قوستاناي وبلىسىندا ۇلتتىق مەرەكە قازاقستان حالقى اسسامبلەياسىنىڭ «بىرلىك» حالىقارالىق جاستار لاگەرىنىڭ جۇمىسى ءوز مارەسىنە جەتتى. اقپارات جانە قوعامدىق دامۋ مينيسترلىگىنە قاراستى «قوعامدىق كەلىسىم» مەكەمەسىنىڭ ۇيىمداستىرۋىمەن وتكەن ۇشكۇندىك ءىس-شاراعا ەلىمىزدىڭ بارلىق ايماعىنان 70-تەن استام ۆولونتەر جينالدى. قىرعىزستان, وزبەكستان جاستارى ونلاين بايلانىس ارقىلى قوسىلدى.
جاستار لاگەرىنىڭ اشىلۋ راسىمىنە «قوعامدىق كەلىسىم» رمم ديرەكتورىنىڭ ورىنباسارى اپپاز كەمەلەۆ, قوستاناي وبلىسىنىڭ «قوعامدىق كەلىسىم» كمم ديرەكتورى ناتاليا رامازانوۆا جانە «اسسامبلەيا جاستارى» رقب توراعاسى تالعات جۇرىمباەۆ قاتىستى.
– ءبىز بۇگىن قوستاناي وبلىسىنداعى اۋليەكول اۋدانىندا تابيعي اپاتتان زارداپ شەككەن تۇرعىندارعا گۋمانيتارلىق كومەك كورسەتۋ شارالارىنا بەلسەندى اتسالىسقان ەرىكتىلەردىڭ باسىن قوسىپ وتىرمىز. قازاقستاننىڭ بارلىق وڭىرىنەن كەلگەن جاستار كوشباسشىلارى, بەلسەندى جاستاردىڭ كوبى كەلدى. جاستار – قاشان دا قوعامنىڭ قوزعاۋشى كۇشى. ۇشقان قۇستىڭ قاناتى تالاتىن ۇلان-عايىر وتانىمىزدىڭ قاي بۇرىشىندا جۇرسە دە, ەلدىك تۋى كوتەرىلگەن ساتتە جۇمىلا جۇك كوتەرىپ, كوپكە ۇلگى كورسەتە بىلگەن جاسامپاز جاستارىمىزدىڭ كوپ ەكەنىنە قۋانامىز, – دەدى سالتاناتتى جيىندا العىسوز الىپ, جاستاردى قۇتتىقتاعان تيمۋر جۇرىمباەۆ.
قحا جاستارىنىڭ الماتى قالالىق وكىلدىگى توراعاسىنىڭ ورىنباسارى ومار موحاممەدسارۋاردىڭ سوزىنشە, ەلىمىزدىڭ ءار وڭىرىندە ءبىرىن-ءبىرى كورمەي يگى ىسكە جۇمىلىپ جۇرگەن ۆولونتەر جاستاردىڭ ءبىر جىلدا ءبىر رەت باسىن قوساتىن «بىرلىك» لاگەرىنىڭ ماڭىزى ەرەك, ءجونى بولەك. جاستار مۇنداي شارالاردى اسىعا كۇتەدى. ويتكەنى ءبىر-بىرىمەن تانىسىپ, جۇزدەسىپ, ءبىلىسىپ, جاستارعا قاتىستى ماسەلەلەردىڭ ءارى قاراي شەشىلۋ جولدارىن اقىلداسىپ-كەڭەسەدى. پىكىر الىسىپ, تاجىريبە الماسادى.
جىل سايىن ەرىكتىلەر قوزعالىسىنا اتسالىسىپ جۇرگەن بەلسەندى جاستاردىڭ اراسىندا ۇيىمداستىرىلىپ تۇراتىن ءداستۇرلى ءىس-شارانىڭ ماقساتى – دوستىق بايلانىستاردى نىعايتۋ, پاتريوتيزم, ەل مۇددەسىنە جۇمىلۋ, بىرلىك قاعيداتتارىن ساناعا ءسىڭىرۋ. ۆولونتەر جاستار التىنسارين اۋدانىنداعى قالىڭ ورمان اياسىنا ورنالاسقان «جايلاۋ» دەمالىس ورنىندا بىرنەشە كۇن قاتارىنان مەديا ساۋاتتىلىقتى كوتەرۋ, اقپاراتتىڭ اق-قاراسىن اجىراتا ءبىلۋ, الەۋمەتتىك جەلىلەردە ەتنوسارالىق شيەلىنىستەردىڭ الدىن الۋ تۋرالى دارىستەر تىڭدادى. سان الۋان سپورتتىق مادەني شارالارعا قاتىسىپ, كوڭىلدى جارىستار وتكىزدى. سونداي-اق قىركۇيەكتىڭ باسىندا ورتەنگەن امانقاراعاي ورمانىنا بارىپ, ءبىر كۇن بويى قاراعاي كوشەتتەرىن وتىرعىزدى.
لاگەردىڭ ءبىرىنشى كۇنى قوستاناي وبلىسى قحا عىلىمي-ساراپشىلىق توبىنىڭ مۇشەسى, فيلولوگيا عىلىمدارىنىڭ كانديداتى دميتري كاچەەۆ جاستارعا كۇندەلىكتى ومىردە جانە الەۋمەتتىك جەلىلەردە ورىن الىپ جاتقان ەتنوسارالىق ۇلتارالىق جاعدايدى ۋشىقتىرىپ, ەل ىشىنە سىنا قاعاتىن كەلەڭسىز جاعدايلاردىڭ الدىن الۋ جونىندە ترەنينگ وتكىزدى.
