كەشە ۇكىمەت ۇيىندە قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ پەن مالايزيا پرەمەر-ءمينيسترى نادجيب تۋن رازاك باستاعان ەكى ەلدىڭ ۇكىمەتارالىق كەلىسسوزدەرى بولىپ ءوتتى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەلىسسوز بارىسىندا تاراپتار ساۋدا ەكونوميكالىق ىنتىماقتاستىقتىڭ كەڭ اۋقىمداعى ماسەلەلەرىن تالقىلادى.
قازاقستان ۇكىمەتىنىڭ باسشىسى قازاقستاندا مەملەكەتتىك ۇدەمەلى يندۋستريالىق-يننوۆاتسيالىق باعدارلاما ءساتتى ىسكە اسىرىلىپ جاتقانىن اتاپ كورسەتىپ, مالايزيالىق ينۆەستورلاردى وسى باعدارلاماعا بەلسەندى تۇردە قاتىسۋعا شاقىردى. ك.ءماسىموۆتىڭ ايتۋىنشا, مۇناي-گاز جانە تاۋ-كەن, يندۋستريالى ونەركاسىپ, ءبىلىم بەرۋ, شاعىن جانە ورتا بيزنەس, تۋريزم سالالارى بويىنشا ءوزارا ءىس-قيمىلدى دامىتۋدىڭ بولاشاعى زور.
«قازاقستان ۇكىمەتى جاسالعان شارتتارعا 10 جىلعا تۇراقتىلىق بەرۋ, سالىق جەڭىلدىكتەرى مەن شەتەلدىك مامانداردى تارتۋ سياقتى ينۆەستورلارعا جاڭا مۇمكىندىكتەر بەرۋدى كوزدەيتىن زاڭ جوباسىن دايىندادى», دەدى قازاقستان پرەمەر-ءمينيسترى. سونداي-اق, ك.ءماسىموۆ مالايزيالىق تاراپتى استانادا وتەتىن ەكسپو-2017 حالىقارالىق مامانداندىرىلعان كورمەسىنە قاتىسۋعا شاقىردى.
ءوز كەزەگىندە ن.رازاك قازاقستان مەن مالايزيا اراسىنداعى قارىم-قاتىناس جوعارى دەڭگەيدە دامىپ وتىرعانىن اتاپ ءوتتى. «قازىرگى تاڭدا قازاقستاندا قۋاتتى ەكونوميكالىق ءوسىم بايقالىپ وتىر. بىزدە ەكىجاقتى ارىپتەستىكتى ءارى قاراي دامىتۋدىڭ ۇلكەن الەۋەتى بار», دەدى, مالايزيا پرەمەر-ءمينيسترى.
كەلىسسوزدەر قورىتىندىسى بويىنشا بىرقاتار قۇجاتتارعا قول قويىلدى. اتاپ ايتقاندا, ماڭعىستاۋ وبلىسىنىڭ اكىمدىگى مەن «Kazakhstan Methanol Limited» جانە «Kenmakmur Holding Sdn. Bhd.» كومپانيالارى اراسىندا وسى وڭىردە مەتانول جانە سۇيىتىلعان تابيعي گاز وندىرەتىن زاۋىتتاردىڭ قۇرىلىسى جونىندە شەكتى كەلىسىمگە قول قويىلدى.
جامبىل وبلىسىنىڭ اكىمدىگى مەن «Agrostan Farms Sdn. Bhd.» كومپانياسى مال شارۋاشىلىق فەرمالارىن قۇرۋ بويىنشا ىنتىماقتاستىق تۋرالى مەموراندۋمعا قول قويدى.