ناشار ينتەرنەت ءۇشىن قازاقستاندىق بايلانىس وپەراتورلارى شامامەن 271 ملن تەڭگە تولەگەن. بۇل تۋرالى قازاقستاننىڭ تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ ءماجىلىس الاڭىندا ايتتى, دەپ حابارلايدى Egemen.kz.
ۆيتسە-ءمينيستردىڭ ايتۋىنشا, قازاقستاندا بايلانىس وپەراتورلارى ءۇشىن جاۋاپكەرشىلىك كۇشەيىپ جاتىر.
«مەنىڭ بىلۋىمشە, بايلانىس وپەراتورلارى شامامەن 271 ميلليون ايىپپۇل تولەگەن. ءبىز ءتيىستى زاڭناماعا وزگەرىستەر ەنگىزدىك, بايلانىس ساپاسىنىڭ پارامەترلەرىن بەكىتتىك. ەگەر قانداي دا ءبىر ماسەلە تۋىنداسا, ءبىزدىڭ مينيسترلىكتىڭ بايلانىس كوميتەتىنە E-otinish جۇيەسى ارقىلى شاعىمدانۋعا بولادى. ءبىزدىڭ اۋماقتىق ماماندار بارىنشا كومەكتەسەدى. ەگەر ساپا ماسەلەلەرى بويىنشا بۇزۋشىلىقتار بولسا, وندا ءتيىستى ايىپپۇل سالىنادى», دەدى اسەت تۇرىسوۆ.
سونداي-اق ول قانداي وپەراتورمەن قولداناتىنىن جانە قولدانىس اياسىندا قانداي پروبلەمالارعا تاپ بولعانىن ايتتى.
«مەندە Activ بار. نەگىزىندە مەنىڭ قاجەتتىلىكتەرىم ءۇشىن قولايلى جۇمىس ىستەيدى», دەپ جاۋاپ بەردى ءا.تۇرىسوۆ.