جۋىردا مادەنيەت جانە سپورت مينيسترلىگى ءداستۇرلى, كلاسسيكالىق, ەسترادالىق جانە تەاتر ونەرى جانرلارىنداعى شىعارمالار مەن ولاردىڭ اۆتورلارىن قولداۋ ماقساتىندا DALA DAUYSY رەسپۋبليكالىق كونكۋرسىن جاريالاعان ەدى. جۇلدە قورى 46 ملن تەڭگەنى قۇرايتىن بايقاۋ نەگىزگى ۇلكەن 5 نوميناتسيا بويىنشا 16 سىيلىقتى قامتيدى. جاڭا جوبانىڭ باستالعانى تۋرالى مينيستر داۋرەن اباەۆ Facebook الەۋمەتتىك جەلىسىندەگى پاراقشاسىندا جازعان بولاتىن.
«ۇلتتىق قۇندىلىقتارىمىزدى ۇلىقتاپ, جاڭا ونەر تۋىندىلارى اۆتورلارىن قولداۋعا باعىتتالعان DALA DAUYSY رەسپۋبليكالىق كونكۋرسىن جاريالاپ وتىرمىز. جاڭا اۆتورلاردى ەلگە تانىتۋعا, تىڭ تۋىندىلاردىڭ كوپشىلىككە تارالۋىنا, پاتريوتتىق اندەردىڭ كەڭىنەن ناسيحاتتالۋىنا سەرپىن بەرەتىن كونكۋرس شىعارماشىلىق يەلەرىن بەيجاي قالدىرمايدى دەپ سەنەمىز», دەپ جازدى داۋرەن اباەۆ.
ۇمىتكەرلەر «ۇزدىك فولكلورلىق مۋزىكا», «ۇزدىك كلاسسيكالىق مۋزىكا», «ۇزدىك دراماتۋرگيالىق تۋىندى», «ۇزدىك مۋزىكالىق-تەاترلىق جانر تۋىندىسى», «رەسپۋبليكا ءانى» (ەسترادا جانرى), مادەنيەت جانە سپورت مينيسترلىگىنىڭ 2 ارنايى جۇلدەسى نوميناتسيالارى بويىنشا باقتالاسادى. ال جەڭىمپازدار جەلتوقسان ايىندا انىقتالىپ, ماراپاتتالادى.
ايتا كەتەيىك, اتالعان بايقاۋعا وتىنىمدەر 15 قازان مەن 15 قاراشا ارالىعىندا قابىلدانادى.
كونكۋرس تۋرالى تولىق اقپارات ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىنىڭ سايتىندا كورسەتىلگەن.