ميشەل كەلىسسوزدەردەن كەيىن بۇقارالىق اقپارات قۇرالدارىنىڭ وكىلدەرى ءۇشىن بريفينگ وتكىزدى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
بريفينگ بارىسىندا مەملەكەت باسشىسى ەۋروپالىق كەڭەس پرەزيدەنتى شارل ميشەلدىڭ قازاقستانعا العاش رەت رەسمي ساپارمەن كەلىپ وتىرعانىن ايتىپ, ءوزىنىڭ شاقىرۋىن قابىل العانى ءۇشىن ريزاشىلىعىن ءبىلدىردى.
«كەلەسى جىلى قازاقستان مەن ەۋروپالىق وداق اراسىندا ديپلوماتيالىق قاتىناس ورناعانىنا 30 جىل تولادى. سوندىقتان شارل ميشەل مىرزانىڭ ساپارى وسى مەرەيلى مەجە قارساڭىندا ءوتىپ وتىرعانى ەرەكشە قۋانتادى. ءبىز بۇل ساپارعا ايرىقشا ءمان بەرەمىز. پرەزيدەنت ميشەلدىڭ قازاقستان مەن ەۋرووداق اراسىنداعى ىنتىماقتاستىقتى نىعايتۋعا قوسىپ وتىرعان سۇبەلى ۇلەسىن جوعارى باعالايمىز. ءبىز ەكىجاقتى ىقپالداستىعىمىزدى جاڭا ساپالى دەڭگەيگە كوتەرۋ ءۇشىن كەڭ اۋقىمدى ءارى مازمۇندى كەلىسسوزدەر جۇرگىزدىك. كەزدەسۋىمىز ءوزارا سەنىم جانە تۇسىنىستىك رۋحىندا ءوتتى. ءبىز مازمۇندى ساياسي ديالوگتىڭ قارقىنىن ودان ءارى كۇشەيتەمىز دەپ ۋاعدالاستىق. سونداي-اق كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم اياسىنداعى ستراتەگيالىق ارىپتەستىگىمىزدى نىعايتۋعا نيەتتى ەكەنىمىزدى راستادىق», دەدى قازاقستان پرەزيدەنتى.
قاسىم-جومارت توقاەۆ ەۋروپالىق وداق - قازاقستاننىڭ ەڭ ءىرى ساۋدا جانە ينۆەستيتسيالىق سەرىكتەستەرىنىڭ ءبىرى ەكەنىن اتاپ ءوتتى.
ايتا كەتسەك, 30 جىل ىشىندە قازاقستانعا ەۋروپادان تارتىلعان ينۆەستيتسيا كولەمى 160 ميلليارد دوللاردان اسقان. ال بيىلعى 8 ايدا قازاقستان مەن ەۋروپالىق وداق ەلدەرى اراسىنداعى تاۋار اينالىمى 43 پايىزعا ءوسىپ, 26 ميلليارد دوللارعا جەتتى.
مەملەكەت باسشىسى شارل ميشەلمەن كەزدەسۋ بارىسىندا ەنەرگەتيكا, «جاسىل» ەكونوميكا, اۋىل شارۋاشىلىعى, كولىك جانە لوگيستيكا سالالارىنداعى ءىس-ارەكەتىمىزگە وڭ باعا بەرگەندەرىنە توقتالدى. پرەزيدەنتتىڭ ايتۋىنشا, تاراپتار ءوزارا ءتيىمدى ءىس-ارەكەتتى ودان ءارى كۇشەيتۋ ءۇشىن بىرلەسىپ جۇمىس ىستەۋگە كەلىستى.
«اسىرەسە, اسا ماڭىزدى شيكىزاتتى تاسىمالداۋ جانە جاسىل سۋتەگى ەنەرگەتيكاسىن دامىتۋ ماسەلەسىندە مول مۇمكىندىگىمىز بار سونىمەن قاتار, حالىقارالىق كولىك دالىزدەرىن دامىتۋدىڭ ماڭىزدىلىعىن اتاپ وتتىك. بۇل – قازىرگى گەوساياسي جاعدايدا وتە وزەكتى ماسەلەنىڭ ءبىرى. سونداي-اق, ەۋروپالىق وداقتىڭ «ترانسكاسپي حالىقارالىق كولىك باعىتىن» قولداۋ مۇمكىندىگىن قاراستىردىق. بۇدان بولەك, ەۋروپا سانكتسيالارىنىڭ قازاقستان ەكونوميكاسىنا ىقپالىن بولدىرماۋ ماسەلەسىن تالقىلادىق», دەپ تۇيىندەدى قاسىم-جومارت توقاەۆ.