يدم-دا يندۋستريا جانە ينفراقۇرىلىمدىق دامۋ سالاسىنداعى قوعامدىق كەڭەستىڭ كەزەكتى وتىرىسى ءوتتى, دەپ حابارلايدى Egemen.kz.
وتىرىس بارىسىندا وڭىرلەردەگى الەۋمەتتىك ماڭىزى بار قوعامدىق كولىكتەردى سۋبسيديالاۋ جانە ونى جەتىلدىرۋ ماسەلەسى تالقىلاندى.
كولىك كوميتەتى توراعاسىنىڭ ورىنباسارى قاسىم تىلەپوۆتىڭ ايتۋىنشا, بۇگىندە قالالىق قوعامدىق كولىكتەردى سۋبسيديالاۋ جەرگىلىكتى اتقارۋشى ورگانداردىڭ تىكەلەي قۇزىرەتىندە. جىل سايىن بۇل تاراپتا بولىنەتىن قاراجات كولەمى ايتارلىقتاي ارتىپ كەلەدى.
«2021 جىلى جەرگىلىكتى اكىمدىكتەر ايماقتارداعى الەۋمەتتىك ماڭىزى بار قالالىق اۆتوبۋس باعىتتارىن سۋبسيديالاۋعا 93 ملرد تەڭگە ءبولدى. بۇل 2020 جىلمەن سالىستىرعاندا 75 پايىزعا ارتىق (53 ملرد تەڭگە), ال 2018 جىلى بولىنگەن قاراجات كولەمىنەن 5 ەسە جوعارى (17 ملرد تەڭگە). ال بيىل اتالعان سالانى سۋبسيديالاۋعا 113,5 ملرد تەڭگە قاراستىرىلعان. قارجىنىڭ باسىم بولىگىن استانا, الماتى جانە شىمكەنت قالالارىنىڭ اكىمدىكتەرى بولگەن», دەپ اتاپ ءوتتى ق.تىلەپوۆ.