سەناتور اندرەي لۋكين مەملەكەتتىك اۋديت كوميتەتىنىڭ جۇمىسىن سىنادى, اتاپ ايتقاندا, ولاردىڭ ءتيىمسىز جانە ناتيجەسىز تەكسەرۋ جۇرگىزگەنىنە توقتالدى. بۇل تۋرالى ول ەلىمىزدىڭ پرەمەر-ءمينيسترىنىڭ اتىنا دەپۋتاتتىق ساۋالىندا جاريا ەتتى, دەپ حابارلايدى Egemen.kz.
سەناتوردىڭ ايتۋىنشا, اۋديتورلار ءارى جىلدا بىردەي جانە قايتالانا بەرەتىن زاڭ بۇزىلۋىن تىركەپ كەلەدى. جۇمىستىڭ ءتيىستى دەڭگەيدە جۇرگىزىلمەۋىنە بايلانىستى بىرقاتار تەكسەرۋ ناتيجەسىز اياقتالدى.
«اتاپ ايتقاندا, جوسپارلانعان 82 شارانىڭ 28-ءى نەمەسە 34% استام جىلدىق تىزىمگە نەگىزسىز ەنگىزىلگەن بولىپ شىقتى. سوعان قاراعاندا تەكسەرىلگەن جەكەلەگەن مينيسترلىكتەردە ەشقانداي قاۋىپ دەڭگەيى جوق. جۇمىستىڭ دۇرىس ۇيىمداستىرىلماۋىنىڭ سالدارىنان بىرقاتار تەكسەرۋدىڭ ناتيجەسى تومەن ءارى ءتيىمسىز بولىپ شىقتى», دەپ اتاپ ءوتتى اندرەي لۋكين.
سەناتور سونىمەن قاتار كامەرالىق باقىلاۋ جۇرگىزۋ ماسەلەسىن كوتەردى. سەناتوردىڭ اقپاراتى بويىنشا اۋماقتىق دەپارتامەنتتەر باقىلاۋدىڭ بۇل ءتۇرىن جۇرگىزگەن جوق, دەگەنمەن جالپى سوماسى 300 ملرد تەڭگەدەن استام 3 مىڭنان جوعارى مەملەكەتتىك ساتىپ الۋ ءراسىمى بولۋى ءتيىس ەدى. ءتىپتى وتكىزىلگەن جاعدايلاردا دا, شەنەۋنىكتەر كوبىنەسە شارتتى جەڭىلدىكتەردى وزدەرى ەسەپتەيدى, ياعني شەشىم تەكسەرۋشىنىڭ سۋبەكتيۆتى پىكىرىنە بايلانىستى بولادى. سونىمەن قاتار اۋديتورلار جەكەلەگەن جاعدايلاردا قىلمىستىق قۇقىق بۇزۋشىلىقتاردىڭ ايقىن بەلگىلەرى بولعان كەزدە ماتەريالداردى قۇقىق قورعاۋ ورگاندارىنا جىبەرمەيدى جانە اكىمشىلىك ىقپال ەتۋ شارالارىن قولدانبايدى.
سەناتور وسىعان بايلانىستى اۋديتورلاردىڭ جۇمىسىن جاقسارتۋ مەن بيۋدجەت قارجىسىن, مەملەكەت جانە كۆازيمەملەكەتتىك سەكتور اكتيۆتەرىن باسقارۋ مەن پايدالانۋدىڭ تيىمدىلىگىن ارتتىرۋ جونىندە بىرقاتار ۇسىنىس ايتتى.
«تاۋەكەلدەردى باسقارۋ جۇيەسىنىڭ ولشەمدەرى مەن مەملەكەتتىك اۋديت وبەكتىلەرىن ىرىكتەۋ ءتارتىبىن قايتا قاراۋدى, سالالىق بۇيرىقتاردى ورىندالۋداعى مىندەتتىلىك جونىندەگى تالاپتاردى قاتاڭ ساقتاۋدى, كامەرالىق باقىلاۋ جۇرگىزۋ كەزىندە مەملەكەتتىك ساتىپ الۋ تۋرالى زاڭناما ەرەجەلەرىن بىركەلكى قولدانۋدىڭ ادىسنامالىق نەگىزىن ازىرلەۋدى, شىعىس وپەراتسيالارىن توقتاتا تۇرۋ تۋرالى وكىمدەردى شىعارۋ جانە جويۋ پروتسەسىندەگى ادامي فاكتوردى اقپاراتتىق جۇيە ارقىلى اۆتوماتتى تۇردە الىپ تاستاۋدى ۇسىنامىن», دەدى سەناتور.