سونداي-اق مەملەكەتتىك قىزمەت ىستەرى اگەنتتىگىنىڭ قوستاناي وبلىسىنداعى دەپارتامەنتىنىڭ باسشىسى اسحات ەسكەندىروۆ جاستارعا مەملەكەتتىك قىزمەتشىنىڭ ۇستانىمى, پاتريوتتىق تاربيە, ءبىلىم الۋدىڭ ماڭىزى جونىندە اڭگىمەلەدى.
مەملەكەت باسشىسى قاسىم-جومارت توقاەۆتىڭ «قازاقشا سويلەيتىن جاستار كوبەيىپ كەلە جاتىر. جالپى, تىلدىك ورتا تۇبەگەيلى وزگەردى. قازاق ءتىلىن بىلەتىن وزگە ۇلت وكىلدەرى دە از ەمەس» دەگەن ءسوزىنىڭ دالەلىن وسى حالىقارالىق جاستار لاگەرىنەن كوردىك. مۇندا وتكەن قىزىقتى دا, مازمۇندى شارانىڭ ءبىرى كاتەرينا گەدزۋردىڭ بۇگىنگى قوعامداعى قازاق ءتىلىنىڭ ورنى مەن قىزمەتى تۋرالى ماسەلەگە ارنالعان ترەنينگى بولدى.
– قازىرگى جاستار مەملەكەتتىك ءتىلدىڭ ماڭىزىن ايقىن تۇسىنەدى, قادىر-قاسيەتىن شىنايى سەزىنەدى. ءتىل – ۇلت پەن ۇلتتى جاقىنداستىراتىن ەڭ ۇلكەن قاتىناس قۇرالى. مەنىڭ ويىمشا, قازاق ءتىلىن ۇيرەنەتىندەر ءتىل ءبىلۋدىڭ بارلىق ارتىقشىلىعىن ءتۇسىنۋى كەرەك. ءبىز قازاق ءتىلىن مەڭگەرۋ ارقىلى ءوز ءومىرىمىزدى جەڭىلدەتەمىز, كوپتەگەن رەنىش, وكپە-ناز تۋدىراتىن كەلەڭسىز جاعدايلاردان اۋلاقتايمىز. قازاق ءتىلىن مەڭگەرگەن جاستاردىڭ الدىندا جاڭا مانساپتىق, ساياسي جانە اكىمشىلىك ارتىقشىلىقتار دا پايدا بولادى. ويتكەنى قازاق ءتىلى بارىمىزگە ورتاق بىرلىك پەن كەلىسىمنىڭ ءتىلى, بولاشاعىمىز, ەرتەڭىمىز, – دەيدى كاتەرينا گەدزۋر.
دەمالىس ورنىندا وتكەن ءىس-شارالار بارىسىندا ۆولونتەرلىك پەن كاسىپكەرلىكتى ۇشتاستىرۋ, كوممۋنيكاتسيا قۇرۋ ماسەلەلەرى, بىرلىك پەن تاتۋلىقتىڭ باستى قۇندىلىقتارى جونىندە كۆەست جانە ۇلتتىق ويىندار ۇيىمداستىرىلدى.
– جالپى, قازاقستان حالقى اسسامبلەياسى ەل كولەمىندە ءوتىپ جاتقان بىردە-ءبىر قايىرىمدىلىق شارالارىنان تىس قالىپ كورگەن ەمەس. قانداي دا ءبىر جاعداي ورىن الا قالسا, ۇنەمى ۇلەس, ءۇن قوسىپ وتىرادى. مىسالى, امانقاراعاي ورمانى ورتكە ورانعان كۇندەرى اسسامبلەيا قوستاناي وبلىسىنا 60 ملن تەڭگەدەن استام سوماعا 243 توننا گۋمانيتارلىق كومەك جىبەردى. ال بۇگىن قورىتىندىلانىپ جاتقان «بىرلىك» ارقىلى ەلىمىزدىڭ بارلىق وڭىرىنەن كەلگەن جاستار, ەرىكتىلەر ءبىر-بىرىمەن جاقىن تانىسىپ, ءوزارا دوستىق قارىم-قاتىناس ورناتتى, اعاش وتىرعىزۋ, تابيعاتتى ايالاۋ سياقتى يگى ىستەرگە جاستىق جالىنمەن جۇمىلا كىرىستى. پرەزيدەنتىمىز قاسىم-جومارت كەمەل ۇلى توقاەۆ «بىرلىك – باستى قاعيدامىز, ەلدىڭ بىرلىگى – ەلىمىزدىڭ دامۋى مەن وركەندەۋى جولىنداعى باستى قۇندىلىق» دەيدى. ءبىز وسى ۇستانىمعا بەرىك بولۋىمىز كەرەك, – دەيدى اقپارات جانە قوعامدىق دامۋ مينيسترلىگىنىڭ «قوعامدىق كەلىسىم» رمم جەتەكشى ساراپشىسى نازگۇل دوسماعانبەتوۆا.
قوستاناي وبلىسى