مەملەكەت باسشىسى قاسىم-جومارت توقاەۆ الماتى وبلىسىنىڭ جۇرتشىلىعىمەن كەزدەسۋدە انا ءتىلىمىز - قازاق ءتىلى ءاردايىم ءبىرىنشى ورىندا بولىپ, ءبارىمىز ءۇشىن نەگىزگى باسىمدىق بولۋى قاجەت ەكەنىن ايتتى, دەپ حابارلايدى Egemen.kz.
«الەم حالىقتارىنىڭ جاقسى قاسيەتتەرىن بويعا ءسىڭىرىپ, وزىق ۇردىستەرىن ۇيرەنۋ ءۇشىن ءتىل ءبىلۋ قاجەت. بابالارىمىز «جەتى جۇرتتىڭ ءتىلىن ءبىل, جەتى ءتۇرلى ءىلىم ءبىل» دەپ ايتقان. شىن مانىندە, جاستار نەشە ءتىل بىلسە, الدىنان سونشا ەلدىڭ ەسىگى ايقارا اشىلادى. بۇل تۋعان ەلىڭنىڭ مۇددەسىنە قىزمەت ەتۋ ءۇشىن قاجەت. دەگەنمەن, ەڭ الدىمەن, جاستارىمىز انا ءتىلىن – قازاق ءتىلىن ءبىلۋى كەرەك», دەدى پرەزيدەنت.
قاسىم-جومارت كەمەل ۇلىنىڭ ايتۋىنشا, بۇگىندە قازاق تىلىنە نەگىزگى باسىمدىق بەرىلۋى كەرەك.
«انا ءتىلىمىز ءبىرىنشى ورىندا بولىپ, ءبارىمىز ءۇشىن نەگىزگى باسىمدىق بولۋى قاجەت. سولاي بولادى دا دەپ اتاپ ايتقىم كەلەدى. جالپى, ءبىز ءتىلىمىز دامىماي جاتىر دەگەن ويدان ارىلۋىمىز كەرەك. تاۋەلسىزدىك كەزەڭىندە ونىڭ مارتەبەسى بيىكتەمەسە, تومەندەگەن جوق. قانشاما اقپارات قۇرالدارى حابار تاراتادى. گازەت-جۋرنالدار, كىتاپتار شىعىپ جاتىر», دەپ اتاپ ءوتتى مەملەكەت باسشىسى.