استانانىڭ ابىلاي حان داڭعىلى مەن كۇيشى دينا كوشەسىنىڭ قيىلىسىندا كۇيشىلەر اللەياسى اشىلدى. الماتى وبلىسى قورداي ەلدى مەكەنىنەن جەتكىزىلگەن, كولەمى 3ح2 مەترلىك ءمارمار تاسقا ونەرىمەن كەڭىنەن تانىمال 101 كۇيشىنىڭ اتى قاشالىپ جازىلدى.
اللەيانىڭ اشىلۋىنا كەلگەن قاۋىم الدىمەن داڭقتى كۇيشى دينا نۇرپەيىسوۆانىڭ ەسكەرتكىشىنە گۇل شوقتارىن قويدى. بۇدان كەيىن قازاقستاننىڭ ەڭبەك سىڭىرگەن قايراتكەرى, پروفەسسور, كۇيشى ۇستاز ورىنباي دۇيسەن مەن الماتى اۋدانىنىڭ اكىمى ماقسات سامات ۇلى «كۇيشىلەر اللەياسىنىڭ» لەنتاسىن سالتاناتتى تۇردە قيدى.
«ۇلتىمىزدىڭ كۇي ونەرىنىڭ ساڭلاقتارىنا ارنايى اللەيا
اشىلىپ وتىر. مۇنى ۇلى دالا وركەنيەتىنە, قازاقتىڭ رۋحاني كەمەلدىگىنە قويىلعان ەسكەرتكىش دەپ باعالاۋعا دا بولادى. قازاق تاريحىندا قورقىت بابا, كەتبۇعا سىندى ۇلى كۇيشىلەردىڭ مۇراسى حالىق ساناسىنان وشكەن جوق. قازاق كۇيشىلەرى مەن كومپوزيتورلارىنىڭ اتى گرانيت تاسقا قاشالىپ جازىلۋى باياعى كوكتۇرىكتەردىڭ زامانىن ەسكە تۇسىرەدى. كۇلتەگىن مەن بىلگە قاعان جازۋلارى تاسقا قاشالىپ كۇنى بۇگىنگە دەيىن جەتتى. حالىق جادىنان شىقپايتىن 101 ادامنىڭ ەسىمى تاسقا عانا ەمەس, ۇلتىنىڭ جۇرەگىندە جازىلدى دەپ قاراۋىمىز كەرەك», دەدى جيىندا ءسوز العان «كۇي اناسى» رەسپۋبليكالىق قورى جانىنداعى اقساقالدار القاسىنىڭ مۇشەسى ءۋاليحان قاليجان.
اللەيانىڭ كىرەبەرىسىنە, ورتاسىنا – قازاق حالقىنىڭ شاڭىراعى, ەكى جاعىنا – ينستاللياتسيالىق ۇلگىدە مىستان قۇيىلىپ جاسالعان دومبىرا مەن قوبىز ورناتىلعان.
قازاقستاننىڭ مادەنيەت قايراتكەرى, ديريجەر, كومپوزيتور نۇرلان بەكەنوۆتىڭ جەتەكشىلىگىمەن ەلۋگە جۋىق جاس كۇيشىدەن قۇرالعان ۇلتتىق اسپاپتار وركەسترى, «ارقا اۋەندەرى» ۇلتتىق ءانسامبلى سول جەردە كۇي ويناپ, كەلۋشىلەردىڭ كوڭىلىنەن شىعا ءبىلدى.
بەلگىتاستى جاساعان ءمۇسىنشى جالىن باۋرقان, ال يدەيا اۆتورى – پروفەسسور تولەگەن قۋانىشەۆ.